Аеродроми

Аеродромот прокисна, водата се собира во кофи

Покривот на новата терминална зграда не го издржа налетот на обилните снежни врнежи

Сања Наумовска 



Кофи полни со вода од покривот кој прокисна ги дочекаа вчера патниците на скопскиот аеродром „Александар Велики“. Новата зграда не го положи тестот пред налетот на обилните снежни врнежи, па од викендот наваму вработените се снаоѓаат како знаат и умеат. На неколку места низ аеродромот се распоредени кофи да ја собираат водата што капе. 

„Аеродромите се прв впечаток за државите, а ова е голем ден кога со ’Александар Велики’ целосно се менува сликата за нашата земја кај сите патници кои ќе стапнат на македонско тло“, рече премиерот Никола Груевски, пред само неколку месеци на отворањето на истата терминална зграда.

Од концесионерот ТАВ Македонија признаваат дека аеродромот има проблем со прокиснувањето на покривот, но тврдат дека прават се' за зградата да биде максимално функционална и безбедно да ги прифати патниците за закажаните летови.

„Итно ги преземавме сите неопходни мерки за да се реши проблемот со прокиснувањето. Ова е прва зима за новата зграда, а поправките се дел од процедурите за одржување на зградата“, информираат од ТАВ Македонија.

Во поголемиот дел од вчерашниот ден аеродромската писта беше функционална и се реализираа повеќето планирани слетувања и полетувања. Беа откажани само утринските летови за Загреб, Љубљана и Виена, додека, пак, авионите за Белград, Виена и Истанбул во попладневните часови беа реализирани без проблеми. Вчера беше откажан и попладневниот лет од Цирих.

„Аеродромот ’Александар Велики’ е отворен и истовремено активно се работи на целосно расчистување на пистата. Во неделата вечерта не слетаа авионите од Љубљана, Загреб и Виена, па затоа и немаше полетувања до овие дестинации вчераутро. Летот од Белград наместо доцна во неделата слета вчера утрото во 7,30 часот и полета за Белград во 8 часот. Летот од Прага наместо во 22,45 часот долета вчера, час по полноќ, а полетувањето кон Прага се реализираше утрото во 6,20 часот. И аеродромот ’Св. апостол Павле’ во Охрид е отворен и исчистен, иако нема закажани летови“, соопштуваат од ТАВ.

Од компанијата велат дека аеродромот е постојано отворен и дека не очекуваат проблеми во работата. Паралелно со редовните активности ќе се работи и на отстранување на последиците од прокиснувањето на покривот. Инаку, аеродромот „Александар Велики“ беше пуштен во употреба во септември минатата година, повеќе од еден месец порано од крајниот рок за изградба. Во моментов скопскиот аеродром важи за еден од најмодерните на Балканот. Инвестицијата на турскиот концесионер ТАВ е тешка 100 милиони евра. Аеродромот, кој е реконструиран од корен, доби целосно нова терминална зграда, нова продолжена писта и карго-објект. „Александар Велики“ е десетпати поголем од некогашниот аеродром и има капацитет за 4 милиони патници годишно. Новата терминална зграда има површина од 40.000 квадратни метри и шест патнички пристапни мостови, за директна врска на патниците со влезот во авионот. Патниците имаат на располагање 23 места за чекирање и модерни дисплеи со тековните информации за заминување и пристигнување на авионите.