Клучка Континентал

Доцни изградбата на клучката „Континентал“

Во моментов во тек е втората фаза, се изведуваат подвозникот и приклучните сообраќајници

Клучката „Континентал“ ќе биде готова кон крајот на летото, иако според планот на градските власти требаше да биде завршена веќе во мај. Градоначалникот Трифун Костовски на вчерашната обиколка на градилиштето, заедно со градоначалникот на Гази Баба, Коце Трајановски, нагласи дека е незадоволен од динамиката на изградбата и дека ќе бара од изведувачот „Пелагонија“ да работи и за време на викендите. Костовски потенцира дека има разбирање за проблемите со кои се соочува градежното претпријатие, како и со објективните околности кои ја отежнуваат изградбата, но сепак, ќе бара да се испочитува новата динамика според која клучката треба во јули да биде подготвена за сообраќај.

За продолжување на градежните работи ќе биде неопходно и итно дислоцирање на привремените објекти во кои се сместени канцелариите на Црвен крст - Гази Баба, кои во моментов буквално се опколени со новите сообраќајници. За нив, градоначалникот вети дека Градот ќе плати привремено сместување под кирија, за да не се одолжува изградбата. Тој истакна дека Градот ја затворил финансиската конструкција за овој капитален објект, кој ќе чини меѓу 4 и 4,5 милиони евра.

Во моментов, во тек е втората фаза на изградбата на клучката, во која се изведува подвозникот и приклучните сообраќајници. Тоа е најдолгата и најтешката фаза од изградбата, која во моментов е 80 отсто завршена. Во третата фаза ќе се извадува кружниот тек, заради што ќе следува нов сообраќаен режим со затворање на улицата „Беласица“. Во последната фаза, во текот на август, ќе остане само да се изградат приклучните улици кон хотелот „Континентал“ и Скопски саем. (С.Н.)