Sky City (Џеваир облакодери и трговски центар)

Државата бара инвеститор што ќе изгради три 125-катници во Аеродром позади бензинската пумпа на „Макоил“ и еден заинтересиран за изградба на 14 згради во населбата Лисиче, зад бензинската на „Макпетрол“. И облакодерите и станбените згради ќе се градат на државно земјиште, за кое од Министерството за транспорт и врски вчера, односно денеска ќе распишат објава за продажба.

Локацијата за трите облакодери е со површина од 21.247 квадратни метри со површина за градење од 10.000 квадрати. Се наоѓа зад „Макоил“ во насока на комплексот на касарната „Гоце Делчев“. Квадрат земја ќе се лицитира со почетна цена од 7.000 денари. Според Детаљниот урбанистички план, кој Општина Аеродром го усвои пред повеќе од една година, предвидено е 30 проценти од висококатниците да имаат намена за домување, предвиден е и простор за комерцијални цели и катни гаражи. Од Министерството за транспорт објаснија дека заинтересираниот за изградба на облакодерите ќе треба да понуди минимум изградба на 25 ката, а максимум со ДУП е дозволена 125 катност на објектите. Кој од заинтересираните ќе понуди поголема катност, тој ќе има и најголеми шанси да го купи земјиште.

Дали и кој се' ќе биде заинтересиран да вложи во овој футуристички проект, кој беше идеја и на претходниот градоначалник Кирил Тодоровски, промовирана уште во почетокот на минатата година, ќе се знае во септември. На средината на месецот е закажано јавното наддавање. Јавната објава која од Министерството за транспорт најавија дека ќе ја распишат денеска, освен во домашните медиуми, ќе биде објавена и во „Фајнешнл тајмс“, а задача за информирање во странство за проектот за стокатниците ќе ја имаат и македонските економски промотори.

.....

Од ресорното министерство пресметале дека од продажбата на двете предметни земјишта би се обезбедиле минимум 4,3 милиони евра, а инвестицијата би достигнала до 50 милиони евра.