Sky City (Џеваир облакодери и трговски центар)

Министерството за транспорт и врски се уште нема распишано тендер за избор на најдобра фирма-понудувач, која ќе има можност да ги гради стокатниците во Аеродром. За ваквата одлука на Советот на општината, веднаш по нејзиното донесување, дозвола дадоа надлежното министерство и Градот Скопје, но веќе неколку месеци целата постапка тапка во место. Од Министерството за транспорт и врски велат дека ваквата постапка вообичаено е да трае подолго време затоа што кога станува збор за државно земјиште, истото мора да се отуѓува по принципот на јавно наддавање. - Во согласност со одлуката на Советот на Општината Аеродром да се градат висококатници на нејзина територија, но на земјиште кое што е во државна сопственост, ние како Министерство, во согласност со законите, најпрвин треба да распишеме јавен повик. На повикот ќе имаат можност да се пријават сите заинтересирани фирми, кои на предвиденото земјиште ќе можат да ги градат висококатниците. Дури откако ќе се распише тендерот, ќе се знае дали има и колкав е бројот фирми заинтересирани за градба - велат од Министерството за транспорт и врски. Но, за тоа кога ќе се распише се уште нема одговор. Од Општината Аеродром објаснуваат дека очекуваат одговор од страна на Министерството во врска со тоа до каде е изборот на најдобрата фирма-понудувач. - Ние оваа одлука ја изгласавме на Совет, потоа обезбедивме локација, а сега следниот чекор треба да го направи е Министерството. Откако и официјално ќе биде избрана фирмата, ние дури тогаш ќе имаме можност да се вклучиме во целосната постапка. Како општина во која ќе се гради, во зависност од тоа дали се исполнети или не условите за почеток на работите, ќе им дадеме одобрување за градба или не на фирмата - објасни Страшко Хаџи- Коцев, раководител на секторот за урбанизам на Општина Аеродром. Уште пред неколку месеци општинските советници го усвоија деталниот урбанистички план за локалитетот Индустриска зона УЕ В, на која треба да се изградат повеќекатници. Според изготвениот план, зградите треба да имаат во просек по 126 ката, со височина од 500 метри. Стокатниците ќе се наоѓаат на потегот од бензинската пумпа „Макоил“, па се до последните згради на тој простор што влегуваат во составот на општината.