12 August 2011

Едни од пофреквентните улици во Битола, “Едвард Кардељ“ и “Никола Тесла“, деновиве се целосно реконструирани со нов асфалт и сега имаат нов лик. 

Улицата “Едвард Кардељ“ до улицата “Прилепска“ има  целосно нов асфалт во должина од 450 метри и широчина од 12 метри. Инвестицијата изнесува 8,5 милиони денари. Реконструкцијата е дел од програмата  што Советот на Општината Битола ја донесе за оваа година. 

Направени сите подземни инсталации, а на вториот дел од улицата “Иван Милутиновиќ“ до улицата “Прилепска“ се врши интервенција на зелените површини кои ќе добијат нови ивичници и нов хортикултурен лик во соработка со Јавното претпријатие “Комуналец“.

Жителите од улицата “Едвард Кардељ“ и од месната заедница “Тодор Ангелевски“ не можеа да го сокријат задоволството што ќе се движат и ќе возат по комплетно нов асфалт и средена улица.

Реконструкцијата на една од најфреквентните улици во градот “Никола Тесла“ непланирано се оддолжи поради многуте непредвидени проблеми и сложената интервенција, информираа надлежните.  Од почетокот до самиот крај на оваа улица се промени одводната канализација, атмосферската и фекалната, потоа се направи промена на водоводната мрежа и целокупната процедура се измени поради промената на проектот.

Деновиве е завршено асфалтирањето од потегот кај крстосницата кај “Гроздот“ па се Руска црква. Денес и утре се очекува да се работи од Руска црква па се до крстосницата кај кафулето “Триангл“.

Потоа се преминува да се реконтруира од “Гроздот“ па се Стопанска банка, а потоа до Уредот. На трите крстосници се планирани и три кружните текови со што ќе се олесни движењето на автомобилите во централното подрачје на Битола.

Напоредно екипи на КЈП “Нискоградба“ работат на поставување на канали за вода и одвод на улицата “Довлеџик“ која треба според планот да добие булеварски влез.

Советот на Општина Битола на последната седница која се одржа вчера усвои нова сообраќајна студија за градот во која е содржана оперативната програма за определување начинот и условите на паркирање, времетраењето на паркирање, односно негово ограничување, како и начинот на означување на ограничувањето на отворените јавни паркиралишта или зонско паркирање.

Сообраќајната студија е изработена од  стручни лица на Техничкиот факултет-Битола под водство на професорката Кристи Бомбол. Во студијата понудени се идејни решенија за паркиралиштата во градот, товарниот сообраќај, најфреквентните крстосници, решенија за јавниот градски превоз, како и влијанието на сообраќајот врз животната средина.

- Ќе изградиме неколку кружни текови, еден голем кружен тек со повеќе сообраќајни ленти и други сообраќајни проекти на најфреквентните места во градот. Студијата ќе се реализира во пет фази, предвидена е изградба на пешачки и велосипедски патеки, како и други функционални решенија за подобар сообраќаен режим, истакна градоначалникот Владимир Талески.

Новата сообраќајна студија за сообраќајот во општина Битола беше изработувана една година и е на повеќе од 1.000 страници.

02 September 2011

Локалната самоуправа на Битола продолжува со градежната офанзива за реконструкција и ревитализација на локалната патна мрежа.

По  изградбата на неколкуте клучни улици во градот, деновиве беше означен почетокот на работите за целосна и темелна реконструкција на улицата “Цар Самоил“ во должина од над 1.300 метри.

Според планот, на улицата “Цар Самоил“ комплетно ќе биде сменета водоводната мрежа  и  надземната инфраструктура.

За смената на водоводната мрежа ќе бидат потрошени над 3 милиони денари, а за останатите работи на овој проект ќе бидат потрошени вкупно 17 милиони денари средства на локалната самоуправа.

Кога комплетно ќе биде завршена  улицата “Цар Самоил“ ќе биде  поврзана со  улицата од кај Саат кулата и “ Пецо Божиновски“, која претходно целосно беше реновирана  и асфалтирана.

-Со  темелната реконструкција на улицата “Цар Самоил“ локалната самоуправа продолжува со реализацијата на инфраструктурните проекти во градот. Оваа  е многу важна и доста фреквентна улица, која се наоѓа во централното градско подрачје. Истата ја реконструираме на барање на граѓаните и локалното население кое живее на оваа улица, а за нејзината реконструкција доста инсистираа и таксистите, кои во голем број се движат по улицата, изјави на пресот специјално свикан  по повод почнувањето на работите на улицата градоначалникот на Битола, Владимир Талески.

Тој притоа нагласи дека улицата “ Цар Самоил“ ќе биде изградена најмногу за 1,5 месец, а вкупната вредност на проектот ќе изнесува околу 20 милиони денари.

По завршувањето на реконструкцијата на “Цар Самоил“, градежните работи ќе продолжат во горниот дел на “Пецо Божиновски“ и “Партизанска“ се до Стрчин.