Radisson Blu Skopje

Градежната парцела од 5000 метри квадратни на улицата Железничка, којашто до неодамна беше запоседната од диви пазарџии и од собирачи на стара хартија, е расчистена и оградена

Почнува изградбата на првиот луксузен хотел од синџирот "Резидор". Градежната парцела од 5000 метри квадратни зад Рамстор, на улицата Железничка, којашто до неодамна беше запоседната од диви пазарџии и од собирачи на стара хартија, се оградува и се подготвува за почеток на градежните работи. Теренот треба да се исчисти и да се изврши геомеханичко испитување на земјиштето, по што ќе следува ископот на темелите.

Од Министерството за транспорт и врски информираат дека инвеститорот ги добил сите потребни документи заедно со дозволата за градба од општина Центар и Град Скопје, но не посочуваат кога ќе почнат конкретните градежни активности бидејќи за тие термини одлучува самиот инвеститор".

Хотелот ќе го гради британската компанија "Резидор Хотел Груп", која минатата година победи на јавното наддавање за оттуѓување на државно градежно земјиште и за 41.905.000 денари стана сопственик на земјиштето. Целата инвестиција чини 45 милиони евра.

Иако официјалниот проект не е јавно презентиран, се најавува дека објектот за хотелот со пет ѕвезди од брендот Радисон ќе има интересно архитектонско решение со 130 соби, 15 претседателски апартмани, десет луксузни апартмани, конференциски и банкет сали, ресторан, бар, фитнес, спа-центар, базен ...

Компанијата "Резидор хотел груп" поседува повеќе од 300 хотели од брендовите "Радисон САС", "Парк ин", "Реген кантри" со 60 илјади оперативни соби во околу 50 држави во светот. Има над 25 илјади вработени, а во хотелите годишно престојуваат над 13 милиони гости.
Влезот на Резидор во Македонија, Владата го најавен како значајна странска инвестиција која директно ќе влијае на економскиот раст на РМ, ќе отвори нови работни места, а ќе ги зголеми и туристичките капацитети во главниот град на земјава.

Аферите го закочија стартот на изградбата на хотелот кај „Рамстор“

Двата големи владини проекта ќе доцнат минимум половина година

Според Детаљниот урбанистички план, трговскиот центар и хотелот треба да се градат непосредно кај „Рамстор“

ДЕСПИНА ТРАЈКОВСКА

Почетокот на изградбата на ексклузивниот хотел и трговскиот центар зад „Рамстор“ и натаму е неизвесен. Купувачите на двете локации „Елан пропертис“, дел од англиската групација „Еквест Балкан пропертис ПЛЦ“, која треба да го гради трговскиот центар и ХЛХ МАК ЛЛП, избраниот инвеститор на хотелот, се' уште го немаат потпишано договорот за отуѓување на градежното земјиште. Од Министерството за транспорт и врски тврдат дека и двете фирми навреме ја уплатиле целата сума за земјиштето, но сепак, договорите не ги потпишале поради наводната незаконска продажба на локацијата за хотелот.

„По пласирањето на сомневањата од страна на СДСМ, Министерството ја достави целокупната документација до релевантните институции тие да дадат свое мислење за постапката. Позитивни мислења добивме од Јавното правобранителство и од Антикорупциската комисија, а се' уште го очекуваме одговорот од Јавното обвинителство. Потоа ќе пристапиме кон склучување на договорите“, велат од Министерството.

Токму непотпишаните договори се пречка купувачите на земјиштата да ја почнат постапката за добивање градежна дозвола што треба да им ја издаде Општина Центар. Од таму потврдуваат дека инвеститорите воопшто не дошле кај нив. Со оглед на ситуацијата, факт е дека конечната реализација на двата проекта ќе доцни минимум половина година. И двете компании досега требаше да ја привршуваат постапката за добивање на одобренијата за градење, согласно со објавата. Имено, по уплаќањето на парите, компаниите требаше да ги потпишат договорите за отуѓување на градежното земјиште и од тогаш, во рок од шест месеци да ја обезбедат градежната дозвола. Две години подоцна им истекува рокот за целосна изградба на планираните објекти.

И двете локации беа понудени на продажба преку лицитации што се одржаа летово. Локацијата за трговскиот центар се продаде уште по првата објава на која имаше шест заинтересирани купувачи. Победи „Елан пропертис“ дел од англиската групација „Еквест Балкан пропертис ПЛЦ“, која понуди 24.800 денари за квадрат, односно за земјиштето од 5.388 квадратни метри на државата и' плати 2,2 милиона евра. Фирмата ХЛХ МАК ЛЛП, пак, стана сопственик на земјиштето за хотелот дури по третиот јавен повик на Министерството. Земјиштето се продаде за вкупно 690.000 евра. Според ДУП, трговски центар и хотелот треба да се градат непосредно до „Рамстор“.