Дрвјата и оградите сѐ уште се места за заклучување на велосипедите

Од групата скопски велосипедисти „На точак“ велат дека местата каде што може да се заклучат велосипедите привремено, без опасност од оштетување или крадење, се дел од таканаречениот статичен сообраќај за велосипеди

Скопјани се соочуваат со проблемот да немаат каде безбедно да го паркираат велосипедот

Ни недостига урбана опрема за паркирање велосипеди

Неколкуте топли недели ги натераа скопјани да ги извадат велосипедите од своите гаражи или подруми и сѐ почесто да ги користат како превозно средство. Дали до работа, на пазар или до факултет, граѓаните велат дека овој начин на превоз сѐ повеќе им одговара за извршување на дневните обврски и за рекреација во исто време. Она што недостига е паркинг-простор, односно урбана опрема да ги заклучат велосипедите, па граѓаните се снаоѓаат на тој начин што ги заклучуваат за огради, дрва, сообраќајни знаци...

- Работам во Капиштец и најмногу ми се исплати да одам со велосипед, кога временските услови се добри. Пречка е што нема многу велосипедски патеки и паркинзи за велосипеди, па морам да го заклучувам велосипедот во влез или на некоја ограда - вели Елисавета Б. од Тафталиџе.

Од групата скопски велосипедисти „На точак“ велат дека местата каде што може да се заклучат велосипедите привремено, без опасност од оштетување или крадење, се дел од таканаречениот статичен сообраќај за велосипеди и се веројатно втори по важност по велосипедските патеки. Низ општините ретко може да се најдат соодветни паркинзи за велосипеди, односно држачи. Општинските власти велат дека поставуваат вакви држачи и посебна урбана опрема за заклучување на велосипедот, но сепак скопјани се жалат дека дури и низ центарот на градот, каде што има најголема фреквенција на луѓе, тешко се наоѓа соодветно место за да се остави привремено велосипедот.

Фалат места за подолго паркирање

Од групата „На точак“ велат дека во многу училишта, факултети, фирми, јавни институции каде што граѓаните одат да завршат некоја работа, а особено на пазарите, пред банките, кафулињата, најчесто нема паркинг-места за велосипеди, а и кога има не се соодветни, односно се во мал број, со мали димензии или на лоша локација.

- Луѓето се соочуваат со проблемот да немаат каде безбедно да го паркираат велосипедот кога одат до некоја дестинација. Држачите за велосипеди за привремено паркирање треба да бидат поставени на видно место, покрај влез, на осветлено и пристапно место. Држачите треба да се високи за да не мора да се наведнуваме при заклучување и да може велосипедот да се заклучи за рамот, не само за тркалото, кое може лесно да се извади. Профилот на металната прачка треба да биде доволно цврст за да се потпре на неа велосипедот и да не може лесно да се совлада од крадци - велат од групата „На точак“.
Оттаму дополнуваат дека проблем во градот не е само привременото оставање на велосипедите за неколку минути или часа.

- За подолго паркирање (складирање) во период од повеќе часа, во текот на ноќта или повеќе дена, само држачи не се соодветни. Потребно е или место со надзор или затворен простор за складирање, како на пример, посебна просторија или дел од подрум. Најчесто не се предвидени такви решенија, па луѓето се принудени да ги носат велосипедите по скали, во лифт и да ги заклучуваат за оградите во влезовите или да ги носат во стан, со што се демотивира секојдневното користење на велосипедот. Местата за паркирање и складирање на велосипедите мора да станат задолжителен дел од планот на една зграда за да добие воопшто дозвола за градба - велат од групата скопски велосипедисти.

Помала опасност од кражба

Од групата „На точак“ велат дека поголемиот број паркинг-места за велосипеди ќе има влијание и за намалување на кражбата на велосипеди.

- Недостигот од паркинг-места не е единствениот фактор за кражбите, но има влијание. Убедени сме дека поголемиот број соодветни паркинзи на соодветни локации и места за складирање ќе влијаат позитивно и на безбедноста од кражба и на помала штета врз велосипедите и околината со импровизираното паркирање врз тревници, зад дрвја итн. Тоа исто ќе ги охрабри и граѓаните почесто да го користат велосипедот за секојдневно превозно средство - велат од групата „На точак“.

Од општината Карпош велат дека имаат поставено најсовремен вид држачи за велосипеди на плоштадот кај Млечниот ресторан, на плоштадот кај Педагошката академија, плоштадот кај маркетот „Тинекс“ во Карпош 3 и пред истиот супермаркет, во Порта Влае, во Лептокарија, кај пазарчето во Тафталиџе.

- Секаде каде што имало потреба и пред сѐ каде што побарале граѓаните се поставени држачи, како на пример, пред неколку станбени блока на улицата Јуриј Гагарин во населбата Козле. Исто така држачи ќе бидат поставени на плоштадот во Влае кога ќе се изгради - велат одговорните од општината Карпош.
Урбана опрема за заклучување на велосипедите е поставена на неколку локации низ општината Кисела Вода што важат за најфреквентни.

- Велосипедите може да се остават и пред објектот на општината, со што се поттикнуваат и вработените во општината, но и сите други граѓани што почесто да го користат велосипедот како евтино и еколошко превозно средство. Ваква урбана опрема е поставена и пред неколку поголеми маркети на територијата на Кисела Вода - велат од општината.

Во општината Аеродром нема паркинг-места за велосипеди, но оттаму велат дека доколку постои поголем интерес кај граѓаните, овој проект може да се предвиди во програмата на активности на општината.