✔ Grand Prestige,Domino,Trim Lum - Карпош

Стопанска банка од Скопје одобри кредит за изградба на голем станбен комплекс „Гранд Престиж“ на инвеститорите Импексел 2 и Еуроактива. Станува збор за станбен комплекс од 80.000 метри квадратни и целосната финансиска конструкција за истиот е во рангот над 60 милиони евра. Две од станбените згради се во финална фаза на изградба, а во процес на подготовка е изградбата на уште четири згради со што проектот ќе го постигне крајниот планиран изглед.

Генералниот директор на Стопанска банка, Глигор Бишев, изјави дека поддршката што ја обезбеди банката за овој проект е доказ дека тие ги следат сигналите од Народната банка за зголемување на кредитирањето.
“Освен финансиската поддршка за инвеститорите, што ќе ја добиваат во секоја фаза од реализација на проектот, Стопанска банка истовремено ќе обезбеди и кредитна поддршка за сите клиенти што ќе сакаат да купат станови. Во рамките на самиот објект ќе отвориме посебен шалтер каде сите клиенти што ги исполнуваат кредитните услви, ќе може да аплицираат и да добијат станбени кредити“, изјави Бишев.
Инвеститорите најавија дека првите две згради се очекува да бидат готови до октомври годинава. Становите ќе се продаваат по цена од околу 1.100 евра за метар квадратен, а ќе се понудат станови со различна големина, од 45 до 100 метри квадратни.