„Филип Втори“ подготвен за финале на Лига на шампиони!

Тревата на нашиот најубав стадион ќе биде од елитна светска класа, каква што во моментов има на теренот на стадионот „Лужники“ во Москва, каде што се одигра финалето на ЛШ во 2008 година

НАЦИОНАЛНАТА АРЕНА БЛЕСНА СО ВРВНА ТРЕВНА ПОДЛОГА

Фудбалерите на Вардар на синоќешниот тренинг први ја имаа честа да ја нагазат новата тревна подлога на националната арена „Филип Втори“, која е со врвен квалитет, рамен на најдобрите европски терени. „Црвено-црните“ на утрешниот реванш-меч од квалификациите за Лигата на шампиони против БАТЕ Борисов (20 ч.) ќе истрчаат на најквалитетна трева во Европа, со што ќе ги имаат сите предуслови за триумф, кој ќе значи и пласман во 3. коло.

Тревата од австриската компанија „Рихтер разен“, која со овој бизнис се занимава уште од 1906 година, се користи и на терените на елитните стадиони како „Лужники“ во Москва, каде што се одигра финалето на ЛШ во 2008 година, и Олимпискиот стадион во Киев, на кој пред нецел месец се одигра финалето на Европското првенство. Ваква природна трева, која од 2003 година се одгледува на над 200 хектари во резерват во Словачка, има и на теренот на Реал Мадрид на „Сантјаго Бернабеу“, на „Џузепе Меаца“ на Милан и Интер, „Вестфален“ на Борусија Дортмунд, на „Ернст Хапел“ во Виена, на кој се играше финалето на Евро 2008, како и на уште стотина најквалитетни стадиони во Европа. Проектот на „Филип Втори“ е во изведба на градежната компанија „Бетон“.

За одржување на тревата ќе се грижат специјално обучени лица, а за нејзино наводнување е поставен врвен европски систем на прскалки „перот“ околу целиот терен, кои имаат дострел од над 40 метри. Целосниот подземен слој, кој навлегува повеќе од еден метар во длабочина, е составен од неколку видоа земја, висококвалитетен песок и тресет, кои помагаат за подобра дренажа на теренот (исушување), како и за прихрана на тревата. Сето тоа е поставено над систем за дренажа од големи цевки, а во средината на овие слоеви земја се наоѓа и најквалитетна мрежа за греење на теренот од прочуената фирма „Рехау“.
Бусените трева, кои се со дебелина од три сантиметри, беа поставени во експресен рок од седум дена во јуни, а досега поминаа неколку контроли на самата компанија и се сосема подготвени за сите оптоварувања. Поставено е и врвно осветлување од компанијата „Филипс“, кое на последното тестирање покажало јачина од 1.700 лукса.

Ваквата подлога, која е најквалитетна во Европа, ќе овозможи во иднина да гледаме и врвен репрезентативен фудбал, а е поставена токму во пресрет на квалификациите за Светското првенство во Бразил 2014, кои почнуваат во септември. Националниот тим првпат ќе ја почувствува новата подлога на 15 август на пријателскиот меч против Литванија.

http://www.novamakedonija.com.mk/NewsDetal.asp?vest=724121132465&id=19&prilog=0&setIzdanie=22638