е-Македонија

„Електронски град“ не подразбира само поседување компјутер, туку обединување на сите граѓани преку Интернет и поврзување на сите институции за полесно да се решаваат нивните проблеми, беше истакнато на вчерашната работилница „Е-град“, која се одржа во рамките на проектот „Скопје метропола“.

- Најдобро е ваквата иницијатива да почне токму од градот Скопје - рече Нелко Нелковски, раководителот на проектот.

Претставниците од градскиот сектор за информатички технологии објаснија дека на официјалната интернет-страница www.skopje.gov.mk граѓаните можат да се запознаат со активностите на градската управа, а преку делот наречен „е-сервиси“ можат да ги симнуваат сите потребни формулари и со тоа да заштедат едно доаѓање до шалтерите. Линкот „одговорност преку транспарентност“ служи за скопјани да поставуваат прашања до советниците и до градоначалникот.

Присутните на работилницата побараа да се отворат и електронски форум на кој ќе може да дебатираат младите луѓе, редовен културен информатор, но и да се направат напори информациските технологии да станат достапни до граѓаните што не можат да си дозволат да ги имаат во своите домови.