Телеком арена (арена Филип II Македонски)

Фасадата на арената „Филип Втори“ чека на дуќаните

Засега нема пари за дозавршување на надворешноста на спортскиот објект.
Пари за таа намена се планирани од издавањето на деловниот простор

ДЕСПИНА ТРАЈКОВСКА


Арената „Филип Втори“ се' уште го нема добиено очекуваниот, најавен надворешен изглед. Нема ни „Ф“ од промовираната фасада, ниту од илуминацијата, која, како што се најавуваше, требаше да биде налик на германската „Алијанс арена“. Освен доизградените трибини и истакнатото ново име на стадионот, гледано однадвор ништо не остава впечаток дека Скопје доби старо-нов градски стадион.

Очигледно, желба за дозавршување на објектот има, но надлежните немаат пари. Спас гледаат во издавањето на дуќаните во поттрибинскиот простор. Годинава од државниот буџет нема издвоено ниту денар за спортската арена, а АД за изградба и стопанисување со станбен и деловен простор, под чија надлежност е стадионот, засега врзуваат крај со крај со парите потребни за негово завршување.

Од таму, сепак, се оптимисти и очекуваат за кусо време финансиските планови да почнат да им се реализираат за да инвестираат во фасадата. Процениле дека од издавањето на локалите во поттрибинскиот простор ќе обезбедат најмалку 2,5 милиони евра. Од станбеното претпријатие деновиве завршуваат со утврдување на почетната цена за квадрат од просторот кој ќе се издава по пат на лицитација. Во меѓувреме беше распишан и оглас за пројавување интерес за дуќаните.

„Тоа беше дел од стратегијата, еден вид пробен балон. Задоволни сме од пројавениот интерес и дејноста на заинтересираните субјекти, од кои некои дури можеби ќе бидат подготвени да платат закупнина за во наредните 10 и повеќе години, што од старт ветува прилично средства. Токму тие пари ќе се искористат наменски за завршување на фасадата. Се надеваме дека најдоцна за еден месец ќе ја распишеме лицитацијата за дуќаните и веќе од пролет ќе се создадат услови тие да станат функционални, а ние да ја планираме динамиката за почнување, односно завршување на фасадното облекување“, вели Цветко Грозданов, директор на претпријатието.

Тој тврди дека досега плановите за уредување на поттрибинскиот простор се движат во рамки на утврдените временски граници. Во меѓувреме ги завршувале градежните работи, ја утврдувале заинтересираноста за нивен закуп, правеле процени за утврдување на цената за издавање... Деновиве, пак, претпријатието побарало мислење од Антикорупциската комисија, врз основа на кое ќе можат да продолжат со постапката за дуќаните, односно чекаат позитивен одговор дека распишаните локални избори не се пречка претпријатието да продолжи со реализација на плановите.

Инаку, во поттрибинскиот простор има околу 4.000 квадрати што ќе се дадат под закуп. Дозволено е просторот да се оспособи за хостел, ресторани, изложбени салони... Просторот сега е во фаза на карабина, за како што велат од претпријатието, идниот закупец да го уреди за своите потреби по своја желба, но во рамки на дозволеното.