Претседателот на Стопанската комора на Македонија Бранко Азески, рече дека мора да се зголемат јавните инвестиции во железницата бидејќи таа е основниот крвоток кој што е потребен  за понатамошниот развој на бизнисот во Македонија.

“Ние сакаме да предложиме сериозен пресврт во тој дел каде што државата мора многу по озбилно и со многу поголеми средства да интервенира во инфраструктурата со што би ги повлекла и стопанските субјекти и самата железница внатре да направат нешто повеќе и во делот на изградба на терминалите и  на транзитот низ Македонија“, изјави Азески.

На прашањето зашто инфраструктурата на железницата е во катастрофална состојба, директорот на МЖ- транспорт АД Скопје Благоја Крстевски одговори дека железничката инфраструктурата е во таква состојба бидејќи во последните години воопшто не е вложувано.

“Гледајќи ја потребата, Владата на Република Македонија зазема став  дека е потребно да се вложува во железничката инфраструктура и не само во неа туку и во влечните и во влечените капацитети, кои се во надлежност на Македонски железници – транспорт АД Скопје“, изјави Крстевски.

Крстевски додаде дека ќе има вложувања во товарниот сообраќај  каде во програмата на владата веќе е влезено со кредит од Светска банка да се купат нови 100 вагони, но и вложувања во патничкиот сообраќај за подобрување на квалитетот на превозот.

На прашањето дали парите што се одвоени од Буџетот на Македонија се доволни за развојот на железницата, Крстевски рече дека во железница во која не е вложувано 25 години не можат да бидат доволни средствата од само една буџетска година.

Тој потенцираше дека конечно во железницата ќе се вложува, бидејќи за прв пат владата на Македонија одвојува буџетски средства за покривање на нерентабилниот патнички сообраќај, со што ќе се овозможи за товарната компанија да се ослободат повеќе средства за нејзин сопствен развој.

“Буџетските средства за покривањето на нерентабилните линии во патничкиот сообраќај изнесуваат 4 милиони евра“, додаде Крстевски.    

За потсетување, ЈП “Македонски железници“ во 2007 година се трансформираше во два нови субјекти, Јавно претпријатие за железничка инфраструктура “Македонски железници“ и Акционерско друштво за транспорт “Македонски железници – Транспорт АД“, кои и понатака функционираат како еден интегрален систем.

http://www.netpress.com.mk/vest.asp?id=45369&kategorija=2

Државите од Западен Балкан треба преку реализација на заеднички проекти да го подигнат нивото на функционалност на своите железници бидејќи само на тој начин ќе можат да ги надминат транспортните проблеми. Само со добра железничка инфраструктура во сите овие држави, тие ќе можат да привлечат странски оператори кои ќе вршат добро организиран железнички транспорт. Ова беше кажано на вчерашната трибина во Стопанската комора на Македонија каде се говореше за железницата која треба да добие приоритет во јавните инвестиции и да стане корисна за бизнисот.

Антони Пешев од компанијата Ултра побара да се направат законски измени што ќе овозможат либерализација на железничкиот сообраќај и влез на повеќе оператори по примерот на Словачка, Чешка и Полска.
-Со ваква технологија и однос кон железницата тешко дека ќе можат да се направат драматични промени. Ако се продолжи со ваков однос, наскоро Македонија ќе биде заобиколена на железничката карта - истакна Пешев.

Иако состојбата со железничкиот транспорт и инфраструктура во земјава не е розова, сепак, како што истакнаа директорите на двете претпријатија што произлегоа од ЈП Македонски железници, МЖ Инфраструктура и МЖ Транспорт, состојбите кај нас се многу подобри отколку во Србија и Грција.
-Македонија е транзитна земја. Не можеме само кај нас да го подобриме транспортот и инфраструктурата, а тоа да не го направат во Србија каде состојбата со пругите е катастрофална, посебно на делот од Табановце до Ниш. поради што се вози многу бавно. Се случува на релацијата Скопје Белград возот да сообраќа и по 12 часа-укажа Благоја Крстевски, директор на МЖ Транспорт.

Тој посочи дека голем хендикеп е и тоа што имаме едноколосечна пруга, што пак значи целосно нејзино затворање кога треба да се интервенира, а посочи и на честото затворање на солунското пристаниште што многу влијае на континуитетот во работењето на ова транспортно претпријатие. Крстевски побара државата паралелно да инвестира во инфраструктурата на железницата и да ги покрива загубите во патничкиот сообраќај што се прават на одредени траси во патничкиот сообраќај, за што во наредниот период државата ќе одвои четири милиони евра.
Во пругите не е инвестирано триесетина години, а поради нередовното одржување низ нив се вози со просечна брзина од 80 километри на час, иако се проектирани за брзина од 120 километри на час. Парите што Инфраструктура ги добива од Буџетот и од давање услуги не се доволни да се покријат трошоците во работењето.