Надградба на Куманово - Табановце

Вицепремиерот и министер за финансии
Зоран Ставрески денеска по повод Денот на независноста, во придружба на
министерот за транспорт и врски Миле Јанакиески го пушти во употреба
автопатот Табановце – Куманово долг 7,6 километри.

Делницата, која е дел од Коридорот 10, се градеше во изминатите
четири години. Вкупната вредност на проектот изнесува 15,5 милиони евра,
а го спроведе Агенцијата за државни патишта во соработка со Светска
банка.

- Станува збор за најзначајната инфраструктурна артерија во нашата
земја – автопат кој не поврзува со север и Европа од една страна,
односно со југ и за македонската економија важното Солунско пристаниште
од друга страна. Ова не е само асфалт, ова е инвестиција која ќе ја
подобри геостратешки добрата позиција на Македонија и нејзината
атрактивност за инвестирање, истакна Ставрески во обраќањето пред
пуштањето на делницата.

Патиштата поврзуваат и развиваат, а Македонија, нагласи
вицепремиерот, конечно го најде својот вистински пат по кој ќе обезбеди
посилен економски развој, подобри услови и животен стандард за своите
граѓани.

Во наредниот период Владата ќе се залага за почеток на изградба на последната делница од Коридорот 10, Демир Капија – Смоквица.

Како што информира министерот Јанакиески, тендерот е распишан на 30
август годинава, а во мај се очекува да почнат градежните работи.

- Приоритет остануваат и работите околу подобрување на регионалната и локалната патна мрежа, напомена Јанакиески.

Директорката на Агенцијата за државни патишта Наташа Валкановска рече
дека е гордост да се биде Македонец во време на напредок, во период
кога се гради и создава, кога се остваруваат капитални проекти.

- Денеска во функција го ставаме новоизградениот автопат од Куманово
до граничниот премин Табановце. Денеска и овој влез во државата добива
нов лик. Беше вистински предизвик да се реализира овој капитален проект
што почна во време на економска криза. Главната траса е со должина од
7,6 километри и широчина од 11 метри во секој правец. Автопатот ќе има
поврзување со две клучки - Табановце и Речица, ќе има повеќе објекти на
патот, а во следниот период ќе се изградат и пристапни патишта во
должина од 600 метри, нагласи Волкановска.

По завршување на Табановце – Куманово, македонскиот автопатски дел од
Коридорот 10 треба да се комплетира уште со делницата Демир Капија –
Смоквица во должина од 28,2 километри за чија изградба Владата обезбеди
270 милиони евра од ЕБРД, Европската инвестициска банка и ЕУ. Изградбата
треба да почне следната година и е предвидено да трае пет до шест
години.

Во Македонија последниве пет години како странски директни инвестиции
влегле 1,8 милијарди евра што е двојно повеќе од странските вложувања
во претходните 10 години. Странските директни инвестиции, како што
подвлече вицепремиерот и министер Ставрески, не значат само влез на свеж
капитал, туку и отворање нови работни места, како и пренесување знаења и
искуства. - На тој начин и македонскиот производ станува поквалитетен и
поконкурентен за извоз. Благодарение на константното вложување во
изградба и модернизација на инфраструктурата набрзо може да се очекуваат
нови инвеститори кои во Македонија ќе градат фабрики и ќе отвораат нови
работни места, рече Ставрески.