За 8 месеци во Стив Наумов ќе никне нова студентска населба. На површина од 15 000 метри квадратни ќе бидат изградени 8 објекти со вкупен капацитет од 205 легла.

Министерството за транспорт и врски денеска распиша јавни објави за две градежни парцели во центарот на Скопје на кои е предвидена изградба на подземна сообраќајница со комерцијални, деловни, угостителски и хотелски комплекси и на културен објект, предвидени со Деталниот урбанистички план „Стара железничка станица“.

Првата парцела што се наоѓа зад трговскиот центар „Рамстор“ кај Јужниот булевар е со површина од 31.929 метри квадратни и за неа почетната цена на јавното наддавање ќе изнесува 6.000 денари. За оваа парцела како посебен услов што треба да го исполнат заинтересираните компании е да имаат годишен обврт на капитал не помал од 100 милиони евра во последните три години. 

-  Најповолниот понудувач за оваа локација ќе има обврска, на свој трошок, во целост да ја изгради подземната сообраќајница, предвидена со Деталниот урбанистички план „Стара Железничка Станица“ и по изградбата на истата, без надомест, да ја предаде во владение на Град Скопје, информира денеска на прес-конференција портпаролот на Министерството Драган Симоновски.

Втората градежна парцела на која треба да се изгради културен објект во близина на Музејот на Град Скопје е со површина од 9.895 метри квадратни, а почетната цена ќе биде 2.800 денари од метар квадратен. Најповолниот понудувач е должен во рок од 15 дена од завршувањето на тендерот да достави банкарска гаранција од 200 илјади евра. 

Крајниот рок за доставување на понудите за двете објави е 15 февруари.

Покрај овие објави, распишани се и тендери за оттуѓување на три градежни парцели за изградба на откупно-дистрибутивни центри во општините Ресен, Валандово и Чешиново-Облешево.

Градежното земјиште во Ресен е со површина од 61.433 метри квадратни и за него почетната цена е 61 денар, во Валандово вкупната површина на земјиштето е 77.981 метар квардатен кое се продава со почетна цена од 110 денари, додека во Чешиново - Облешево се нуди земјиште од 5.312 метри квадратни со почетна цена од 61 денар.

Во следниот период предвидено е распишување и на јавни објави за изградба на станбени згради во општина Аеродром.

Во однос на преземањето на надлежностите за управување со неизградено градежно земјиште што како законска обврска ја имаат општините од јули минатата година, досега 14 општини ја имаат преземено оваа обврска, а за 12 во тек е постапка за одлучување по нивните барања.

Градежни парцели во Скопје кои пред неколку години државата им ги продаде на приватни инвеститори сè уште зјаат празни. Никој таму ништо не гради, а беа ветени мегапроекти, како град во град на Скопски саем, 40-катници за домување во Аеродром, аквапарк во Аеродром... Почнати, но недовршени градежни парцели има речиси на секој чекор, но од поголемите дефинитивно боди очи просторот кај поранешна Алумина, каде што Израелците од Газит глоуб ветија изградба на луксузен трговски центар. Сè уште не е реализирана и инвестицијата на турската компанија Џеваир холдинг, која на локацијата во близина на спортската сала Јане Сандански планираше изградба на 40-катници за станбено домување. Зјае празен и просторот кај Скопски саем, каде што Словенците требаше да го градат Ера сити, но и просторот во близина на спортската сала Јане Сандански, каде што Пеце Наумовски најавуваше изградба на аквапарк и повеќенаменска спортска сала. Не треба да се заборави и Сончев град во Сопиште, кој остана само пуста желба на поранешниот и сегашниот градоначланик на општината.

„Капитал“ се обиде да добие одговори што се случува со проектите и дали е можна нивна реализација во скоро време. Речиси сите тврдат дека нема застој, иако на терен нема видливи градежни активности. Во Министерството за транспорт велат дека на сите компании кои ги пробиле роковите за изградба на државно земјиште ќе им се наплаќаат пенали, но не кажаа колкава е вредноста.

Јакимовски: Пректот на Израелците е измама?

Луксузниот трговски центар и станбен комплекс што требаше да никне кај поранешна Алумина, според претставништвото на израелските инвеститори Газит глоуб во Скопје, ќе се изгради и немало никакви финансиски или какви било проблеми за тоа. Но, градоначалникот на општина Карпош за „Капитал“ вели дека се работи за измама и дека објектот никогаш нема да се изгради, а земјиштето ќе се препродаде.

„Тоа е голема измама, имам информации дека се вмешани луѓе од власта и дека во моментот се бара чаре или да се препродаде земјиштето или некако да се изгради трговскиот, но поверојатна е првата варијанта. Две години откако е донесен урбанистичкиот план нема никаква трага од Израелците, единстевно донесоа идеен проект“, вели Стевче Јакимовски, градоначалник на општина Карпош.

Од претставништвото на Газит глоуб во Скопје, од каде што најавуваа инвестиција поголема од 100 милиони евра, убедуваат дека не се откажуваат од реализација на проектот.

„Во тек е финализација на основниот проект потребен за добивање градежна дозвола, а самата порцедура е веќе почната со општина Карпош. Немаме никакви финансиски проблеми ниту, пак, одолжуваме, порцедурите се во тек и течат согласно со нашите интерни планови“, велат од Газит глоуб.

Според информации на „Капитал“, проектот е закочен поради нерешен судски спор со фирмата К-15, која имаше објект на локацијата купена од Израелците. Извори за „Капитал“ велат дека при купување на локацијата на Газит глоуб им било кажано дека обејктот е дивоградба и без проблем ќе се руши, но до денеска сè уште трае спорот меѓу двете страни.

40-катниците во Аеродром никако да се изградат

И за турската компанија Џеваир холдинг, која во Македонија веќе го регистрираше претставништвото Туркмак, нема одложување на проектот за изградба на неколку згради 40-катници, иако компанијата сè уште нема добиено градежна дозвола, а го купи земјиштето од државата во мај 2010 година. Во Туркмак велат дека имале технички проблеми, но убедуваат дека изградбата ќе почне месецов.

Во општина Аеродром, исто така, убедуваат дека реализација ќе има, иако потенцираат дека вакви згради за првпат ќе се градат во земјава, па институциите не се многу информирани како да постапуваат во одредени случаи.

„Проектите се готови само мора да поминат кај консултантски куќи, па потоа да се изработат. Инаку компанијата пред извесно време доби урбанистичка согласност да гради, сега треба да изработат главен проект. Ова е прва изградба од ваков вид, луѓето во странство си го прават проектот, па нашите проектантски куќи треба да го одобрат и да го прегледаат. Знаете, нашиве немаат многу искуство со ова и затоа се одолжи процесот“, вели Ивица Конески, градоначалник на општина Аеродром.

Слична судбна доживеаја и проектите на кошаркарот Пеце Наумовски, кој во последните години прилично амбициозно купуваше државни парцели за изградба на аквапарк и спортска сала. Иако уште пред две години стана сопственик на парцелата во близина на спортската сала Јане Сандански, според информациите од општина Аеродром, дури пред еден месец фирмата на Наумовски, Манд интернационал, добила одобрение за градење. Рокот за изградба на објектите е две години.

„За изградба на аквапаркот платија 600.000 евра комуналии, што значи решени се да градат. Дали ќе плаќаат пенали за тоа што доцнат со изградбата не знам“, се огради градоначалникот Конески.

Но, пеналите нема да важат за сите инвеститори кои доцнат со изградба на објектите. Според Министерството за транспорт, Пеце Наумовски нема да плаќа казна затоа што го одложил градењето не по негова вина, туку затоа што се вршеле измени и дополнувања на Деталниот урбанистички план.