Originally posted by Makedonij Ќе се обновува манастирот Св.Стефан во Конче, а се градат и нови конаци во манастирот по који селото го носи името. На околу 20 километри јужно од Радовиш, по вијугавиот пат што ги сече родните полиња,што погледнати озгора изгледаат како распослани сликарски платна, преку прекрасните шарени ливади закитени со црвени булки, ќе стасате до селото Конче. Тука, во ова село, живописната природа и мирниот селски живот го облагородиле љубезниот селанин-тутунар, кој, во часовите на одмор, секогаш отворен за посетители, е подготвен и расположен да ве покани во својот дом и да ви зборува за познатиот селски манастир, како и за самото село. Тој, пренесувајќи ги приказните на своите предци, раскажува дека селото го добило своето име по големите и убави конаци кои постоеле околу манастирската црква. Во големиот и ограден двор, под дебелата ладна сенка на двовековниот јавор и старите и раскошни корпи на ореовите дрва, покрај чешмата со ладна вода, денес сочувани се црквата Свети Стефан, кулата-пирг која во голем дел е оштетена, како и еден конак изграден во поново време. Убавината и мистичноста на манастирот ги надополнува и приказната за Кантакузина, ќерката на деспотот Ѓурѓе, која тука ги минала последните години од својот живот, престојувајќи во кулата веднаш до црквата. Бидејќи кулата, или или пиргот како што ја нарекуваат селаните, немала влез однадвор, Кантакузина морала да влегува и излегува преку еден подземен тунел што водел од под олтарот на црквата до кулата. Во близина на пирг-кулата се наоѓа и нејзиниот гроб. Точниот датум на градење на црквата не е познат. Единствено се знае дека таа е изградена пред 1366 година, бидејќи тоа е годината кога манастирот, со една хрисовуља на цар Душан, бил приложен на Хиландар. Нејзин градител, или пак обновувач, е познатиот војвода Никола Стањевиќ. Внатрешноста на оваа црква, со форма на впишан крст и со купола врз осмостран тамбур, денес во поголем дел е малтерисана и варосана, додека од првобитниот живопис е сосема малку сочувано. Иконите на иконостасот се изработени од страна на зографот Димитар Андонов Папрадишки.

Хортикултурно уредување на манастирот Св. Стефан во Конче

Со проектот се овозможува партерно и хортикултурно уредување на овие два локалитети, подобрување на условите за вековното, традиционално собиралиште на луѓето од овој крај и пошироко, а исто така се очекува да се зголеми и туристичката посетеност на овие два манастирски комплекса од граѓаните на Југоисточниот и Источниот плански регион, како и други домашни и странски туристи.

Носител на проектот е Центарот за развој на Југоисточниот плански регион, а партнери во реализацијата на проектот се општина Конче и општина Радовиш.

Црквата „Св. Никола“ во Љубанци ќе добие нова камбанарија

Црквата „Св. Никола“ во скопското село Љубанци ќе добие камбанарија, која ја донира Јохан Тарчуловски и неговото семејство. Нејзините темели денеска ги освети митрополитот повардарски г. Агатангел со свештеници од Скопската епархија на МПЦ, во присуство на жителите на селото и на голем број гости.

Меѓу нив беше и министерката за култура Елизабета Канческа-Милевска која изјави дека со изградбата на камбанаријата ќе се заокружи целиот комплекс на црквата „Св. Никола“. Најави и реконструкција на конаците од манастирскиот комлекс кој се наоѓа во ова село на Скопска Црна Гора.

- Црквата „Св. Никола“ е од 19 век, а до неа има и црквичка од 16 век, која е целосно конзервирана од Националниот конзерваторски центар. Со изградбата на камбанаријата ќе се заокружи целиот комплекс. Министерството за култура со надлежната институција почна  и со реконструкција на конаците на манастирскиот комплекс „Св. Никола“ во Љубанци. Веќе се завршени проектите и во јуни ќе се објави тендер за избор на фирма за демонтажа на конаците, се со цел по добивањето на конзерваторското одобрение на проектот за реконструкција во 2015 година да започнеме со целосна реконструкција на манастирските конаци со кои ќе се привлечат и наши граѓани и туристи, рече Канческа-Милевска.

Во камбанаријата ќе биде вградено ѕвоно од еден тон што се чува во селото, а денеска беше изложено во дворот на црквата. Ктиторот на камбанаријата Тарчуловски истакна дека таа е голема радост за  жителите од неговото село и за црквата зашто од таму, како што рече,  почнува убавото и среќата во селото.

- Денешниот ден е голема радост за сите нас, за селото Љубанци каде што сум роден, за црквата „Св. Никола“ каде што сум крстен, каде што се венчани моите родители. Од дете сум израснат тука и отсекогаш ми било чест и задоволство да можеме сите заедно нашата црква да ја подигнеме на повисоко ниво и животот во селото да го направиме христијански, уште побогат и повесел, изјави Тарчуловски по чинот на осветување на темелот, на кој присуствуваа и градоначалниците на Град Скопје и на Општина Бутел, Коце Трајановски и Петре Латиновски.

Владиката Агатангел го пренесе благословот на поглаварот на Македонската православна црква г.г. Стефан и истакна дека камбанаријата ќе биде дел од секојдневието на жителите на Љубанци зашто ќе ги повикува за радост, за жалост и ќе ги буди за молитва.

- Ѕвоното од еден тон ќе го слушаат и околните села, можеби и долу до Радишани и до Бутел. Со неговото ѕвонење и наутро и напладне, народот ќе го повикаат на молитва, а преку молитвата која е разговор со Бога, ќе се смируваат и ќе го најдат мирот во душите и срцата, рече владиката Агатангел.

Фото: А.Ивановски

извор:Република