ТИРЗ Скопје - Бунарџик

ВО СЛОБОДНАТА ЗОНА ИНТЕНЗИВНО СЕ ГРАДИ

Бунарџик го чека новиот член во семејството

Од „Џонсон контролс“, во „Џонсон Мети“ гледаат и партнер со кој како странски инвеститори во слободната зона ќе можат „погласно“ да ги артикулираат своите заеднички потреби

Во слободната зона Бунарџик деновиве забрзано се подготвува теренот на кој за 15-ина дена ќе се удрат темелите на фабриката за катализатори на британската компанија „Џонсон Мети“. Сликата на „Скопје 1“, како што сега се нарекува Бунарџик, е иста како во времето кога почнуваше изградбата на фабриката за автомобилска опрема на американската компанија „Џонсон контролс“, првиот инвеститор во зоната.Багери, камиони, раздвижени градежни работници работат да го пречекаат новиот инвеститор. „Џонсон Мети“ ќе никне на 50-ина метри спроти „Џонсон контролс“. Инфраструктурата е обезбедена уште пред да дојде првиот инвеститор, а сега се рамни теренот, затоа што секоја компанија пред да почне да гради сака земјиштето да биде на одредена висина - вели Марјан Јованов, директор на Дирекцијата на слободните економски зони. Тој, држејќи го в рака целиот план на зоната, вели дека тука ќе никне индустриски град со големина колку скопските населби Аеродром и Лисиче заедно. На влезот во зоната ќе се гради управна зграда, во која ќе се смести администрацијата, за да биде во непосредна близина на инвеститорите. Ќе има и царински терминал, а во план е да се направи и директно патно поврзување со скопскиот аеродром - додава Јованов.Во „Џонсон контролс“, кој засега е единствениот резидент во Бунарџик, се радуваат што „Џонсон Мети“ им е нов сосед.Ние како прв корисник во зоната практично го пробиваме ледот, а и на Владата и' е ова прво искуство во развивање слободна економска зона. Заедно се соочуваме со извесни проблеми и бараме решенија. Се забележуваат слабости во државниот апарат, неефикасност на администрацијата. Едношалтерскиот систем, на пример, не функционира во катастарот и во други институции во кои се даваат дозволи. Јас како генерален директор морам да одвојувам време да одам од институција до институција за да се заврши определена работа. Но, генерално, носителите на функции во владините институции ни помагаат многу за да се отстранат таквите слабости - вели Аврам Стојчевски, генерален директор на фабриката на „Џонсон контролс“. Компанијата веќе ги минала проверките на клиентите „Рено“, „Пежо“ и „Ситроен“ и по извршената инспекција и успешно пробно производство, почнала со извоз. Според Стојчевски, Владата ја подобрува деловната клима и дел од проблемите се отстранети, но дел треба да се решат. Еден од тие проблеми е што се' уште нема доток на природен гас во зоната, што Владата требаше да го обезбеди уште пред да почне изградбата на фабриката. Директорот на зоната, Јованов, уверува дека гасната инфраструктура е изградена.Се чека само да се изврши технички прием, што ќе се случи во идната недела и ве уверувам дека природниот гас ќе може да се користи - тврди тој.Од „Џонсон контролс“, во „Џонсон Мети“ гледаат и партнер со кој како странски инвеститори во слободната зона ќе можат „погласно“ да ги артикулираат своите заеднички потреби во делот што зависи од функционирањето на државниот апарат.

- Менаџерите на „Џонсон Мети“ дојдоа кај нас и ние ги охрабривме и им пренесовме позитивно искуство. Ние се радуваме што повеќе инвеститори да дојдат во зоната, зашто тоа ќе поттикне сите проблеми да се решаваат, побрзо да се заврши зацртаниот план на зоната, административната зграда и слично. Сега сме во преговори со Царината за да се обезбеди посебна постапка за корисниците во слободната зона, за да може испораката да тече според нашата зацртана динамика. Како што знаете, за да влезе „Џонсон контролс“ во Македонија, еден од главните услови беше таканаречената навремена испорака. Тоа подразбира проширени гранични премини, едноставна постапка за царинење и слично.Владата ја подобрува деловната клима и дел од проблемите се отстранети, но дел треба да се решат. Таквите „породилни“ маки, се надевам, брзо ќе поминат - верува Стојчевски.

„Јорк“ и „Варта“ во сопственост на „Џонсон контролс“

Американската „Џонсон контролс“ продава целосен ентериер за автомобилите, од контролна табла, електроника, седишта, ремени и клими. За да обезбеди сопствено производство на клима-уреди, компанијата преку преземање стана сопственик на светскиот гигант „Јорк“. За производство на електронските уреди и батерии, „Џонсон контролс“ ја купи и најпознатата германска фабрика за батерии „Варта“.„Џонсон Мети“, пак, е светски лидер во производството на катализатори за автомобили.

Dnevnik

Ида Протугер

„Џонсон Мети“ го одлага стартот на изградбатa

Колин Џефри

Британската компанија „Џонсон Мети“ го одлага стартот на изградбата на фабриката за катализатори. Се уште се во преговори со Владата за земјиштето во Бунарџик. Очекуваат за две недели да се потпише договорот.

„Она што го кажувам на администрацијата и Владата во Македонија е дека ние, „Џонсон Мети“, не сме политичка организација, така што во секој случај даваме донации на сите политички партии“, рече Колин Џефри, регионален директор на „Џонсон Мети“.

„Она што ние го вреднуваме е стабилноста, транспарентноста и визијата. На крајот на краиштата, она што очекувам да го потпишам во следните две недели е за 100 години“, вели Џефри.

Работиме со администрацијата која во моментот е на власт, а доколку во јуни дојде до смена, ќе продолжиме да работиме со новата Влада, изјави Џефри. Зошто толку се одлага стартот на инвестицијата?

„Всушност, ова не претставува прашање за добредојде. Можете да видите позади дека исчистивме 7,8 хектара земјиште, ги назначивме „Пера констракшн“ и исто така издвоивме 55 милиона евра“, рече Џефри.

Директорот за стратешко планирање на „Џонсон Мети“, Џефри, потенцираше дека не очекува повторно да преговара за истиот проект.

„Џонсон Мети“ планира да почне со производство во мај догодина. Во Бунарџик ќе произведува делови за автомобили кои ќе ги извезува во ЕУ.

Британската компанија има годишен приход од 12 милијарди долари и е еден од најголемите инвеститори во Македонија.