Подземна улица (К.Ј.Питу - Илинденска)

Подземната сообраќајница треба да биде долга 1.300 метри, од кои 900 метри се под земја, а 400 метри над земја. На овој капитален проект работиме веќе неколку години и тој ќе биде вистинска круна на сообраќајните решенија во Скопје.

Убедливо победивте на локалните избори и ја добивте довербата за уште еден мандат. Ви остана ли недовршена работа од првиот мандат што сега ќе треба да ја довршите? Кои ќе ви бидат првите проекти?

Градот Скопје не направи пауза во своето работење. Како што видовте, по стабилизацијата на временските услови нашите екипи ги асфалтираа втората делница од проширениот булевар Борис Трајковски и новоформираниот кружен тек меѓу улиците Лазо Трповски и Втора македонска бригада. Се асфалтираше и дел од улицата Перо Наков, каде што претходно се поставуваше атмосферска канализација. Забрзано се работи на изградбата на новата водоводна мрежа на улицата Васко Карангелевски, како и на двете катни гаражи, на улиците Даме Груев и Свети Кирил и Методиј. Според мене, кога се работи посветено и на терен, проектите се завршуваат навреме, без одолговлекување и без застој.

Оваа година ќе работиме на изградба на подземна сообраќајница под кејот на реката Вардар, на проширување на улицата Трета македонска бригада, на продолжување на булеварот Партизански одреди кон Ѓорче Петров, на проширување на булеварот Никола Карев, на доизградба на булеварот Митрополит Теодосиј Гологанов, на реконструкција на улицата Јордан Мијалков (поранешната улица Железничка). Ќе следуваат уште многу други проекти. Ниту една општина во Скопје нема да биде заобиколена.

Во изминатиот мандат имавте големи и важни зафати, но тие како да беа засенети од проектот "Скопје 2014" (најчесто заради политичкиот контекст што тој го добиваше). Затоа и постои впечаток дека овие зафати не оставија силен белег. Ќе има ли во овој мандат нешто навистина големо, нешто што ќе се памети? 

Не се согласувам со Вашето тврдење. На овие локални избори граѓаните ја препознаа успешноста на проектите што во изминативе четири години ги реализирав заедно со мојот тим и ја наградија мојата работа со уште еден градоначалнички мандат. Проектите на градот Скопје што се дел од проектот "Скопје 2014" - обновата на мостовите на реката Вардар и на фасадите во центарот на градот исто така беа позитивно оценети. Мојот втор градоначалнички мандат, според моето мислење, ќе го одбележи проектот за изградба на подземната сообраќајница што ќе се протега од Комплексот банки до Мостот Гоце Делчев, под кејот на реката Вардар.

Јавниот повик за избор на изведувач за изградба на оваа сообраќајница е во тек, а крајниот рок за доставување на понудите е 10 јуни.

Според повикот, предмет на изградба ќе биде подземна сообраќајница од булеварот Кузман Јосифовски-Питу со раскрсницата со улицата Никола Карев до булеварот Кочо Рацин, од булеварот Кочо Рацин преку кејот 13 Ноември и раскрсницата со булеварот Илинден и булеварот ВМРО, и трасата на сообраќајниот коридор до булеварот Партизански одреди преку булеварот ВМРО и дел од булеварот Илинден. Подземната сообраќајница треба да биде долга 1.300 метри, од кои 900 метри се под земја, а 400 метри над земја. На овој капитален проект работиме веќе неколку години и тој ќе биде вистинска круна на сообраќајните решенија во Скопје.

Очекувате ли добра соработка со општините, особено со општината Центар, која ќе ви биде неопходна, пред сè за подземната сообраќајница?

Секако. Соработката меѓу градоначалниците на 10-те скопски општини досега беше одлична, а така ќе продолжи и понатаму. Од таа соработка произлегоа многубројни успешни проекти кои во голема мера го подобрија живеењето во градот. Градевме клучни сообраќајници, нови водоводни, фекални и атмосферски канализациски мрежи, проширувавме паркиралишта, уредувавме паркови, градевме мостови. Новите проекти ги договараме со редовни средби, а морам да ја пофалам и работата на Координативното тело на градоначалници кое што по моја иницијатива се сретнува редовно, еднаш месечно. Нашата соработка е во интерес на нашите сограѓани кои на локалните избори ни ја дадоа својата доверба и очекуваат да работиме за нивно добро. Оттука, не се сомневам и дека со градоначалникот на општина Центар, Андреј Жерновски ќе имаме добра соработка, како и со другите мои колеги градоначалници.

...