Телеком арена (арена Филип II Македонски)

Арената Филип Втори за нецели две години ќе стане најсовремен објект од ваков тип во регионот, но сè уште никој не гарантира дека знае како да го искористи. Стадионот ќе има нова атлетска лента со осум патеки и дополнителна опрема за да се организираат и светски првенства во атлетика. Тревната површина ќе биде убедливо најквалитетна во регионот, бидејќи ќе биде проткаена со свилени конци, кои гарантираат долгорочност, квалитет и одличен изглед. Топловодниот систем за загревање на стадионот ќе овозможи објектот да се користи и кога температурата е под нулата.

Цветко Грозданов, генерален директор на АД за стопанисување со станбен и деловен простор, во чија сопственост е арената Филип Втори, најавува целосна ангажираност за подобро менаџирање и искористување на можностите на стадионот.

„Годинава планираме кадровско доекипирање на стадионот, во смисла на човечки потенцијал. Нагласок ќе се стави на маркетингот (издавање, закупнина и менаџирање на повеќе настани). Размислуваме и за ангажирање приватни менаџери, кои ќе помогнат за поголема финансиска стабилност и добивка на стадионот и за заживување на самиот стадион“, вели Грозданов.

Од продукциско-промоторската куќа Југотон се согласуваат дека арената Филип Втори ќе биде најрепрезентативен објект од ваков тип во регионот, но се претпазливи во однос на можноста некој да го наполни.

„Досегашните искуства покажуваат дека за да се продадат 30.000 влезници кај нас, треба да се донесе ѕвезда од светски калибар, која би привлекла публика и од регионот, а не само од Скопје. Во минатото се носеа звезди од разни профили, но само неколку пати е достигнат максимум. Првиот хуманитарен концерт во чест на Тоше Проевски мислам дека беше максимумот, со 25.000 посетители. Сè уште немаме култура и до толку масовна публика за да продуцираме над 30.000 луѓе за кој било настан“, вели Љупчо Коларовски од Југотон.

Од Југотон сметаат дека со попрофесионално менаџирање на стадионот може да се намали цената на билетите преку обезбедување поголем број спонзори и поголема промоција, што автоматски значи повеќе посетители.

Спротскиот центар Борис Трајковски претставува домашен позитивен пример за успешно менаџирање со спортски објект. Од продукциските куќи велат дека на тоа во најголем дел влијае самата градба и можностите што ги нуди, кои биле адекватни на бројноста на публиката што може да се постигне во моментов.

Ратко Капушевски, директор на СЦ Борис Трајковски, е оптимист дека стадионот веќе го следи примерот на спортската сала и набрзо ќе постане нејзин конкурент.

„Ние навистина сме посветени и се трудиме искуството од другите области да го примениме во полза на спортскиот центар, што засега дава резултати. За сè е потребно време, но мислам дека работите со стадионот се движат во позитивна насока и набрзо ќе се видат резултатите“, вели тој.

http://www.kapital.com.mk/mk/dneven_vesnik.aspx/80121/vembli_srede_skopje,_se_bara_junak_da_go_napolni.aspx?iId=2597