Ништо не се случува на градилиштето во Аеродром преку ден, каде што треба да се направат 40-катници, но околните жители слушале градежни звуци ноќе. Инвеститорот сé уште ја чека градежната дозвола од општината, од каде што велат дека се правеле само испитувања на земјиштето

Жителите раскажуваат дека слушале како се поместуваат големи кранови и бучава во вечерните часови

Дење се гледаат само огради на градилиштето. Ноќе, пак, може да се видат десетици силни рефлектори, но и по некој кран во движење, како и да се слушнат звуци дека нешто се работи зад оградите. Вака во овој период изгледа градилиштето покрај булеварот Србија, меѓу бензинската пумпа „Макоил“ и првите згради од населбата Аеродром, каде што, според најавите, треба да се направат првите облакодери во Скопје, високи по 40 ката.

Невообичаеното работно време на градилиштето го забележале и околните жители на населбите Аеродром и Лисиче. Тие раскажуваат дека слушале како се поместуваат големи кранови и како се работи нешто, имало бучава во вечерните часови. Но никаде не пријавиле вознемирување. Толку многу се навикнале на градежните звуци додека со години се градеа десетици згради во Реонскиот центар „Аеродром“, што ова воопшто не им пречело.

Помина една година откако Министерството за транспорт и врски му го продаде земјиштето на турски инвеститор. Но сé уште не се гледа ништо од зградите, затоа што не е изградено нешто што би било повисоко од оградата. На влезот откај булеварот, освен предупредувачки натписи дека има градилиште и дека минувачите треба да внимаваат, нема соодветна табла на која би пишувало кој што гради. Турскиот холдинг „Џеваир“ стои зад изградбата, преку компанијата што ја регистрираше во Македонија, „Турк Мак Иншаат Санаји Ве Тиџерет ЛТД“. Неговиот сопственик Ибраим Џеваир лани рече дека ќе направат згради какви што досега не биле видени во Скопје и во Македонија. Не даде детали за изгледот, само кажа дека прво ќе го утврделе просторот за паркирање, па потоа ќе одлучеле колку ката да изградат. Оваа компанија има неколку хотели со пет ѕвезди во Турција, потоа фабрики и трговски центри во Истанбул, но и објекти во Либан и во Саудиска Арабија. холдингот постои 60 години и има 12 фирми.

Но никој оттаму не одговара на прашањата зошто се работи само ноќе. На самото градилиште не сакаа ниту да разговараат со медиумите, побараа контакт за да ни се јават откако ќе се консултирале со раководството, и разговорот заврши со тоа. Ниту во општината Аеродром немаат некое подетално објаснување.

- Во тек е геомеханичко испитување на земјиштето. Откако ќе добијат одобрение за градба, чија постапка е почната, може да започнат со градење - објаснуваат од одделението за односи со јавноста при општина Аеродром.

Од локалната самоуправа велат дека во интерес на самиот инвеститор е да ја заврши градбата што побрзо, при што самиот одлучува за динамиката на градење, односно дали ќе ги гради сите објекти одеднаш или една по една зграда. На некогаш трите стокатници денес во урбанистичкиот план предвидени се четири 40-катници, поточно објекти што не може да се пониски од 33 ката, или повисоки од 125 ката.

Како што објаснуваат од Министерството за транспорт и врски, основната намена на објектите е домување, но покрај нив ќе има и комерцијални објекти, деловни простории, верски институции, објекти наменети за културни случувања или за спорт и рекреација. Како што посочуваат од Министерството, најповолниот понудувач на тендерот за градба во овој период работи на прибавување на одобренијата за градба, а според најавите тој треба во рок од шест години целосно да го заврши објектот.
Сепак, не успеавме да добиеме одговор зошто и по една година не се почнати градежните активности на терен. И покрај инсистирањето да стапиме во контакт со турската компанија, сопствениците останаа глуви на нашето барање.

- Доколку објектот не се изгради во определениот рок, најповолниот понудувач ќе исплаќа договорена казна во висина од 2 отсто од купопродажната цена на земјиштето за секој изминат месец. Но тоа може да го практикува две години по истекот на рокот од 6 години. Доколку и во тој период не се изгради објектот, договорот ќе биде раскинат и земјиштето ќе и биде вратено во сопственост на Република Македонија - додаваат од Министерството.