ЕВН Македонија е најголем увозник и прв муштерија на трговците со струја 

За првите 10 месеци целиот обем на истргувана електрична енергија на нашиот пазар вреди околу 120 милиони евра.

ЕВН Македонија е најголем увозник на електрична енергија во земјава во првите десет месеци годинава, покажуваат официјалните податоци на Операторот на пазар на електрична енергија. За првите десет месеци ЕВН Македонија увезла над 557.000 мегаватчасови електрична енергија и годинава го презеде приматот од рударско-преработувачкиот комбинат ФЕНИ Индустри кој долги години наназад важеше за најголем потрошувач на електрична енергија во земјава. Од споредбата на официјалните податоци се гледа дека ЕВН Македонија само за првите десет месеци годинава увезла 200.000 мегаватчасови повеќе електрична енергија отколку за цела година лани.

ЕВН Македонија годинава го замени ЕЛЕМ кој до лани увезуваше електрична енергија и за потребите на тарифните потрошувачи кои ги снабдува ЕВН Македонија. Според познавачите, поскапувањето во август и укинувањето на евтината тарифа во дневните часови е последица на тоа што ЕВН Македонија го презеде увозот за сопствените потреби.

ЕВН Македонија ќе биде најголем муштерија на продавачите на струја

Минатата година ЕВН Македонија за цела година по пазарни цени купила повеќе од 341.000 мегаватчасови електрична енергија за задоволување на потребите на тарифните потрошувачи. Со тоа купено количество оваа компанија лани била на 4 место на листата на најголеми потрошувачи на струја и во целиот обем на тргувана електрична енергија учествувала со 12,4 отсто.

За првите десет месеци годинава таа компанија е најголем купувач на електрична енергија на пазарот и држи 27,2 отсто од целата трговија со електрична енергија. На второ место годинава падна ФЕНИ Индустри со мал заостаток зад ЕВН Македонија и со пазарно учество од 26,6 отсто. Државниот производител на електрична енергија ЕЛЕМ е на трето место со пазарно учество од 12,2 отсто, односно со купени над 250.000 мегаватчасови електрична енергија. На четврто место на листата на најголеми потрошувачи на струја е комбинатот „Југохром Фероалојс“ од Јегуновце со пазарно учество од 12,1 отсто, а на петтото место годинава е МЕПСО со пазарно учество од 6,3 отсто.

Трговијата со струја во Македонија досега вреди околу 120 милиони евра

И покрај тоа што нема организиран пазар за тргување со електрична енергија односно берза, во Македонија годишно се купува и продава електрична енергија во вредност од барем 100 милиони евра. Сега на македонскиот пазар електричната енергија се тргува на два начини. Прво, со билатерални договори меѓу трговците и големите компании: ФЕНИ Индустри, Југохром Фероалојс, ОКТА, Бучим, Макстил, УСЈЕ, Скопски легури и Митал Стил. И второ на тендери – практика што ја применуваат ЕЛЕМ, ЕВН Македонија и МЕПСО. Заради тоа што нема организирано тргување и нема берза за струја во земјава нема транспарентна пазарна цена која ќе се постигнува на дневно ниво за тргување по моделот „ден претходно“ или по моделот „во тек на денот“ како што е практика на регионалните берзи за тргување со електрична енергија и капацитети.

http://www.mkd.mk/78903/ekonomija/evn-makedonija-e-najgolem-uvoznik-i-prv-musterija-na-trgovcite-so-struja/

Доаѓаат ли Русите?

Донесената одлука на Владата на истекот од ланската година за прогласување енергетска криза, фала богу, не стапи во сила. Успешно се заврши приказната наречена преземање на топлификациониот систем во главниот град од страна на новиот играч во овој бизнис, македонската фирма од руско потекло - „Балкан енерџи груп“. А постоеше сериозна опасност за Нова година жителите на Скопје да останат со ладни радијатори, што, пак, можеше да предизвика и распад на електроенергетскиот систем бидејќи во таква ситуација ќе се вжештеа сите греалки и клима-уреди и главниот град, кој и онака е најголем потрошувач на електрична енергија, ќе останеше ем во темница ем во студ. И ќе беше навистина „убав“ пречек на годината со баксузен предзнак.

Но, за среќа, тоа не с е случи. Во последен момент „н` спаси“ Регулаторната комисија за енергетика, која претходно со месеци, а богами и цела година, н` мачеше со прикаската околу парното. Зашто, дека нешто не чини, се знаеше уште лани кога „Топлификација“ ги врати лиценците, а Регулаторот се правеше на удрен и не одговараше додека не помина грејната сезона. За потоа, летоска, да не го прифати откажувањето на лиценците, а во екот на годинашнава сезона да одлучи да избира нова компанија која ќе ги затоплува скопјани.

Веројатно времето не беше созреано за да може новиот играч да ја преземе палката. И така таа, во пет до дванаесет, додека се подготвувавме за пречекот на Новата година, н` израдува со веселата вест дека можеме да бидеме спокојни – успешно се доделени лиценците за производство, дистрибуција и снабдување со топлинска енергија.

Бидејќи лошите работи брзо се забораваат, останува само онаа добрата, а тоа е дека комбинираната гасна електрана ТЕ-ТО конечно почна со работа. Во дневните диспечерски извештаи на МЕПСО стои дека веќе неколку дена централата произведува електрична енергија, и полека се забрефтува, па дури произведува и повеќе од планираното. Kаде оди струјава, засега нема информации. Но без разлика, дали ја откупува ЕВН за да го покрие она што ни фали или, пак, се извезува, бенефитот е тука. Имаме ново производство, со што ќе има пораст на вкупното индустриско производство. Истовремено, топлинската енергија оди во цевките од парното, што од друга страна, значи помалку трошење мазут и помало загадување на главниот град, во кој луѓето во зимските месеци дишат на жабри. Kонечно ќе се зголеми и потрошувачката на гас, која со децении, откако беше изграден гасоводот, е минимална. И што е можеби уште поважно, се отвора простор за гасификација на земјава.

Еден добар познавач на овој бизнис пред извесно време спомена дека тоа што Русите конечно решија да се раздолжат со клириншкиот долг кон нас, со изградба на дел од гасоводот кон Неготино и Kавадарци, и што прифатија и Македонија да има крак од „Јужен поток“ (без разлика дали тој ќе биде паралелен со сегашниот гасовод или ќе оди од некоја друга страна), значело дека постои сериозна процена дека и нашата земја ќе се гасифицира. Односно, дека ќе се зголемува потрошувачка на гас, без што инаку Русите немале да мрднат со прст.

Дека има нешто во сево ова, на некој начин потврда дава и информацијата што „Топлификација“ им ја соопшти на своите акционери, според која, сопственикот на ТЕ-ТО, руската компанија „Синтез груп“, била сериозно заинтересирана да изгради уште една, помала ваква централа, во западниот дел од градот, практично, како замена за сегашната „Топлана Запад“. Ако сегашнава централа може да задоволува 60 отсто од потребите од топлинска енергија за главниот град, со новата потребите целосно би биле задоволени и двете сегашни топлани на „Топлификација“ би заминале во историјата. Ваквиот развој на настаните, според она што се наведува од компанијата која досега н` грееше, бил и една од причините што го напуштаат бизнисот кој за нив веќе не бил профитабилен. Уште една ваква централа се спомнува и во стратегијата за развој на енергетскиот сектор на државата во следните години.

Ако на ова се додаде и најавата дека од „Балкан енерџи груп“ биле заинтересирани за изградба на „Чебрен“ и на „Галиште“, тврдењето дека ништо не е случајно и дека Русите сериозно влегуваат во нашиот енергетски сектор, станува реално. И ако еднаш поради караницата со ЕВН ја пропуштивме шансата Австријците да ни изградат гасоводен крак и да ја трансформираат ТЕЦ Неготино во гасна централа за производство на струја, втората шанса веројатно не треба да ја испуштиме.

Зденка ПАВКОВИЌ

http://www.dnevnik.com.mk/?itemID=6377463D15058240B25208EF54DAAEE3&arc=1

ЕЛЕМ ќе инвестира 100 милиони евра во рудникот за јаглен Живојно