Авиокомпании и линии

Турскиот национален авиопревозник, Turkish Airlines, е редовен авипревозник во Македонија. Од Агенцијата за цивилно воздухопловство (АЦВП) потврдуваат дека Turkish Airlines го назначиле за редовен авиопревозник по барање на турската цивилна пловидба. Со ова, Turkish Airlines во моментов е единствениот редовен авиопревозник во Македонија, нудејќи ја единствено дестинацијата Скопје-Истанбул-Скопје, отако редовниот авиопревозник МАТ ервејс подолг период е приземјен.

Но, од агенцијата не кажуваат дали и какви поволности ужива Turkish Airlines и што нуди за возврат. Тоа не го кажуваат ниту од Turkish Airlines, ниту од ТАВ Македонија, концесионер на скопскиот и на охридскиот аеродром.

Бенефиции и обврски за редовниот авиопревозник во Македонија

 мора да лета на најавената дестинација, макар и со еден патник, во спротивно, со три неоправдани откажувања му се одзема линијата;

 има ексклузивитет пред другите нередовни авиопревозници во изборот на дестинации;

 еден час пред и по најавената линија не се дозволува на истата дестинација да оперира друг превозник;

 најверојатно добива поволности во плаќањето на аеродромските услуги.

Дел од експертите во авиосообраќајот коментираат дека има низа бенефиции и обврски кои се јавно познати, но најверојатно има и многу други поволности кои ТАВ Македонија му ги дава на Turkish Airlines, како и на нискобуџетните авиокомпании, кои се чуваат како строго доверлива тајна.

„Еден редовен авиопревозник има приоритет пред другите нередовни авиопревозници. Кога бара да лета до одредени дестинации, прво нему му се одобруваат, па потоа на некој друг, ако е заинтересиран. Најмалку еден час пред и по најавената линија која ја лета редовниот авиопревозник не му се дозволува на друг да ја оперира истата дестинација. Малку кој во јавноста знае кои привилегии моментално ги има Turkish Airlines од концесионерот ТАВ. Склучените договори меѓу ТАВ Македонија и конкретен авиопревозник се службена тајна. Никој не знае дали и кои привилегии им ги дава ТАВ Македонија на конкретни авиокомпании во однос на трошоците за полетување и слетување, како и за депозитот за користење на аеродромските услуги“, објаснува еден од познавачите на авиобизнисот во Македонија.

Познавачите го спорат моделот државата да субвенционира нискобуџетни авиокомпании со 5,1 милиони евра во следните три години со образложение дека таа обврска си ја зададе ТАВ уште пред да влезе во земјава. За нив е нелогично државата да го помага работењето на приватна компанија, која уште во март 2010 година јавно се обврза дека ќе донесе многу нови авиокомпании, меѓу кои и нискотарифни, со што ќе ги заживее скопскиот и охридскиот аеродром.

http://www.kapital.com.mk/mk/dneven_vesnik.aspx/79670/dali_turkish_airlines_e_redoven_avioprevoznik_vo_makedonija_!.aspx?iId=2575