Скопска обиколница [A2/A4]

Маја МИХАЈЛОВСКА

За влез и за излез од главниот град, за две недели возачите ќе може да ја користат втората делница од скопската обиколницата од Оризари до Сарај во должина од речиси 12 километри, информираат од Фондот за патишта. Овој патен правец е замена за сообраќајниот хаос преку населбата Ѓорче Петров. До него ќе може да се пристапи преку шест нови клучки, кај Оризари, Стенковец, Орман, Стопански Двор и кај Сарај.
Анализите покажале дека обиколницата ќе го намали транзитниот сообраќај низ Скопје до 30 отсто, а со тоа ќе се намалат и количествата издувни гасови во градот. Сепак, од Фондот велат дека нема да го забранат поминувањето на товарни возила низ Скопје.
Обиколницата е нешто подолга од 26 километри има четири ленти и широка е околу 27 метри. Автопатот ќе биде осветлен и од Водно ќе се гледа како полукружен златен прстен на Скопје. Максимална дозволена брзина ќе биде 120 километри на час.
Првата делница, на потегот од Хиподром до Оризари, во должина од околу 15 километри, ќе се отвори за сообраќај кон средината на летото. Во овој дел се уште се решаваат имотно-правните односи со земјиштето, но од Фондот тврдат дека ќе бидат решени во најбрз рок и дека нема да се одолжува финализацијата на капиталниот проект вреден над 80 милиони евра.
Долж обиколницата има вкупно девет пристапни патишта по кои ќе се одвива сообраќајот меѓу скопските населби близу автопатот
и кон Велес и Куманово на исток и Тетово кон запад. Тоа се клучките кај
Хиподром, Ченто, Стајковци, Бутел, Оризари, Стенковец, Орман, Стопански Двор и кај Сарај. Хиподром, Стајковци и Сарај се во финална фаза, а останатите шест се завршени. Од Фондот велат дека останува да се постават и проѕирни ѕидови за заштита од бучава и заштитен премаз од корозија на бетонските делови.
- Сообраќајот долж северната обиколница на Скопје во корен ќе ја измени состојбата со сообраќајот во метрополата. Треба да го преземе транзитниот сообраќај исток - запад, но и транзитниот сообраќај кон Косово. Сега тој се одвива низ центарот на градот и сведоци сме на сообраќајните метежи и заглавувања заради тешките товарни камиони - вели Катерина Пановска- Илиевска од Фондот за патишта.

Патарините немаат смисла

Доколку се воведат патарини, тие ќе го уништат целиот концепт зашто се градеше обиколницата. Тешките товарни камиони за да ги одбегнат трошоците и понатаму би поминувале низ срцето на Скопје, смета Зоран Дамјановски, сообраќаен експерт од Градот Скопје.
Во Фондот уште размислуваат дали да постават патарини на обиколницата. Според нив, поверојатно е дека ќе нема патарини, од едноставна причина што деветте пристапни патишта технички го оневозможуваат тоа.

Завршена изградбата на скопската заобиколница

Скопската заобиколница кон крајот на месецот се очекува да биде пуштена во употреба. Градежните работи привршуваат. Проблем засега се само високите температури, бидејќи работниците по цел ден се на сонце.

„И сабота и недела не тераат на работа, по цел ден на вруќинава. Оваа делница е наша, ова е се наш пат, оди до Оризари, скоро до Шутка“, рекоа работниците.

Во фондот за патиштата изјавија дека сите градежни работи се завршени и дека треба да се средат уште административните. Сепак, немаа конкретен одговор од кога скопската заобиколница ќе започне и официјално да функционира.

И покрај предупредувачкиот знак, многумина од возачите на свој ризик веќе ја користат заобиколницата. Неодамна, тврдат градежните работници, за малку бил избегнат голем несреќен случај.

Скопската заобиколница најверојатно ќе го растерети главниот град на републикава. Се очекува сите камиони, шлепери, цистерни да го избегнуваат центарот на Скопје, да ја користат заобиколницата.

Најверојатно решени се и проблемите со жителите од околните села низ кои поминува патот. Тие бараа поместување околу 300 метри над селата. Поставена е и заштитата од бучавата која би се создавала со сообраќајот.

Проектот заобиколница околу Скопје чини 60 милиона евра. Се гради веќе четири години.