Сообраќајни правила, етика и казни

Наместо досегашните 400 евра казна за сите пијани возачи, отсега тие ќе се рангираат во четири категории и ќе плаќаат во зависност од тоа колку испиле.

...

Казните ќе се движат од 250 до 400 евра, во зависност од тоа во кој стадиум на пијанство ќе биде фатен управувачот на возилото.

Ова се измените и дополнувањата на Законот за безбедноста во сообраќајот, кои влегоа во собраниска процедура, а според кои висината на паричната казна ќе се одредува според концентрацијата на алкохолот во крвта. Предвидено е рангирање на пијаните возачи во четири категории. Во Македонија, дозволена концентрација на алкохол во крвта е под 0,50 промили.

Досега сите пијани возачи, без разлика дали биле фатени со 0,50 или пак со над 2 промила алкохол во крвта, плаќаа иста казна од по 400 евра. Надлежните сметаат дека на тој начин ќе има поадекватно санкционирање на пијаните возачи.

- Како резултат на компаративните искуства во Европа, со предложениот закон се предвидува конкретно дефинирање на недозволените промили на алкохол во крвта, како и адекватно санкционирање на учесниците во сообраќајот што постапуваат спротивно на посочените одредби - велат креаторите на законските измени. На нашата мини-анкета повеќемина граѓани позитивно реагираа на предложените законски измени.

- Не може некој што испил едно пиво да плаќа иста казна како некој што се направил „дрво“ пијан. Полицијата досега само еднаш ме запрела и по испиени две чаши пиво апаратот покажа дека имам околу 0,60 промили алкохол во крвта. Ми напишаа казна од 400 евра, но поминав само со половина од казната бидејќи ја платив во законскиот рок од осум дена. Сметам дека на тој начин ќе се воведе ред во контролата на пијаните возачи - вели возач од Скопје. Други, пак, сметаат дека не треба да се прави категоризација на пијаните возачи.
...
Македонија е земја што влегува во категоријата на земји со одредена толеранција кон процентот на алкохол во крвта. Дозволената граница до 0,50 промили како референтна ја имаат и Бугарија, Хрватска, Србија, Грција, Словенија, Турција, Италија, Германија, Швајцарија и други. Најригорозни земји, во кои воопшто не е дозволено присуство на алкохол во крвта, се Чешка, Унгарија, Романија, Словачка, Саудиска Арабија и Обединетите Арапски Емирати. Полиберални земји, со дозволени до 0,8 промили алкохол во крвта, се Ирска, Велика Британија, Канада, Мексико, Малта, САД и други. Македонската полиција често врши поголеми акции за алкотестирање на возачите по македонските патишта и најчесто добиените податоци се дека околу 20 отсто од нив возеле под дејство на алкохол.

Процентот на алкохол во крвта не зависи само од количината на испиениот алкохол, туку и од други фактори: тежината на човекот, полот, возраста, временскиот интервал од внесувањето на алкохолот до тестирањето и друго. Маж со просечна тежина од околу 70 килограми по две испиени пива при тестирање може да ја надмине дозволената граница од 0,5 промили алкохол во крвта. За намалување на вредноста на алкохол во крвта од над 0,5 на нула потребно е да поминат од еден и пол до три часа.

Возењето под дејство на алкохол не е најчестата причина за предизвикување сообраќајни несреќи во Македонија. Во минатата година имало 4.408 сообраќајки со потешки последици, како и 11.698 сообраќајни несреќи со полесни последици во кои е причинета само материјална штета. Од сите несреќи во минатата година, само мал дел, односно 133, биле предизвикани поради возење под дејство на алкохол, а најголем број, т.е. 1.461 несреќа се случиле поради возење со преголема брзина. Лани на македонските патишта загинале 162 учесници во сообраќајот, а повредени се 6.724 лица.

Во 2008 година полицијата во Македонија поднела 135.384 барања за поведување прекршочна постапка, во 24.646 случаи наплатени се парични казни, а од сообраќај се исклучени 17.284 возила и 14.582 возачи. Привремено се одземени 5.150 возачки дозволи. Лани биле извршени и 71.000 алкотестирања.

...
- Покрај униформираните полициски службеници, дадени се овластувања контрола во сообраќајот да вршат униформираните царински работници и припадниците на шумската полиција. Со овие новини се засилува степенот на контролата, а со тоа се влијае и врз безбедноста во сообраќајот. Исто така, овластени се и железничките работници да го регулираат сообраќајот на премин преку железничка пруга во случај да не функционираат светлосно-сигналните уреди - објаснува Зоран Ѓуроски, член на РСБСП.

Измени има и во делот што се однесува на обележување на премин на пат преку железничка пруга. Предвидено е означување на сите браници на премините со црвена и со бела боја, како резултат на потребата од унификација на сите сообраќајни знаци на патиштата.

Една од поголемите измени, како што претходно информиравме, е рангирањето на пијаните возачи во четири категории, што досега не беше практика. Досега сите пијани возачи, без разлика дали биле фатени со над 0,50 или пак со над 2 промила алкохол во крвта, плаќаа иста казна од по 400 евра. Отсега таа ќе изнесува од 250 до 400 евра, во зависност во која фаза на пијанство ќе биде фатен возачот. Од РСБСП тоа го објаснуваат како поправичен начин на санкционирање на пијаните возачи бидејќи не можат во ист кош да се ставаат оние што испиле две пива и оние што управуваат возило откако се довеле до тешко пијанство. Креаторите на законските измени сметаат дека во Законот ќе се вметнат делови за поголема етичност и солидарност на учесниците во сообраќајот

- Со новите предлози на законските решенија применети се искуства од Словенија, Хрватска и Германија, бидејќи се поттикнуваат начелата кај учесниците во сообраќајот за меѓусебна солидарност, етичко однесување, а кај субјектите, како државни така и останати, да ги поттикнуваат и надградуваат овие односи - велат од РСБСП. Во предлогот на измените се дава можност родители или наставници да запираат сообраќај кога водат организирани колони пешаци или кога сообраќајот во близина на училишта го регулираат припадници на училишните сообраќајни единици и сообраќајните патроли на граѓани. Оваа новина е воведена пред се' поради високиот степен на загрозеност на пешаците како учесници во сообраќајот, а посебно на децата.На дел од учесниците во сообраќајот овозможено им е движење со поголема брзина за да не се предизвика застој на патиштата.

- Направени се измени во релација со актуелната тенденција на производство на современи, технички поусовршени и софистицирани возила, чие користење во согласност со постојните ограничувања на брзините на патот може да предизвика застој во сообраќајот. За таа цел, користејќи ги компаративните искуства на некои земји, се овозможува соодветна динамика на движење, односно се предвидува зголемување на дозволената брзина во просек за 10 километри на час за товарните моторни возила и автобусите, како и конкретни специфики во однос на возилата со кои се врши превоз на опасни материи - објаснуваат креаторите на законските измени. Во Републичкиот совет велат дека многу значајна измена за подобрување на безбедноста ќе биде создавањето на таканаречената Национална стратегија.

- Многу значајна новина е што Собранието се овластува да донесе Национална стратегија за подобрување на состојбите на безбедноста во сообраќајот. Стратегијата се донесува на времетраење од пет години и за нејзино спроведување се задолжени сите државни органи, организации и здруженија на граѓани - вели Ѓуроски.Првата ваква Национална стратегија веќе беше промовирана пред крајот на минатата година. Главна цел на стратегијата е намалување на жртвите во сообраќајот за 50 отсто до 2014 година и целосна заштита на децата од сообраќајните незгоди.

Оваа стратегија утврди дека на патиштата во Македонија има дури 169 црни точки на кои секоја година се случуваат по десетици сообраќајки, најчесто со фатални последици. Станува збор за тесни патишта, опасни тунели и кривини и други места што сеат смрт на патиштата. Националната стратегија предвидува „снимање“ на овие места за да се елиминираат црните точки. Предвидено е да се креираат раскрсници со кружен тек, да се отстранат билбордите што може да бидат причина за несреќа, да се постави соодветно осветлување на патиштата и други безбедносни мерки.

...

 Сепак, РСБСП смета дека во блиска иднина ќе треба да се донесе нов закон за безбедност во сообраќајот на патиштата, во кој ќе бидат вградени најдобрите европски искуства приспособени на состојбите и на степенот на развојот на сообраќајот во Македонија - вели Зоран Ѓуроски од Републичкиот совет.

Многу ми е криво што не стигнав да изреагирам да го сликам тоа или барем да му ги забележам табличките

Алкохолот и сигурноста во сообраќајот

Продолжувањето на времето за реакција условено со страв се нарекува “секунда на стравот” и се движи обично помеѓу една и пол до две секунди. Помеѓу факторите кој влијаат на времето за реакција извонредно место завзема алкохолот. Рефлексната активност на пијаниот возач е најмалку три пати побавна кога, на пример, не се напил ниту капка.

За сообраќајните несреќи поопасни се послабите степени на алкохолизираност, отколку сосотојбата на видливо пијанство. Пијаниот човек ниту самиот со себе не може и не умее да управува и патниците од таков возач обично се тргаат на страна.

Алкохолизираноста и слабиот степен, а тоа зависи и од индивидуалната подносливост, доведува до успорување на брзината на движењата и регирањата, лабава прецизност во работата, го стеснува видното поле, ја ремети можноста да се воочи раздалеченоста, заморот побрзо настапува, а со тоа попушта и сигурноста во возењето.

Електро-енцефалографските истипувања покажуваат дека кај сите прегледани, со ниво нешто помало од половина грам, настануваат промени на активност на мозочните ќелии, всушност модификација на работењето на повисоките нервни центри, а тоа се одразува во низ понатамошни пречки при управувањето со возилото.

Така, на опасните места се преценуваат можностите, се ризикува претерано, внимателноста попушта - се до искажување на чувства на претерана сигурност. Несомнено е дека при тоа доаѓа и до слабеење на моторните автоматизми, што тешко ја загрозува безбедноста во уптавувањето со возилото.

Карактеристичен е примерот, на основа на еден експеримент направен во Манчестер, при кој еден мошне добар и вешт професионален возач, под дејство на само 17 центилитри виски, управувајќи автобусот широк 2,27 метри се обидел да помине низ премин широк само 2,08 метри.

Репортер - 06.11.2008

Вчера околу пладне во строгиот центар на градот, на делот од улицата Димитрие Чуповски кај Рекорд, за само пет минути 13 граѓани непрописно ја поминаа улицата и направија прекршок, а четворица од нив за влакно избегнаа несреќа

Пешаците се најмасовната и најзагрозената категорија на учесници во сообраќајот, но воедно и најнедисциплираната. Вчера околу пладне во строгиот центар на градот, на делот од улицата Димитрие Чуповски кај Рекорд, за само пет минути 13 граѓани непрописно ја поминаа улицата и направија прекршок, а четворица од нив за влакно избегнаа несреќа. Сите "пешаци камикази" поминаа неказнето бидејќи во близина немаше сообраќајна полиција. Доколку беа фатени, на лице место требаше да платат глоба во висина од 25 евра во денарска противвредност.
- Во текот на минатата година сообраќајната полиција санкционираше 1169 пешаци што е за трипати повеќе во споредба со 2007 година кога имаме регистрирано 344 прекршоци. И од почетокот на годинава бројот на изречените казни е голем. Само во јануари се изречени 242 санкции. Најмногу казни се за преминување на коловоз на необележено место за што се изрекува глоба од 25 евра во денарска противвредност, но и за минување на црвено светло што се казнува со 35 евра. Оваа тенденција за поригорозни санкционирања се воведува како превентивна мерка за намалување на сообраќајните несреќи во кои страдаат пешаците - информираше Борче Пешевски од Секторот за односи со јавност во МВР.

Оваа статистика се потврдува и со истражувањата на Републичкиот совет за безбедност во сообраќајот - РСБПС и од тие причини оттаму се најавува голема медиумска кампања за едукација на пешаците од сите возрасти.
- Во соработка со медиумите и Сообраќајната полиција наскоро ќе започнеме голема кампања за подигање на сообраќајната култура на повисоко ниво. Ќе бидат подготвени плакати и екукативни флаери. Крајната цел е да се доведеме на едно ниво што е постигнато во Европа, вели Тоше Јанев портпарол на РСБПС.

Пешаците, пак, се жалат на ригорозните санкции бидејќи се спроведувале без претходно обезбедени услови. Реагираат што тротоарите најчесто се узурпирани со возила, па едноставно не можеш да поминеш ако не се симнеш на коловоз, а некаде воопшто нема обележено место за поминување.
-На мојата улица во должина од 150 метри нема ниту едно место обележено за пешаци. Да не зборувам дека на тротоарот редовно се паркирани по неколку автомобили. И како сега јас да плаќам глоба бидејќи не сум почитувал закон, а не ми обезбедиле услови!?-реагира жител на Капиштец. Борче Пешевски од МВР, вели дека во вакви случаи се санкционираат несовесните возачи кои ги паркираат возилата на напрописно место, а пешаците поминуваат само со предупредување.

Но, вели тој не се толерираат прескокнувањата преку огради на булеварите или минувања меѓу автомобили, на црвено светло и слично.


АНКЕТА:
Ги почитувате ли сообраќајните правила?

Иако е реткост да видите некој да пропешачи неколку метри подолу или погоре за да помине на зебра или пак да се чека зелено светло на семафор ако нема автомобили, поголемиот број од скопјани кои вчера ги анкетиравме рекоа дека ги почитуваат сообраќајните правила.


Владимир РАДЕВСКИ

Ги почитувам сообраќајните правила и како возач и како пешак. Секогаш поминувам на зебра, чекам црвено на семафор. Сметам дека сите заедно треба повеќе да внимаваме, но апелирам до надлежните да обезбедат подобри услови. Да ги остранат возилата од пешачките патеки.

Ленче СИМЈАНОВСКА

Секогаш поминувам на пешачки премин и не ги оправдувам оние кои тоа не го прават. Сметам дека казните од 25, 30 евра се премали бидејќи во опасност се доведува човечки живот, а тој нема цена. Правилата мора да се почитуваат. Само на тој начин ќе се намали бројот на сообраќајните несреќи.

Ратка БОЖИНОВСКА

Внимавам да не правам прекршоци. Најчесто минувам кај Зелен пазар и секогаш чекам да поминам на семафорот на крстосницата. Сообраќајните знаци треба да се почитуваат за да има некој ред. Поминувањата преку улица се опасни, секојдневно слушаме колку сообраќајки се прават.

Вангел БАРАКОВСКИ

Се разбира, особено кога во близина има полицаец! Минувам на зелено, на зебра, и тогаш кога не се брзам многу. Е, кога морам некаде да стигнам на време, тогаш заборавам на правилата. Се разбира свесен сум дека правам прекршок но, повторно внимателно за да не настрадам. Од кола или од полицаец, сеедно.

Флуоресцентните елеци не се задолжителни за возачите

- Според постојната законска регулатива и правилници, не е предвидена употребата на флуоресцентните елеци, кои во земјите во Западна Европа се задолжителни. Во тек е процедура со која ќе се регулираат определени подзаконски акти и правилници, а кои ќе се однесуваат и на поседувањето на овие елеци, кои во иднина, најверојатно, ќе бидат задолжителна опрема за возачите. Елеците може да се набават речиси на секоја раскрсница, на автопазарите, во големите маркети и во АМСМ.

- Слушнав дека елеците се задолжителни, па летоска купив два, едниот портокалов, другиот жолт, за двата автомобила, и ги ставив на клупата под задната шофершајбна, за да можат полицајците да видат дека ги имам. Елеците ги купив од еден голем маркет за алати и друга опрема по цена од 140 денари. Досега не ми се случило да ме запре полиција и да ми побара елек. Сум слушнал од пријатели на кои сообраќајци им се заканувале дека ќе им наплатат казни, но поминувале само со опомена и совет да си купат елек - вели скопјанката Билјана Здравковска (34).

Според полициските експерти, елеците, исто како и малите противпожарни апарати, кои исто така не се задолжителни за возачите на приватни автомобили, е корисно да се поседуваат поради безбедноста на возачите, но и на останатите учесници во сообраќајот. Во случај кога има дефект на возилото или поради други причини возачот мора да излезе од автомобилот, особено во ноќните часови или при слаба видливост, пожелно е да носи флуоресцентен елек бидејќи е поголема можноста останатите учесници во сообраќајот навреме да го забележат и да не го удрат.

Во развиените европски држави поседувањето флуоресцентни елеци не е задолжително само за возачот, туку и за сите патници во возилото. Граѓаните се во дилема и околу тоа дали треба да поседуваат противпожарни апарати во возилата.

- Мислев дека ми треба апарат за противпожарна заштита и си купив на автопазар. Во меѓувреме работев како таксист и апаратот ми стоеше во автомобилот. При контрола на автомобилот полицајците ми пишаа казна бидејќи апаратот што го имав не бил според стандардите, оти беше во пластично шише. Подоцна разбрав дека истите мора да бидат во метални шишиња и да се проверуваат на секои шест месеци - вели Александар Симоновски.

Од МВР велат дека овие апарати не се задолжителна опрема за приватните автомобили со кои не се врши јавен превоз.

МВР потсетува дека од 15 ноември до 15 март задолжително е носење зимска опрема во возилата и работните машини што учествуваат во сообраќајот. Казната за неносење зимска опрема е 500 денари. Според Законот за безбедноста на сообраќајот на патиштата, полицаецот може да му нареди на возачот да го прекине движењето со возилото доколку на патот има сообраќаен знак за задолжително носење и употреба на зимска опрема.

Полицаец може да му нареди на возачот да го прекине движењето и кога не постои сообраќаен знак, доколку зимските услови на патот не овозможуваат непречено и безбедно одвивање на сообраќајот, односно задолжително да ја постави зимската опрема на возилото. Под пропишана зимска опрема се подразбира: пневматици за зимска употреба (М+С) на погонските тркала, пневматици со летен профил чија длабочина на шарата изнесува 4 милиметри, синџири за погонски тркала и лопата за автобусите и за товарните возила.

ИНФО-Задолжителна зимска опрема

Според полициските експерти, елеците, исто како и малите противпожарни апарати, кои исто така не се задолжителни за возачите на приватни автомобили, е корисно да се поседуваат поради безбедноста на возачите. МВР потсетува дека од 15 ноември до 15 март задолжително е носење зимска опрема во возилата што учествуваат во сообраќајот.

Брзото возење по градските сообраќајници, движењето на запрежните коли, непрописно паркирање и казните за сообраќајната некултура од било каков вид, се само дел од темите кои медиумите секојдневно треба да ги третираат и за кои треба да се изнесуваат податоци поткрепени со примери, доколку сакаме да влијаеме на подигање на свеста на граѓаните и намалување на сообраќајните незгоди. Во организација на Републичкиот совет за безбедност на сообраќајот на патиштата (РСБСП), вчера се одржа работилница на која медиумите се запознаа со голем дел од проблемите поврзани со сообраќајот, а кои треба да се актуелизираат во наредниот период.
-Колку почесто се отвора прашањето за културата на однесувањето на пешаците и учесниците на сообраќајот, толку побрзо ќе дојдеме до решение и намалување на бројот на загинати и повредени. Медиумите најчесто известуваат за последиците, иако нашата цел е да се влијае превентивно за да не мора да зборуваме за најлошото. Сметаме дека со "бомбардирањето" на јавноста со примери, казни и состојбата на сообраќајниците, ќе успееме да влијаеме не само на свеста на граѓаните туку и ќе предизвикаме сите надлежни институции да се заложат за решавање на проблемите, изјави вчера Тоше Јанев, портпарол на Републичкиот совет за безбедност во сообраќајот.

Според Љупчо Ставревски од РСБСП, веќе се преземаат низа активности во училиштата, со цел да се делува превентивно и кај најмладите. Во оваа насока веќе наредната недела ќе биде промовирана и националната стратегија за безбедност во собраќајот.
- Доколку правовремено и упорно се пишува за одреден проблем, ќе се спасат многу животи, додава Ставревски.

http://vecer.com.mk/?ItemID=DD78E13D903AF5438692AA4478C067D6