Вагони

Кожени седишта и гратис кафе и во нашите возови

Засега има три обновени вагони, а до крајот на годината уште седум вагони. Еден од нив е спална кола, која секоја вечер патува за Белград

Сања Наумовска

Удобни црвени кожени седишта и послуга со бесплатно кафе и вода. Патниците во македонските возови почнаа да уживаат во благодати на кои не се навикнати. Згора на тоа, сега во вагоните е чисто, прозорците не се заглавени, а тоалетите функционираат. Сликата не е од некој европски воз, туку од обновените вагони на „Македонски железници“.

„Конечно, пристојни услови за патување, да ти е мерак да седнеш и да се возиш“, коментираат граѓаните. Задоволни се и вработените во „Железници“, кои забележуваат дека патниците со внимание се однесуваат кон обновениот инвентар во возот.

„Редовно патувам со воз за Скопје веќе неколку години, бидејќи цената на билетот им одговара на моите можности. Сепак, можам да кажам дека пред реконструкцијата на вагоните не бев задоволен од хигиената. Сега состојбата е многу променета и условите за патување се одлични, а вработените се љубезни“, вели Дејан, студент од Битола. За него не претставува проблем да доплати стотина денари повеќе и да си резервира место во еден од трите обновени вагони на „Македонски железници“, кои секојдневно сообраќаат на релацијата Скопје - Битола. Седиштата се нумерирани, па секој си го знае местото. Патувањето не трае повеќе од три часа, бидејќи возот застанува накратко само на три попатни станици.

„Патувањето со воз станува навистина пријатно во последно време“, вели пензионерот Ангел, кој заедно со својата сопруга често патува кон Битола, во посета на роднините. „Откако од ’Железници‘ ја нудат можноста за резервација во новите вагони, редовно ја користиме. Почисто е, седиштата се поудобни, а со кафенце и читање весник времето побрзо поминува“, вели тој.

Моментно има три обновени вагони, во кои секојдневно уживаат домашните патници. Еден од нив е спална кола, која секоја вечер патува за Белград. Летово, во неа ќе се превезуваат нашите туристи кон приморските центри Бургас во Бугарија и Бар во Црна Гора. До крајот на годината ќе бидат реконструирани вкупно седум вагони во велешката фабрика „Колска“. Планирано е, најавуваат од „Македонски железници - Транспорт“, во следните неколку години да се обноват вкупно 30 стари вагони, од кои дел ќе имаат и де лукс услови. Ќе бидат климатизирани и опремени со модерни вакуум-тоалети и адаптирани за пристап на лица со посебни потреби.

„Грдата слика од крш возови од старите, валкани, распаднати и испокршени возови, полека, но сигурно ќе заминуваат во историјата. Иако се стари по неколку децении, вака обновени вагоните и локомотивите на патниците ќе им понудат попристоен превоз“, велат во „Железници“.

Стандардната реконструкција ќе ја чини „Македонски железници“ од 70.000 до 100.000 евра за еден вагон, односно 300.000 евра за де лукс опремените возила. Тоа е неколкупати помалку од сумата потребна за купување нови модерни вагони. На европските пазари тие чинат околу 1 милион евра, а во план е во 2015 година да се набават и неколку нови патнички вагони.