Италија до крајот на месецот ќе почне со изградба на најголемиот висечки мост во светот со должина од 4,83 километри, кој ќе го поврзува островот Сицилија со Италија, а се очекува да биде завршен до 2016. година.

Мостот ќе биде широк 60 метри и ќе има доволно простор за 12 коловозни ленти и две централни железнички пруги, а неговата изградба ќе чини околу 3,88 милијарди евра.

Главниот столб ќе биде 122 метри длабоко во вода, а мостот е проектиран да издржи ветер со брзина до 215 километри на час и земјотрес со јачина до 7,1 степен по Рихтер.

Се предвидува секојдневно по него да минуваат над 100.000 возила и 200 возови.

Долго време жителите на Италија ја разгледуваа идејата за изградба на мост кој ќе ги поврзува двете копна меѓу протокот Месина, по кој мостот ќе го добие своето име.

Поради ширината на протокот од 3,22 километри, неговата длабочина и струи, како и честите потреси и земјотреси мостот изгледаше како невозможно решение, поради што е развиен траектен систем кој се користи наместо мост.

Италијанската влада во 1969 година одржа меѓународен инженерски конкурс со надеж дека ќе добие одржлив проект за мост или подводен тунел.

Од 1972 до 1992 година извршени се повеќе студии за изводливост кои ги разгледуваа можностите за изградба на висечки мост, пловен тунел или обичен подводен тунел.

Студиите, кои ги вклучија податоците од геолозите, сеизмолозите и геотехничките инженери, ги отфрлија идеите за двата вида тунели и донесоа одлука да се изгради најголемиот висечки мост во светот.

Најголемиот висечки мост во светот моментално е „Акаши Каикуо“ во Јапонија со должина од 1,99 километри.

Главен изведувач на проектот ќе биде италијанската инженерска компанија „Импрегило С.П.А.“.

Компанијата го доби договорот врз основа на нејзината понуда на тендерот од 3,88 милијарди евра.

„Импрегило С.П.А.“ има искуство со слични големи проект и моментално работи на проширувањето на Панамскиот канал, кој се очекува да биде завршен во 2014. година.