Булевар Митрополит Теодосиј Гологанов

Градот Скопје денеска /18.06.2012 година/ го почна проектот за реконструкција и проширување на вториот дел од улицата Митрополит Теодосиј Гологанов во булевар. Реконструкцијата ќе го опфати потегот од крстосницата на улицата Митрополит Теодосиј Гологанов со улицата Франклин Рузвелт до крстосницата со улицата Братфордска и булеварот 8.Септември, со вкупна должина од 1.100 метри. Почетокот на градежните работи на оваа сообраќајница го означи градоначалникот на Град Скопје, Коце Трајановски.

- По проширувањето оваа сообраќајница ќе добие 4 коловозни ленти и вкупна ширина на коловозот од 16 метри. На терен ќе се направи ископ, ќе се нанесе тампонски слој и површината ќе се асфалтира. Завршниот слој асфалт ќе биде изработен со полимер којшто го забавува стареењето на асфалтот и формирањето траги од движењето на возилата, за повеќе години. Во текот на реконструкцијата на улицата, ќе се изврши замена на рабниците, а ќе се направи и заштита на подземните инсталации (водоводна инсталација Ф 400 во должина од 400 метри и гасовод Ф 400 во должина од 420 метри). Од двете страни на новата сообраќајница ќе се формираат тротоари со ширина од по 3,5 метри. Тротоарите ќе бидат покриени со бекатон-плочки на површина од 6.500 квадратни метри. Проширувањето на коловозот на улицата Митрополит Теодосиј Гологанов во булевар ќе се искористи за да се изгради атмосферска канализација во должина од 1.500 метри, со профил од 200 и 400 милиметри којашто ќе се приклучи во постојниот колектор. Ќе се изврши и реконструкција на постојната фекална канализација под улицата Митрополит Теодосиј Гологанов во должина од 20 метри. Градежните работи за реконструкција и проширување на вториот дел од улицата Митрополит Теодосиј Гологанов ќе ги изведува градежната фирма „Транс Мет ДОО“. Градот Скопје во овој обемен зафат ќе вложи околу 47 милиони денари. Градежните работи треба да завршат за 90 работни дена. Со овој градежен зафат улицата Митрополит Теодосиј Гологанов ќе добие нов, модерен изглед, а ќе се зголеми и безбедноста во сообраќајот. Овој проект е само уште еден во низата успешни проекти што Градот Скопје ги реализира на подрачјето на општината Карпош – рече градоначалникот Коце Трајановски.

Во текот на градежните работи на вториот дел од улицата Митрополит Теодосиј Гологанов на посочената делница ќе се воведе привремен сообраќаен режим. Градот Скопје апелира до сите учесници во сообраќајот да ја почитуваат поставената сообраќајна сигнализација и да се придржуваат кон воведениот режим на сообраќај.

За потсетување, Градот Скопје минатата година успешно ја заврши реализацијата на првата фаза од капиталниот проект за проширување и реконструкција на булеварот Митрополит Теодосиј Гологанов, на потегот од улицата Франклин Рузвелт до улицата Костурски херои (еден крак) и кон улицата Мито Хаџивасилев Јасмин до свртувањето надесно кон улицата Народен фронт (втор крак).

Во делот меѓу улиците Митрополит Теодосиј Гологанов, Костурски херои и Мито Хаџивасилев Јасмин (кај Католичката црква) е формиран турбо кружен тек, којшто претставува прв објект од ваков тип во Скопје.

http://skopje.gov.mk/ShowAnnouncements.aspx?ItemID=5123&mid=482&tabId=1&tabindex=0