Концесија на автопатишта

Нема интерес за државните патишта со патарини

Пет меѓународни конзорциуми имаат рок уште петнаесетина дена да достават финансиски понуди

Сања Наумовска



Петнаесетина дена пред истекот на рокот од тендерот за избор на концесионер на државните патишта на кој има патарини, до Министерството за транспорт и врски се' уште не стигнала ниту една понуда. Крајниот рок од втората фаза на меѓународниот јавен оглас за доставување барања за изградба, реконструкција, одржување, наплата на патарини и користење на дел од државните патишта завршува на 26 април. До тој датум, петте меѓународни конзорциуми, кои по шест неуспешни обиди, во ноември минатата година, конечно, ја поминаа фазата на претквалификација, ќе треба да ги обелоденат своите конкретни финансиски понуди. Меѓу петте компании од Израел, Франција, Австрија и од Грција, Владата ќе избира два концесионера, на кои во следните 35 години ќе им ги понуди на стопанисување повеќе патни правци од Коридорот 8, поделени во два пакета.

Во Министерството за транспорт и врски информираат дека се' уште ги очекуваат понудите од конзорциумите „Шиком бинуи“ од Израел, француските „Буик траво“, како и австрискиот „Штрабаг“, во чиј конзорциум влегува и „Гранит“, единствената домашна градежна компанија што ја помина фазата на претквалификација. Во трката влегуваат и грчкиот конзорциум „Актори акто консешнс“, како и австриската „Алпине бау“. Кој ќе ги добие македонските патишта во следните 35 години, ќе зависи најмногу од висината на концесискиот надомест што ќе и' го понуди на државата, но и од субвенциите што ќе ги бара поради слабата фреквентност на домашните патишта. „Концесионерот ќе треба економскиот интерес првенствено да го бара во наплатувањето патарина, чија висина ќе ја утврдува државата. Изградбата на делниците што влегуваат во концесиските пакети до ниво на автопат ќе мора да биде завршена во рок од 7 години од склучувањето на договорот за концесија“, информираат од транспорт и врски.

Во првиот пакет, со вкупна должина од 138 километри, влегуваат патните правци Крива Паланка – Романовце, Кочани – Штип, Миладиновце – Штип, како и патната делница Миладиновце - Штип преку Свети Николе. Во овој пакет се вклучени и патните правци Миладиновце – Скопје – Хиподром и обиколницата околу Скопје со должина од 38 километри. Во вториот пакет, под концесија се нудат Стенковец – Блаце, Гостивар – Ќафасан, Требениште – Охрид, Струга –Подмоље, патната делница Гостивар – Букојчани – Кичево, Кичево – Требениште, Требениште – Охрид, Требениште – Струга, Струга – Ќафасан и Струга – Подмоље со вкупна должина од 141 километар. Во вториот пакет влегува и веќе изградениот автопат Скопје – Тетово – Гостивар со должина од 54 километри.

Повторно одложен рокот за концесија на автопатиштата

Александра Спасевска

Владата уште еднаш го одложи рокот за концесија на автопатиштата. Иако петте конзорциуми кои влегоа во трката за двата пакети автопатишта од Коридорот 8, по првото одложување од три месеци требаше понудите да ги достават за десетина дена, Владата во последен момент донесе одлука за повторно одложување на рокот. Но, додека минатиот пат причината за одложување на роковите, според објаснувањето од Министерството за транспорт и врски, беше предизборната програма која се поклопуваше со распишувањето на тендерот, овојпат од Министерството не даваат објаснување на што се должи повторното пролонгирање на роковите.

“Владата донесе одлука со која се овозможува продолжување на рокот за доставување на понудите во втора фаза. Со донесената одлука, првичниот рок се продолжува за 50 денови. Согласно со одлуката, рокот за доставување на понуди сега е 13 септември“, информираат од Министерството за транспорт и врски. Оттаму не добивме одговор дали досега некој од петте конзорциуми имаат доставено понуда, ниту, пак, на што се должи одложувањето или, пак, дали е можно целата постапка за концесија на автопатишта да биде прекината.Од друга страна, пак, дел од конзорциумите веќе се во завршна фаза со изготвување на понудите. Велат дека се подготвени за тендерот и веќе прават калкулации, и не очекуваат рокот повторно да биде одложен.

Финансиската кондиција на конзорциумите најважен услов во трката за избор

Страшо Милковски, генералниот директор на градежната компанија Гранит, која заедно со австриски Штрабаг се пријавија да учествуваат на тендерот вели дека изборот ќе биде многу тесен и дека сите конзорциуми кои се пријавени се големи компании, кои имаат капацитет да извршат толку обемна работа. Според него, финансиската кондиција и поддршката од банките ќе биде главниот услов што ќе решава кој ќе победи на тендерот.

“Нашата понуда се подготвува во Австрија кај нашиот партнер Штрабаг. Ние ги доставивме сите потребни податоци и документи. Понудата ќе ја доставиме до Министерството за транспорт и врски во предвидениот рок“, објаснува Милковски за “Капитал“.Според него, сите пет конзорциуми кои се во трка за концесионирање на автопатиштата се сериозни конкурентни и големи компании, но не е само понудата на најниска цена важна за да се добие тендерот.

“Многу се важни финансиските услови кои треба да ги исполнуваат конзорциумите, како што се обезбедување на банкарски гаранции, висината на концесијата којашто ќе ја понудат, како и финансиската способност и кондиција на самите компании. Овие услови се главни кои ќе бидат одлучувачки при избор на концесионер. С$ уште е неизвесно и не би можел да претпоставувам кој ќе има најдобра понуда“, објаснува Милковски.

Концесискиот надомест главен услов за Владата

Во втората фаза од проектот за концесија влегоа пет конзорциуми меѓу кои израелската компанија Шиком Бинуи во соработка со Групо Суарез де Коста од Португалија, конзорциумот предводен од француската компанија Буик Траво со ДТП Терасмент од Франција и Интертол Јуроп од Унгарија, конзорциум составен од австриската компанија Штрабах со домашната компанија Гранит. Следуваат конзорциумот од грчката компанија Актори акто консешнс и конзорциумот предводен од Алпине бау ГМБХ од Австрија со турска Лимак и Сома ентерпрајз од Индија.

Првиот рок до кој конзорциумите требаше да ги достават своите понуди беше 26 април, а по дополнителните 90 дена конзорциумите требаше да ги достават понудите на 25 овој месец. Сега рокот е пролонгиран до 19 септември.Како главен услов кој ќе биде одлучувачки за Владата е концесискиот надомест што треба да го добива државата, но и од субвенциите што ќе ги бараат поради недоволната фреквентност на македонските патишта.

ЌЕ ИМА ЛИ НОВО ПРОЛОНГИРАЊЕ?

За помалку од еден месец ќе се знаат финалистите за концесионер на патиштата

За помалку од еден месец истекува рокот за доставување на понудите од страна на петте конзорциуми, кои учествуваат во втората фаза на тендерот за избор на концесионер за патиштата од Коридорот 8. Не се најавува ново пролонгирање на рокот и во Министерството за транспорт и врски очекуваат на 13 септември да бидат доставени понудите од петте конзорциуми, по што ќе бидат познати финалистите за добивање на овој проект вреден околу една милијарда евра.

Како што веќе е познато, понуди се очекуваат од конзорциумот на чело со израелската компанија Shikun & Binui LTD, а заедно со Grupo Suares De Costa SGPS и SA од Португалија, потоа конзорциумот предводен од француската Bouyques Travoux Publics, која е заедно со исто така француски DTP Terrassement и унгарски Inter-Toll Europe. Следи австриски конзорциум во кој е домашната компанија "Гранит", а тука е и конзорциумот на две грчки компании: Aktor SA и Aktor Aktor Consessions, додека како петти е конзорциумот ALS Motorway Consession Macedonia, во чиј состав се: австриската компанија Alpine Bau GmbH, турската Limak Insaat Sanayi ve Ticaret AS и индиската Soma Enerprise Limited.

Владата пролетва го продолжи рокот за доставување на понудите во втора фаза со образложение дека според Законот за спречување на корупција, во период на избори и техничка влада не е дозволено оттуѓување или издавање на државен капитал.
Под концесија се даваат дел од автопатските делници по должина на Коридорот 8, поделени во два пакета. Со првиот пакет, или Источната концесија, се опфатени патишта во должина од 177,5 километри и со вредност од 434 милиони евра, а ги сочинуваат патните правци: Крива Паланка - Романовце, Кочани - Штип, Миладиновци - Штип, обиколницата на Скопје и постоечката делница Миладиновци - Скопје. Додека во вториот пакет, или Западната концесија, се патните делници: Стенковец - Блаце, Гостивар - Ќафасан, Требеништа - Охрид и Подмоље - Струга, со вкупна должина од 196 километри, а во вкупна вредност од околу 558 милиони евра. Концесијата се доделува во времетраење од 35 години, а изградбата на патните правци концесионерот ќе треба да ја реализира за седум години, државата останува сопственик на патиштата и во текот на траењето на концесијата.

Јанакиески очекува Коридорот 8 да отиде под концесија до крајот на месецов

Mинистерот за транспорт и врски Миле Јанакиески информира дека во тек е постапка за концесија на патиштата, која, како што рече, најмногу го опфаќа Коридорот 8.

- Очекувам кон крајот на овој месец да ги добиеме финансиските понуди од концесионерите. Доколку тие не се прифатливи, Владата има став да продолжи со изнаоѓање на најповолни финансиски модели за да се финансира Коридорот 8, рече Јанакиески.

Во делот на Коридорот 10, во железницата, тој рече дека веќе има обезбедено средства од Европската банка за реконструкција за подобрување на инфраструктурата. Според него, со тоа ќе се зголеми просечната брзина за околу 40 километри на час.

- За Коридорот 8 веќе сме во една понапредна фаза со ЕБРД и очекувам во 2013 година, согласно нашата програма и со добрата соработка дека ќе почнеме со изградба на железничкиот правец од Бељаковце до границата со Бугарија, рече Јанакиески.

Тој нагласи дека урбанизацијата на населените места во Република Македонија и изградбата на инфраструктурата се од суштинско значење за граѓаните затоа што го подобруваат животниот стандард и обезбедуваат подобри услови за економски раст на сите општини и на целата држава.

- Ние во соработка со општините активно работиме на што поголема урбанизација на населените места, рече Јанакиески.