Спoменик нa плoштaд Maкедoнијa

Многу тајни околу споменикот на Александар Велики на скопскиот плоштад

На конкурсот што помина во голема тајност не било избрано првонаградено решение. Никој не кажува што понатаму

Прашање на висока политичка процена е дали на плоштадот „Македонија“ е потребно во овој момент да се гради споменик на големиот антички војсководец

ДЕСПИНА ТРАЈКОВСКА

Проектот на Општина Центар за изградба на споменик на Александар Македонски на плоштадот „Македонија“ во центарот на Скопје дефинитивно се турка, но во најголема тајност. Доказ за тоа се објавените резултати од меѓународниот конкурс за избор на идејното решение за споменикот пред речиси еден и пол месец во дневниот весник „Нова Македонија“.

Според платената објава во весникот, на конкурсот пристигнале 26 идејни труда, но ниту еден од нив не ги задоволувал критериумите за прва награда. Така, не е избран победник, а се доделени две втори награди, една трета и два труда се откупени. Од Општината подолго време не сакаат да коментираат за досегашните спроведени активности и идните планови во врска со изградбата на споменикот на античкиот војсководец. Ни збор не прокоментираа ниту за платената објава во „Нова Македонија“, иако таа е потпишана од Општина Центар. Единствено, посочија дека во иднина навреме ќе информираат за „новите моменти“.

Претседателот на Советот на Општина Центар, Владимир Здравев, кој според конкурсот е единствениот надлежен да дава информации во врска со споменикот, не одговара на телефонските повици. Тој во изминатиот период, откако стартуваше проектот како да не сака да разговара за проектот. Доказ за тоа се и нашите апели да одговори на уредно испратените писмени прашања адресирани до него(коишто се упатени уште на 26 септември) како и одбивањето да разговара телефонски па дури и лично на темата за споменикот.

Имајќи го предвид молкот на одговорните, во јавноста остануваат неодговорени неколку клучни прашања. Што ќе следува по објавените резултати од конкурсот, дали ќе се распишува нов, или пак споменикот ќе се гради според некое комбинирано решение од второнаградените или откупени трудови.

Не се знае ни кои биле членовите на меѓународното жири чии гласови одлучувале за ликот на споменикот. Непознато е кога ќе почне неговата изградба, кој ќе ја финансира скулптурата, до кога треба да биде готова...На ниво на шпекулација се' уште е дека на конкурсот учествувал и грчки автор, кој се скрил преку колегите од Србија со кои се јавува како група автори на идејното решение...

Останува неодговорено и можеби клучното прашање. Неопходно ли е токму сега да се преземаат активности за изградба на споменикот на најголемиот војсководец среде главниот град кога спорот со Грција околу името ескалира. Можеби и тоа е причината за мистериозниот тек на постапката на проектот.

Инаку, на самиот почеток од најавите на проектот, некаде кон крајот на минатата година кога Советот на Општината ја поддржа иницијативата на нивниот колега Владимир Бахчовановски од ВМРО-ДПМНЕ, кој предложи да се изгради споменикот, Здравев се „расфрлаше“ со детали за кои потоа не изусти ни збор. Тогаш тој посочуваше дека Општината е цврсто решена да изгради фонтана со коњаничка скулптура на скопскиот плоштад, па дури рече дека, доколку е потребно, Општината целосно ќе ги покрие потребните трошоци. Притоа додаде дека можна е и соработка со Владата, градските власти и Министерството за култура кои, наводно, ја поддржале иницијативата.

Владиниот портпарол Ивица Боцевски само накусо ни одговори „немам никакви сознанија за проектот“.