Фондацијата нуди договор, „Воденица“ бара веце

Како ќе заврши оваа мистерија сé уште е нејасно. Не се знае дали од фондацијата ќе донесат вода и ќе изградат санитарни јазли за да и го дадат ресторанот на „Воденица“ или, пак, ќе бараат друга фирма што ќе сака сама да си ги заврши сите комунални работи

Крстот не е подготвен за кафеана

РЕСТОРАН НА МИЛЕНИУМСКИОТ КРСТ

Фондацијата „Милениумски крст“ најавува дека денеска ќе потпише договор за концесија на ресторанот што треба да се прави на крстот на Водно. Ресторанот треба да и се даде под концесија на „Воденица“, но од таму велат дека немаат никаква информација за потпишување договор. Од ресторанот велат дека имало преговори за земање на просторот под концесија, но воопшто немаат намера да го направат тоа сé додека на Водно не се изградат санитарни јазли.

- Не сме информирани за никаков договор, таму нема ниту вода ниту, пак, санитарни јазли, а и струјата е нестабилна. Како можеме да си дозволиме да правиме ресторан во такви услови.Таму засега има само продавница, но таа не е наша - објаснија од „Воденица“. 

Додаваат дека постои можност ресторанот и продавницата да се земат под концесија откако ќе се создадат услови за тоа. 

Благоја Дојчиновски од фондацијата “Милениумски крст&рдљуо; вели дека договорот за издавање под концесија на ресторанот се потпишува денеска, за надомест од 1.500 евра месечно. Според Дојчиновски, „Воденица“ е сопственик и на кафулето што пред неколку месеци е отворено на врвот на Водно, а веќе имало и работници најмени од таа фирма што работеле на изградба на ресторанот. Но, според него, имало прекини во работата затоа што им бил украден алатот за работа. 

- Ќе го потпишеме договорот со „Воденица“, па тие ќе го земат ресторанот на стопанисување - кратко кажа Дојчиновски. 

Мистеријата за сопственикот на кафулето на Водно, како и за концесијата на планираниот ресторан, трае од пред неколку месеци, од фондацијата тврдат дека „Воденица“ ќе биде концесионер, а од таму негираат. Каков ќе биде исходот е нејасно. Не се знае дали од фондацијата ќе донесат вода и ќе изградат санитарни јазли за да и го дадат ресторанот на „Воденица“ или, пак, ќе бараат друга фирма што ќе сака сама да си ги заврши сите комунални работи. 

Дуќанчето на „Милениумски крст“ работи нешто повеќе од еден месец, цените во него засега се симболични, а се планира такви да останат и понатаму. Замислата за ресторанот, пак, е тој да понуди подобри услуги за посетителите, но за повисоки цени. Според новиот проект, за изгледот на новиот ресторан се вели дека на горното ниво тој ќе биде направен како летна тераса со видиковец.

Четири куќарки за изнајмување кај Милениумскиот крст

Деновиве почнаа да се градат уште четири нови куќарки на врвот на Водно. Од јавното сообраќајно претпријатие велат дека куќарките ќе бидат исти како и оние на Средно Водно и дека ќе се изнајмуваат. Сé уште не се знае кога ќе бидат готови, но, според претпријатието, куќарките ќе придонесат за подобри услови за посетителите на Водно. Портпаролката Билјана Јанкуловска вели дека претпријатието ќе ги добие куќарките дури откако ќе се изградат и градот ќе им ги додели на седница на советот.