А1 Арена (Спортски центар „Борис Трајковски“)

Владата даде два милиона евра за доизградба на спортската сала

Објектот ќе биде предаден во употреба во март идната година

Салата ќе биде целосно подготвена за претстојното Европско првенство во ракомет што ќе се одржи во Скопје во декември следната година

САЊА НАУМОВСКА

Владата одвои нови 130 милиони денари за спортската сала „Борис Трајковски“. Парите се наменети за довршување на неколку тендери за изградба на паркинзите околу објектот, внатрешно уредување и набавка на спортски реквизити и за изведба на вентилацијата, ладењето и греењето на салата. Средствата ќе бидат инвестирани до крајот на годинава, а според надлежните, следната година ќе бидат доделени уште пари за конечно довршување на објектот.

Според Борис Змејковски, директор на мешовитото претпријатие кое ја гради салата, останува да се распишат уште неколку помали тендери за инсталирање компјутерски системи и Интернет, како и систем за набљудување и безбедност. Ќе биде инсталирано и модерно осветление според нов проект, со што ќе се обезбеди успешно одржување на повеќе спортови кои бараат различен тип осветление. Консултации за осветлувањето македонските стручњаци направиле во белградската „Арена“ и во други помали сали во Србија.

Според зацртаната динамика, објектот ќе биде предаден во употреба во март в година, а пробното работење во кое се дозволени и некои поситни интервенции во внатрешноста, ќе се прават до есен. Змејковски вели дека салата ќе биде целосно подготвена за претстојното Европско првенство во ракомет што ќе се одржи во Скопје, во декември следната година.

„Изградбата се одвива според планот, ’Маврово’ ја почитува динамиката која ја одредивме, а и сите тендери ни се навреме објавени. Имаме поддршка од Владата која не' следи со финансиите, бидејќи без тоа не би биле во можност да завршиме навреме“, објаснува Змејковски, нагласувајќи дека за салата да биде спортски објект од прва категорија, покрај другото, ревидиран бил и проектот за паркиралиштето кое сега наместо 300 ќе има 600 паркинг-места. Паркингот ќе го гради велешката фирма „Делта“, која ќе ги изведе и катната гаража, пристапните сервисни улици, тревниците, патеките, трафостаници и други делови околу објектот. На тендерот за изработка на системите за вентилација, затоплување и ладење, во меѓународна конкуренција, победи македонската фирма „Кратер“, додека, пак, словенечката „Елан“ заедно со „Енергомаркет“ ќе ги обезбеди спортските елементи потребни за одигрување на сите спортови за кои е предвидена салата, како и делови од внатрешното уредување на објектот.

Салата „Борис Трајковски“ ќе се отвори во април со спектакл

Паркетот на кој ќе настапуваат спортистите се набавува од САД и на ист таков играат и НБА-ѕвездите

Столчињата на двете поголеми трибини ќе бидат во жолта и црвена боја и ќе го отсликуваат македонското знаме

САЊА НАУМОВСКА

Спортската сала „Борис Трајковски“ ќе биде отворена во април идната година со голем спектакл. Точниот датум се' уште не се знае, но извесно е дека официјалното предавање во употреба на објектот ќе биде на крајот на март, по што ќе следува и спектакуларното отворање. Засега во опција се неколку идеи за учество на познати музички имиња, па се' до кошаркарски спектакл со Харлем глоб тротерс. Во раководството на спортската сала не ги откриваат деталите, бидејќи се' уште е рано и се размислува за сите опции. Конечната одлука ќе треба да ја донесат заедно со Владата, но велат, сепак, овој објект заслужува да добие отворање што ќе се памети.

Во меѓувреме, изградбата продолжува со несмален интензитет, а деновиве е познато и како ќе изгледа внатрешноста на салата. Договорено е се' ќе уредува словенечки „Елан“, како што е ентериерот и сите спортски елементи потребни за изведување на спортовите. Столчињата на двете поголеми трибини ќе бидат во жолта и црвена боја во форма на македонското знаме. Тоа се висококвалитетни и огноотпорни столчиња. Во рамките на овие трибини ќе има и ВИП-салони опремени со фотелји и со бар. На највисокото ниво на трибините ќе има посебен дел целосно опремен за работа на над 60 новинари и сниматели. Паркетот на кој ќе настапуваат спортистите се набавува од САД и е со највисок квалитет. Според Борис Змејковски, директор на мешовитото претпријатие за изградба на салата, тоа е ист паркет на кој играат НБА-ѕвездите. Сево ова можно е и да ја зголеми првично предвидената цена на изградба на објектот. Според Змејковски, темпото на работа, измените на проектите, тендерите и ситните занаетчиски работи бараат многу финансии. Сепак, потенцира тој, конечната сума ќе се знае напролет.

„Засега најголем приоритет ни е навреме да завршиме со изградбата и да се запази предвидениот рок. Се размислува и за отворањето, ќе биде спектакл, но деталите се' уште се договараат“, вели Змејковски. Тој нагласува дека преостанува да се сработат системите за ладење и греење и за вентилација, потоа внатрешноста и паркингот. Се' уште се размислува дали салата за куглање, амбулантата, сауните, теретаната и фитнес-салата ќе ги опремува фирмата „Борис Трајковски“, или пак, ќе се дадат под концесија. Од тоа, додава Змејковски, зависи и конечната финансиска конструкција на проектот. Има идеја и за поврзување на спортскиот објект со базенот „Младост“, за вклучување и на пливачките спортови, но засега се испитува сопственоста на базенот.