Проширувањето на Илинденска ќе заглави кај приватното земјиште

Деновиве се работи на потег од 280 метри, од крстосницата со булеварот 8 Септември до блиската бензинска станица на „Макпетрол“, каде што сé е празно и нема никакви пречки. Засега нема конкретен одговор дали тука ќе завршува широката Илинденска

Од градот велат дека сопствениците на земјиштето барале нереални цени

Реконструкцијата и проширувањето на третата делница од булеварот Илинден, која треба да биде покрај терените на фудбалскиот клуб „Локомотива“, ресторанот „Имес“, неколку складишта и автосалони може да почекаат и неколку години. Причина за ова е тоа што на таа локација има приватни сопственици на земјиштето што барале многу голема отштета за да и ги препуштат своите локации на градската управа. Деновиве градските власти продолжија да го прошируваат овој значаен булевар, но само на потег од 280 метри, од крстосницата со булеварот 8 Септември до блиската бензинска станица на „Макпетрол“, каде што сé е празно и нема никакви пречки. Засега нема конкретен одговор дали тука ќе завршува широката Илинденска.

- Реконструирањето и проширувањето на булеварот Илинден на потегот до Карпош 4 во голема мера зависат од решавањето на имотноправните проблеми со приватните сопственици на земјиштето. Нашите служби забрзано работат и се во постојани преговори со нив, но некои бараат отштета поголема од реалната вредност на земјиштето. Не знаеме ниту кога ќе почнат, а уште помалку кога ќе завршат реконструкцијата и проширувањето на Илинденска на овој потег - објаснија градските власти. 

Првата делница од реконструкцијата и проширувањето на булеварот Илинден во делот од крстосницата со булеварот Свети Климент Охридски до 8 Септември, започна лани и заврши за седум месеци. Иако рокот беше пробиен, поради проблеми со преместувањето на подземните инсталации, се сметаше за најпроблематична. Постојано се поставуваа прашањата дали ќе има доволно место за четири ленти, како ќе реагираат граѓаните и локалните жители и слично. Но се чини дека тие тешкотии беа многу полесно надминати отколку овие што следуваат за приватните имоти во Карпош 3 и 4. Затоа нема конкретни најави дали и кога би продолжиле работите натаму.

Булеварското решение за Илинденска е предвидено по целиот потег до Карпош 4, од каде што со мост преку Вардар треба да се поврзе со обиколницата. На тој начин би се намалил сообраќајниот метеж на мостот „Обединети нации“ и на поранешниот железнички мост кај Хром, кој од пред шест години е претворен во коловоз. Но градските власти избегнуваат дури и да ја споменат таа идеја.