Градска инфраструктура (општо)

Тајмерите од семафорите се отстрануваат
Актуелно, Од терен | 11.09.2013, 10:14




Тајмерите кои стоеја над семафорите и го одбројуваа времето до палењето на зелено светло повеќе ги нема на градските сообраќајници.
Уредите кои на возачите им покажуваа колку време за пауза имаат, уште при самото поставување тие ги оценија како корисни затоа што можеа да проценат дали имаат време да направат нешто во колата, да запалат цигара или пак веднаш треба да се спремат за тргнување, пишува Вечер.
Tајмерите се извадени од семафорите по наредба на Центар за управување и контрола на сообраќајот кој со помош на камери и детекторски индикативни јамки ќе ги диригира зелените периоди на семафорите во зависност од колоните на улиците.




- Поради почнувањето со работа на Центарот за управување и контрола на сообраќајот (ЦУКС), одбројувачите од сите крстосници опфатени со овој систем ќе бидат отстранети. Главната причина за тоа е што при истовремено функционирање на ЦУКС-от и одбројувачите ќе дојде до случај на променливи зелени времиња (поради поголем број возила автоматски од ЦУКС-от да биде продолжен зелениот сигнал, а одбројувачот да го покажува програмираното време за зелено светло) и да настане забуна кај учесниците во сообраќајот, објаснуваат од градот Скопје.
Од таму додаваат дека практиката и од другите европски градови каде што функционираат ваков тип на центри за управување со сообраќајот покажува дека на крстосниците опфатени со овој систем нема одбројувачи.
За воведувањето на Центарот за управување и контрола на сообраќајот на околу 90 крстосници низ главниот град ќе се постават сензори кои ќе ги бројат и ќе ги детектираат возилата. Исто така, ќе бидат поставени и 50 камери преку кои ќе се врши визуелен мониторинг на сообраќајните текови и 47 нови семафорски контролери.
Тоа ќе значи дека во иднина светлосните сигнали на овие крстосници ќе работат во зависност од сообраќајното оптоварување, односно зеленото време нема да биде фиксно како што е денес, туку ќе биде променливо во зависност од бројот на возила кои поминале преку таканаречените детекторски индуктивни јамки.
За меѓусебното поврзување на крстосниците, како и нивно поврзување со Центарот за управување и контрола на сообраќајот е предвидена оптичка мрежа која треба да овозможи пренос на податоците до центарот и обратно. Со формирањето на центарот предвидено е воведување на адаптивна контрола на сообраќајот на околу 90 крстосници.

http://zase.mk/tajmerite-od-semaforite-se-otstranuvaat/