Иако жичницата на Водно е еден од најомилените објекти на скопјани, нејзината траса годинава нема да се продолжи до Капиштец и до Козле, како што првично беше планирано, бидејќи за тоа не се предвидени пари во буџетот.

Дознаваме дека изградбата на втората и третата секција што требаше да поминуваат од институтот за белодробни заболувања „Козле“ до Средно Водно и од црквата „Свети Јован Крстител“ во населбата Капиштец до институтот за белодробни заболувања ќе биде замрзната или, пак, воопшто нема да продолжат да се градат. Од Министерството за транспорт и врски немаат одговор за доградбата на другите секции од жичницата, но според предвидениот буџет за годинава не се предвидени пари за таа намена. За скопјани, пак, изградбата на жичницата придонела многу Водно да стане посетувано, но и просторот кај Милениумскиот крст да се уреди.

- Без оглед на тоа што повеќе од 20 пати со семејството сме се возеле со жичницата, не ни е досадно, ниту на нас постарите, ниту на децата. Мислам дека најмногу се радуваат кога ќе се договориме да одиме на Водно, особено убаво беше за празниците кога имаше навеано и снег. Се надевам дека надлежните нема да се откажат од идејата да се изгради целата траса на жичницата, како што беше планирано - вели Трајче Богоевски.
Единствен проблем што скопјани го имаат со жичницата на Водно е недостигот од паркиралишта. Тие велат дека секој со секого се кара и, според нив, еден автобус е премалку за да ги превезува патниците до Водно.
Мишо Николов, директорот на јавното сообраќајно претпријатие „Скопје“, кое стопанисува со жичницата, вели дека идејата за изградба на втората и на третата секција на жичницата сé уште постои, но тој не знае дали Министерството има план оваа година да ја доврши изградбата на преостанатите фази од жичницата.

- Ние имаме направено анализа од која произлегоа многу позитивни резултати. Луѓето навистина ја сакаат жичницата, и по муабети што сум ги слушнал од граѓаните, но и по тоа што ни оставаат позитивни критики на интернет-страницата. Во првите десет дена од годинава имаме продадено осум илјади билети, без оние субвенционираните, додека, пак, од почетокот на нејзината работа во јуни минатата година до крајот на 2011-та се продадени вкупно 120 илјади карти. Мислам дека тоа не е малку - објасни Николов.
Изградбата на овие две секции беше предвидена со потпишувањето на договорот на австриската компанија „Допелмаер“.