Возен парк (ЈСП - ЛАЗ)

Прокисна уште еден украински автобус

Патниците во автобусот „5“ во понеделникот вечерта отворале чадори за да се заштитат од водата што на некои места капела од таванот на автобусот

ДЕСПИНА ТРАЈКОВСКА



Украинските автобуси повторно ги покажуваат своите слабости, се пожалија неколкумина наши читатели. Тврдат дека во понеделникот во попладневните часови во автобусот што сообраќал на линијата „5“ прокиснувало од сите страни. Згора на се', внатре било речиси темница. Од тие причини велат не можеле да направат фотографија како доказ дека во возилото наместа имало вирови вода од дождот кој непрестано паѓаше попладнето. 

„Се возев од Ново Лисиче кон Центар со автобусот што поаѓа десетина минути пред 20 часот. Кога влегов внатре буквално се збунив, наместа лиеше како од кабел. Имаше патници кои за да се заштитат од дождот отворија чадори. Сакав со мобилен да ја сликам атмосферата во автобусот, но бидејќи од дваесетина внатрешни светилки работеа едвај две-три, не успеав да направам квалитетна фотографија. Но, одговорно тврдам дека се' е вистина. Кога се симнав од автобус ја прочитав регистарската табличка. Станува збор за украински автобусот СК-859-УВ“, тврди наша читателка. За неа е потполно несфатливо како е можно нови автобуси да прокиснуваат.

„Толку пари се потрошија за автобусите и за толку кусо време еве што се случува. Не ми е јасно дали автобусите се неквалитетни, купивме ли вреќа без дно или што е работата“, коментира читателката, која во понеделникот вечерта се возела со украинската „5“.

Од ЈСП „Скопје“ знаат за случајот. Велат дека покривот на автобусот во моментов се санира, а истовремено, превентивно се врши проверка на сите украински автобуси.

„За случајот разбравме уште истата вечер и автобусот веднаш беше исклучен од сообраќај. Со оглед на тоа дека двајца Украинци од производителот ’ЛАЗ‘ веќе извесен период се во Скопје, веднаш ги повикавме да го прегледаат возилото и да го отстранат недостатокот“, вели Мишо Николов, директор на ЈСП.

Тој не беше во можност да објасни од кои причини прокиснувало во „петката“, но најави дека механичарите од ЛАЗ гарантирале дека во иднина тоа нема да се повтори. 

Инаку, ова не е прв пат украинските автобуси да прокиснуваат. Досега во два наврата дожд проби во три возила кои сообраќаа најчесто на линијата „24“. Тогаш, како што рекоа од ЈСП, причина за течењето била фабричка грешка. И во тој случај претпријатието ја искористи гаранцијата на возилата и пропустот беше отстранет.