Подземно греење, нова дренажа и нов зелен тепих на „Филип Втори“

Првпат во историјата Македонија ќе има терен со подземно греење, а во целосната реконструкција на теренот на националната арена ќе бидат поставени нов систем за дренажа и сосема нова трева, како и нови атлетски патеки и цел комплекс на борилишта за врвни атлетски митинзи

Теренот на „Филип Втори“ ќе биде целосно реконструиран (како на фотографијата)

Македонија конечно ќе добие модерен фудбалски терен со подземно греење, нов систем на дренажа, над кој ќе биде послан сосема нов тревен тепих според стандардите на Светската фудбалска асоцијација (ФИФА). Ова го содржи проектот на изведувачот „Бетон“, кој е задолжен за новото руво со кое ќе биде „преоблечен“ теренот на нашата национална арена, со што првпат во историјата ќе добиеме и терен што ќе има сопствено подземно греење. Покрај ова, од идната година на „Филип Втори“ ќе има и сосема нова атлетска патека со осум ленти, а ќе бидат изградени и сите потребни борилишта за атлетските дисциплини за да може на националната арена да се одржуваат и врвни атлетски митинзи.

Работите на теренот ќе се одвиваат во следните четири месеци, по што Македонија конечно ќе може повторно да се гордее со квалитетен фудбалски терен, кој беше синоним за „Градски“ во осумдесеттите и деведесеттите години од минатиот век. Реконструкцијата ќе биде во неколку фази, а ќе се почне со отстранување на целосната подлога и застарената дренажа што сега ја има теренот на „Филип Втори“, по што ќе следува поставувањето на новите слоеви.

- Прво ќе биде поставен хидроизолатор, глина со соодветна влажност, а врз неа ќе се инсталира дренажен систем на цевки, кои ќе служат за излевање на атмосферската вода и за задржување на квалитетот на тревната подлога. Следниот слој ќе биде систем на цевки за греење, кој ќе биде поврзан со сопствена котларница, специјално изградена за потребите на теренот. Котларницата, која ќе се состои од два електрични котли со вкупен капацитет од 1.200 киловати, ќе биде сместена во поттрибинскиот простор на источната трибина - објаснува архитектката Виолета Гишева, која е раководител на изградбата на теренот.

Овој комплексен состав, кој ќе почнува од длабочина од еден метар и 10 сантиметри, ќе заврши со последниот слој во кој ќе бидат бусените трева, кои според поставувањето на системот би требало да бидат природни. Теренот ќе биде со димензии 68 на 105 метри, слично како и досегашната површина. Можно е мало, но незначајно поместување кон северната трибина поради поставување на патеката за скок со стап покрај јужната трибина. Дополнително на ова ќе биде поставен и сосема нов систем за наводнување на теренот со мрежа од прскалки што ќе бидат поставени во теренот, идентично како на сите врвни стадиони низ Европа.

Во исто време ќе се работи и на поставувањето на новата атлетска патека со осум ленти, на местото на досегашните шест. Дополнително, ќе бидат направени и сите атлетски борилишта, како за скок во далечина, трискок, скок во височина, скок со стап, фрлање копје, диск и кладиво, а ќе се направи и таканаречената „водена пречка“ за трките во стиплчес.

- Сите овие борилишта ќе бидат сместени во просторот зад головите, единствено патеката за скок со стап ќе биде покрај јужната трибина. Борилиштата се според сите светски стандарди и на нив ќе може да се одржуваат најразлични митинзи и атлетски натпревари - вели Гишева.

Доколку работите одат со предвиденото темпо, честа да му направат сефте на новиот терен ќе ја имаат фудбалските прволигаши Вардар и Тетекс, кои ќе се сретнат во првото пролетно коло од Првата лига, на 3 март.

Модерна стаклена фасада за комплетен шмек

Последниот дел од проектот за изградба на „Филип Втори“ ќе биде поставувањето нова стаклена фасада, со која националната арена ќе светне во полн сјај.
- Поставувањето на новата трева и атлетските борилишта не е последниот дел од проектот, кој би бил комплетиран со поставувањето нова фасада. Таа треба да биде составена од стакло и од алуминиум и ќе му го даде вистинскиот лик на стадионот. Но фасадата нема да се работи во овој период, туку ќе биде дополнително направена, во некоја следна фаза - вели архитектката Виолета Гишева, која е раководител на изградбата на стадионот.

Старата трева за помошните игралишта

Старата трева од теренот на „Филип Втори“ е предвидено да биде искористена за помошните игралишта што се наоѓаат околу стадионот.
Ова ќе биде добредојдено за фудбалерите на Вардар, кои своите тренинзи во текот на сезоната ги одржуваат токму на овие терени, кои се премногу оштетени и на места речиси и немаат тревна подлога.