Авиокомпании и линии

МАКЕДОНИЈА ГО СОНУВА ДВОДЕЦЕНИСКИОТ СОН ЗА НАЦИОНАЛНА АВИОКОМПАНИЈА

Свој знаменосец на небото или познат авиобренд

Познавачите на состојбите сметаат дека имаме квалитетни пилоти и друг стручен кадар кој веднаш би дошол од странство ако се формира национален авиопревозник во кој би се вработиле од 100 до 150 лица кои би примале плата во Македонија

Македонскиот авиосообраќај е пред нова фаза по дводеценискиот турбулентен период кој го обележаа набрзина направени домашни авиокомпании и уште побрзо приземјени. Владата почнува процес кој е сон на нашата држава, да се испита можноста дали е исплатливо и кои се бенефитите што ќе ги донесе национална авиокомпанија која би летала под македонско знаме и би ја промовирала државата, која ќе го помогне развојот на домашната авиоиндустрија, ќе донесе бенефит со нова флота авиони, нови вработувања, дестинации, а ќе овозможи просперитет и на други пропратни дејности.

Познавачите на состојбите во македонскиот авиосообраќај велат дека со модерни аеродроми и милион патници сега е вистинското време да се најде компанија која ќе го врати стручниот кадар во земјава.
- Доколку државата се одлучи да субвенционира и доколку се најде тим кој рационално ќе ја води таа авиокомпанија, ја поддржувам таа идеја. Пред 15 години 100 милиони евра беше мисловна именка, но денес очигледно е сума која може Буџетот да ја поднесе за национална авиокомпанија. Индиректно парите би се вратиле преку вработувањата. Би се вработиле 100 до 150 лица кои би примале плати во Македонија. Би се вратил стручниот пилотски и технички кадар, вработувања ќе има и на администрација во самата компанија. На индиректен начин субвенциите од државата не би се потрошиле бадијала, а компанијата би функционирала - вели директорот на претставништвото на "Адриа ервејс" во Скопје, Момир Рафајловски.

И Вања Битољану, кој ја формираше "Пал ер", прва домашна авиокомпанија во независна Република Македонија, вели дека веќе 25 години се залага за тоа да имаме национален авиопревозник.
- Апсолутно дека ни е потребна македонска авиокомпанија бидејќи може да донесе само бенефит, како што е нови вработувања, пораст на националниот доход, отворање на нови дестинации кои ќе ги прошират деловните врски. Но, за тоа е потребен амин од Владата. За формирање на национална авиокомпанија треба помалку пари од тие што државата ги дава за субвенционирање на "Виз ер" - вели Битољану. Македонија има квалитетен воздухопловен кадар (капетани, пилоти), обучувани на просторите на поранешна Југославија, но тие луѓе, поради неможноста да работат во својата земја, заминаа по светот. Со нивното враќање во земјата би се направила квалитетна авиокомпанија.

За македонска национална авиокомпанија се залагаат и од концесионерот на двата домашни аеродроми, турската ТАВ Холдинг. уште пред три години откако ги презедоа аеродромите, главниот оперативен директор на ТАВ Холдинг и на ТАВ Македонија, Мурат Орнекол изјави дека национален авиопревозник е клучен за евтини летови.
- ТАВ сака да им конкурира на аеродромите од соседните земји и да ги привлече авиокомпаниите со кои работи во другите земји. Но, не заборавајте дека самите компании одлучуваат за цените на летовите. Ако немате национален авиопревозник, тогаш ја губите шансата да добивате летови од другите земји, поради обврските од билатералните договори. Се обидуваме да привлечеме компании да дојдат во Македонија и да формираат национална авиокомпанија. Во спротивно, авиосообраќајот ќе биде блокиран - рече тогаш Орнекол.

Национален превозник подобро од евтин
Кон средина на минатиот месец Владата донесе одлука да се ангажира консултант кој ќе прави анализа на пазарот, дали познати брендови во авиобизнисот се заинтересирани да оперираат преку стратешко партнерство со државата.
- Заедно со Владата да ги ставиме на хартија сите оние услови кои може Владата да ги понуди. На пример, дополнителни субвенции, специјално најдобрите линии да бидат резервирани за тој авиопревозник и други поволности што би можеле да се понудат. Кога ќе направиме целосна анализа, потоа е предвидено да се направат неколку роуд шоуа, каде што тој пакет како можност за воспоставување на база во Македонија ќе се понуди до поголем број светски познати авиокомпании, европски и надвор од Европа - вели министерот за транспорт и врски, Миле Јанакиески.

Рафајловски смета дека е опцијата национален авиопревозник е подобра од сегашното решение со субвенционирање на нискотарифниот "Виз ер".
- Евтиниот превозник не секогаш е евтин. Тој е евтин само на почетокот кога ќе започнете да патувате, но скап е на крајот и не ги поврзува главните центри и лета до споредни градови. Нискотарифниот го подигна нивото на авиосообраќајот, го зголеми бројот на патувања, се појавија нови типови на патници кои до вчера не патуваа. Ним не им е важно зошто патуваат, туку патуваат кога ќе најдат евтина цена на летот. Тоа е нова категорија на патници кои ќе останат авионски патници, но тоа не е долгорочно и она што и треба на една држава е директна поврзаност со центрите, со главните аеродроми каде има политичка и економска комуникација - вели Рафајловски.

Тој смета дека во суштина секој редовен превозник каде во 80% од случаите не е национален, се мачи да ги покрие годишните биланси.
- Кога би се поставила базата на една компанија согласно капацитетот на државата и би се поврзале со одредени главни центри во Европа кои и се неопходни на нашата држава, тоа би било порационално отколку да плаќаме евтини авиопревозници кој не го нудат квалитетот што се бара - смета тој.