“Бетон“ ќе добие од владата речиси 109 милиони денари (1,77 милиони евра) за изградба на декоративни елементи на фасадата на објектот на новата зграда на Министерството за надворешни работи, како што објави компанијата во известувањето испратено до Македонската берза.

Ако декоративните елементи на фасадата чинат 1,77 милиони евра, тогаш којзнае колку чини целата фасада. Исто така, нејасна е вкупната цена на целата зграда за која се вртат две бројки: 13,5 милиони евра и 16 милиони евра.

Како и да е, станува збор за зграда од 13.500 метри квадратни, на која само барокните рељефи на фасадата чинат 1,77 милиони евра, односно меѓу 11 и 13 отсто од вредноста на целата зграда. Тешко дека има зграда во чија цена на чинење декорацијата на фасадата влегува со толкав голем процент. Ова со една резерва. Ваквата сума за рељефните декорации може да биде реална ако тие вклучуваат уште еден споменик пред новата зграда на МНР. Но, за такво нешто не сме чуле.

Инаку „Бетон“ е најомилената фрима на Владата кога станува збор за проектот „Скопје 2014“ и овие пари се само капка од океанот на десетици милиони евра што компанијата ќе ги прокнижи на своја сметка, градејќи за државата.

Само во период од две недели од крајот на мај до првата половина на јуни, компанијата склучи 4 договори во износ од 25,84 милиони евра токму за објекти од „Скопје 2014.“

И тоа ова не е се. „Бетон“, исто така, во мај доби зделка од 2,1 милиони евра за изградба на ново училиште во скопската населба Аеродром.

Севкупно, тоа се 29,73 милиони евра само за овие 6 договори од 23 мај до 20 јули, значи за неполни 2 месеци.

Тоа е одлично за фирма која во првиот квартал од годинава имаше приходи од само 7,3 милиони евра и добивка од само 233 илјади евра. За очекување е резултатите од вториот квартал од годинава да бидат драматично подобри и приходите да се зголемат минимум за 4 пати.

Компанијата, инаку, продолжува со откупување на сопствените акции. „Бетон“ денес објави дека ќе купи 400 сопствени акции по цена од 7.300 денари или вкупно за 2,92 милиони денари (47,5 илјади евра). Според одлуката на акционерското собрание компанијата може да откупи 5.456 сопствени акции или 10 отсто од вкупниот број.

Со ваквата мерка, како и со сите овие зделки кои ќе донесат одлични профити, може со голема сигурност да се очекува дека цената на акциите на „Бетон“ ќе оди само нагоре. Барем краткорочно, додека трае „Скопје 2014.“ За после ќе видиме.

Пред да почнат да течат парите од „Скопје 2014, „Бетон“ не беше во толку добра состојба. Приходите во првиот квартал лани изнесуваа само 5,76 милиони евра, наспроти 7,3 милиони евра во првиот квартал годинава.

http://www.plusinfo.mk/vest/8899/Reljefite-na-zgradata-na-MNR-chinat-177-mln-evra-a-celiot-objekt-16-milioni-Vi-se-veruva