Реконструкција на Собранието

Куполите многу скоро над Собранието

Изградбата на трите куполи, дел од „Скопје 2014“, ќе стартува во првото тримесечје од 2011 година

Оливера Војновска


Долгонајавуваните куполи - една голема централна и две странични, наредната година ќе се извишат над реновираното Собрание. Во тревникот пред главниот собраниски влез ќе „дојава“ претседателот на Крушевската Република, Никола Карев. Преку улица, во паркот „Жена-борец“ ќе никнат спомениците на паднатите херои за Македонија, на президиумот на АСНОМ и на основачите на ВМРО. Плоштадот со новиот лик и триумфалната порта дополнително ќе го засили впечатокот на измешани стилови - барок, романтизам, неокласицизам...

Изградбата на трите куполи на собраниската зграда, кои се дел од проектот „Скопје 2014“, според најавите од парламентот, ќе стартува во првото тримесечје од 2011 година. Во собраниската зграда веќе неколку месеци се одвиваат градежни зафати, но седниците и сите други активности во парламентот си течат нормално. Генералниот секретар, Жарко Денковски, посочува дека објектот се зајакнува ламела по ламела, а истовремено се изведува реновирање на внатрешниот дел на петтоаголниот габарит. „Работите напредуваат добро, сега се изведува реконструкција на седмата ламела. Според динамиката, изградбата на куполите ќе стартува наредната година и за неколку месеци тие ќе надвиснат над парламентот“, вели Денковски.

Реконструкцијата на објектот, која опфаќа доградба, надградба од еден кат и адаптација, ја изведува градежната фирма „Бетон“. Проектот предвидува и целосна обнова и освежување на фасадата. Целата реконструкција ќе чини околу 11 милиони евра, ќе опфати три буџетски години и се предвидува комплетно да заврши во март 2012 година.

Со реконструкцијата во Собранието ќе се изградат нови 3.900 квадратни метри и ќе се адаптираат уште 840. Надградбата ќе се изведе над петтоаголниот габарит со површина од 2.140 квадратни метри и над Кристалната сала од 256 квадратни метри. На овој простор се предвидени 88 работни простории и шест сали за комисии, од кои две се покриени со куполи со радиус од четири метри.

Непосредно до салата „Борис Трајковски“ во внатрешниот двор на објектот е предвидена доградба од пет нивоа со вкупна површина од 939 квадратни метри. Предвидени се 31 работна просторија и една повеќенаменска сала од 575 квадратни метри надоврзана на последното ниво на доградбата. Таа е физички поставена на самостојна носива челична конструкција над пленарната сала и покриена со купола со висина од 9,80 метри и дијаметар од 34 метри. Трите куполи ќе се прават со специјално стакло во кружни форми.

Во сутеренскиот дел, под салата „Борис Трајковски“, се предвидува да се адаптира простор за активностите на Собранискиот канал со површина од 233 квадратни метри. Дел од подрумскиот простор од петтоаголниот габарит ќе се пренамени во помошни простории со површина од 600 квадратни метри.

Проектот за изградба на куполи на собраниската зграда партијата на премиерот Никола Груевски почна да го турка уште пред речиси четири години, набрзо по промената на власта во 2006 година. Идејата ја пласираше ексспикерот Љубиша Георгиевски, и наспроти жестоките критики од експертите, сепак, беше протуркана во Собранието како решение за просторните проблеми на пратениците.