Моделарство

Дипломираниот математичар од Прилеп Емил Димоски, додека чека вработување, со плитари што сам ги прави и со пинцета изработува автентични селски куќи

Емил Димоски е еден од многуте млади невработени луѓе во градот под Марковите кули. Дипломирал на Природно математичкиот факултет група математика - физика со просек над 9, бил првенец на генерацијата, ама работа нема. Сега е постипломец на бизнис администрација на прилепскиот Економски факултет.
Слободно време колку сакаш, вели за себе Емил, па го пополнува со часови по математика за средношколци и со неговото необично хоби - од природни материјали изработува минијатурни селски куќи со автентичен изглед.
- Уште од мал ме интерсираше селската архитектура, сакав да знам како е граден каминот, или како се пече леб под црепна. Тоа ме фасцинирало и од од пред две години почнав да изработувам минијатурни куќи, онакви како што ги знам, како што сум ги запаметил. Значи мотивите ги црпам од селото, од старите селски куќи, на чии зидови висат низи со тутун, по собите триножни сточиња, фурни и бунар во дворовите, со амбарите и пондилата.
Предизвик ми се селските куќи зашто кај нив доаѓаат до израз материјалите од кои се градени, за разлика од денешната современа архитектура, под чија фасада не се знае што се крие, вели 25 годишниот прилепчанец Емил Димоски. Досега тој изработил минијатурни куќи кои и денес постојат во селата Сарандиново, Беловодица, Новоселани..
Младиот ентузијаст сам го прави и материјалот за куќите. Со калапче, од кал измешана со слама, прави плитари, кои потоа ги суши на сонце. За една куќа требаат околу 500 парчиња, кои овој неуморлив млад човек трпеливо ги реди со пинцета. Затоа, во зависност од големината на куќата и деталите кои ги употребува една куќа гради и до еден месец. Сите материјали што ги користи се природни, место трева става мов, делкани парчиња момирок се замена за керамиди, а за чардаците на куќите користи старо дрво со влага заради автентичен изглед и селскиот амбиент.
На една од куќите, иако минијатура се гледа дури и мрежата на прозорецот за заштита од инсекти. Тоа е некогашна куќа на Рид во Прилеп , куќата во која детството го минала неговата мајка. Ја изработил да ја потсетува на најубавите мигови од животот и и ја порадарил за роденден.
- Вака изгледа сега, но ќе ја направам и онаква каква што била пред да се урне, по слики, раскажува Емил.За неговото необично хоби тој вели: "Не може да ти се здосади и цел ден да работиш, може само рацете да ти се здрват редејќи плитар по плитар... Задоволството расте како што се зголемува објектот што го правиш, а со секое ново дело се повеќе и повеќе се усовршува мајсторијата".
Досега има изработено дваесетина експонати. За добар дел од нив имало интерес да бидат купени, но тој себично ги чува, се додека не направи доволно куќарки да организира самостојна изложба. Предизвик му е да го изработи манастирот Трескавец.
Неговите дела биле забележани и од стручни лица во прилепскиот Заводот и музеј, и во соработка со Републичкиот завод каде се не е исклучено да изработува и евидентирани стари селски куќи во Мариово.
Трпеливиот и очигледно надарен млад човек вели дека во неговото хоби нашол мир од секојдневните проблеми што ги носи животот.

Vest - Вера Тодороска - 21.01.2006