Стадион под Тумбе Кафе - Битола

*Деновиве на стадионот во Битола ќе почне изградба на двете монтажни трибини зад головите, нешто налик на „Младост“ во Струмица. Проект вреден 500.000 евра кој преку ФФМ е донација на УЕФА

Убава вест за сите фудбалски вљубеници во Битола, во градот на конзулите. Имено прашање на денови е кога ќе стартува изградбата на двете монтажни трибини треба да никнат зад головите на стадионот под „Тумбе Кафе“ во Битола. Со ова и конечно и дефинитивно се заокружува проектот наречен „Нов стадион во Битола“. Проект кој со  децении се чекаше од страна на сите во Битола, но и на сите искрени љубители на фудбалот во Македонија.

НАЛИК НА СТРУМИЧКИОТ „МЛАДОСТ“

Ова не е ништо ново, барем од аспект на ваков вид на трибини. Имено ова треба да биде нешто налик на она што беше изградено во Струмица, на стадионот „Младост“. И токму затоа овој стадион доби висока оценка и затоа на него се играат натпревари од европски карактер. Да потсетиме дека таму се играа натпревари од квалификациите во Лигата на Шампионите и Лигата на Европа, а таму играше и ќе игра и нашата најдобра фудбалска репрезентација. Е сега откако се виде дека тој проект е успешен, се применува и во Битола. Никнуваат нови монтажни трибини и со ова, како што веќе напоменавме, заокружува проектот на ново под „Тумбе Кафе“.

ФФМ И УЕФА СО ПРОЕКТ ВРЕДЕН 500.000 ЕВРА

Деновиве почнува со изградба и би требало да биде се готово оваа пролет. Е сега кога ќе се пуштат во употреба останува да се види, секако дека битолчани со нетрпение ги очекуваат новите трибини. И треба да се каже дека целиот овој проект е со вредност од 500.000 евра и е донација на УЕФА, тоа е дел од програмата на Европската куќа на фудбалот, секако дека тука главен збор има и Фудбалската Федерација на Македонија. Поточно ова е проект на нашата Федерација која одлучи да се вклучи во реновирањето или изградбата на стадионот во Битола.

РЕФЛЕКТОРИТЕ ВЕЌЕ СЕ ПОСТАВЕНИ

Се ова треба да биде во насока конечно Битола да добие еден модерен, убав стадион од највисок ранг. Стадион кој би требало да има капацитет од некаде 12.000 гледачи, сосема доволно за потребите на љубителите на фудбалот во Битола но и на Фудбалскиот клуб Пелистер. Инаку познато е дека пред извесно време, пред неколку месеци поставени беа и рефлекторите на стадионот, па така кога ќе се создадат барем и минимални услови за одигрување на натпревари, истите ќе можат да се играат и во вечерни термини, под светлоста на рефлекторите. Нема што, кога се ќе биде готово, новиот и модерен стадион под „Тумбе Кафе“ нема да биде само во ново руво, туку овој стадион и во вистинска смисла на зборот ќе блеска. Секако на задоволство на сите нас но најмногу на задоволство на битолчани.