ТИРЗ Скопје - Бунарџик

Владата молчешкум доделила 6.000 квадрати во Бунарџик Фабрика за производство на фармацевтски производи ќе никне во слободната зона „Скопје“ поранешен Бунарџик, дознава „Нова Македонија“. Без вообичаената помпа кога станува збор за инвестициите, Владата неодамна на фирмата „Еуро хормонес“, регистрирана во Валандово, и доделила повеќе од 6.000 квадратни метри во слободната зона „Скопје“, по цена од 0,1 евро за квадрат. „Еуро хормонес“ го добила земјиштето на долготраен закуп за период од 50 години, со можност за продолжување за уште 25 години. Фирмата за првите пет години ќе треба да плати по околу 615 евра годишно, а според владината одлука, по истекот на првите пет години, закупнината за земјиштето ќе се одредува за секоја година посебно, со можност за зголемување во зависност од инфлациската стапка во Македонија. Сепак максималната граница за зголемување за закупнината не може да надмине 15 отсто на годишно ниво. Марјан Јованов, директор на Дирекцијата за технолошко-индустриски развојни зони, потврдува дека фирмата „Еуро хормонес“ добила земјиште во слободната зона „Скопје“. - Се работи за компанија формирана од англиски, словенечки и словачки инвеститори. Во зоната ќе градат капацитет за производство на фармацевтски производи, а инвестицијата се проценува на околу 10 милиони евра. Изградбата ќе почне веднаш - вели Јованов. Според него, целокупното производство од фабриката ќе оди за извоз. Никола Чурлиновски, градоначалник на Валандово, вели дека пред извесен период македонски инвеститори регистрирале фирма во Валандово за да градат капацитет за производство на фармацевтски производи, меѓутоа потоа се премислиле. Во Бирото за лекови велат дека за изградба на фабрика за фармацевтски производи е потребна дозвола, која се издава дури откако ќе завршат градежните работи. Илчо Захариев, директор на Бирото за лекови, вели дека петчлена комисија, во која членуваат пет лица обучени во Лондон со меѓународни сертификати, утврдува дали во одредена фабрика се запазени стандардите пропишани од Светската здравствена организација. - Се работи за стандарди што се напишани на 10.000 страници. Инспекторите мора да внимаваат на сите можни безбедносни и еколошки детали. Во овој случај сигурно ќе ангажираме и независен меѓународен експерт - вели Захариев.

http://www.novamakedonija.com.mk/DesktopDefault.aspx?tabindex=3&tabid=2&fCat=1&top=1&EditionID=272&ArticleID=14355

Па добро тоа е симболична цена само колку да не биде без ич! И да беше безпари ќе беше ОК, со оглед на тоа што ваквите објекти ја потрепуваат економијата и поттикнуваат извоз, вработувања, и го заслужуваат беспари просторот!

Како што и тогаш пред 5-6 месеци кажав, премногу лесно се возбудуваме и понесуваме од разноразни најави и политички говори. Тогаш некои не убедуваа дека нема пак да се случи милијардата на Циле, Ауди и слично. Прво се скока па се вика ОП. Ни се наметна слика дека сме РАЈ за инвестирање во Европа, па уште и дека немало слободни парцели во Бунарџик, дека уште 5-6 зони ќе сме правеле и што ти ја знам што. Од преголемите мечтаења и „сигурните“ зделки ги губиме, сериозни инвеститори како ЕВН ги третираме крајно несериозно, поништуваме тендери, се расфрламе со промашени кампањи.

Originally posted by beTon ниедна кампања не е промашена кампања, уште повеќе што досега не ни постоела некаква, освен по црните хроники низ светот!  патем некој како EVN што те цеди не е сигурен инвеститор туку сигурен експлоататор. инаку реално бевме тргнати на добар пат, но кој ни е крив што навреме не понудивме реално привлечни услови, а и не почнавме агресивна кампањи за инвестирање во МКД нешто што е многу нормална работа во светот, вака таман се залетавме и статива, светска криза дрн дрн јариња... а реално проблемот не е ни во дискутабилните најави за инвестициски бум или нереализираните гринфилд инвестиции, ниту во светската криза или пак предвременото скокање, туку во нашата фантазија дека спасот ни е во слободните економски зони! ова треба да биде само дел од стопанството, но за да се исправиме на здрави нозе крајно време е да се свртиме кон интензивно земјоделие и силна прехрамбена индустрија, но на готови производи, а не само суровина или полупроизвод. после некој ни е крив што бугарите продаваат ајвар со македонски пиперки, исто мора да се поработи на менаџирање и форсирање на органското производство на храна, и МКД да се етаблира како здрав и сигурен извор на храна бар за европа, но тоа значи нафурување исто онолку колку што се нафуравме за овозможување простор, расчистување терен и кревање џева за странските инвестиции... да нема забуна поентата ми е дека премногу се имаме улежано и полагаме исклучиво надеж на влез на некаков странски капитал, не дека истиот не е добредојден, но не треба толку да се палиме на истиот, па сетне и во најмала неволја да се фрлиме во целосен очај и паника.

Кампањата е промашена доколку не е поткрепена со факти на терен. Инвеститорите не влегуваат заради шарени флаери и веб сајтови туку заради поволни услови и долгорочна перспектива кои ќе гарантираат профит за нив. Колку е од тоа исполнето можеме многу да дебатираме особено по последните неколку пропаднати тендери.

А навистина незнам зошто ЕВН е експлоататор? Па зар треба да ја дели струјата бесплатно? Незнам дали ЕВН ги исполнил сите очекувања но мислам дека во најмала рака не заслужува да биде постојана мета и да се дискредитира. Телеком на пример тоа си го заслужи и те како своевремено...

@beTon

хмммм од каде да почнам....

 

ниедна кампања не е промашена кампања, уште повеќе што досега не ни постоела некаква, освен по црните хроники низ светот!

Изгледа јас и ти не живееме во иста држава????

Како прво, кампањите кои одат по сите можни ТВ станици и весници и кои се финансираат од парите кои јас и мојата компанија ги уплаќаме во илјадници евра во најголемиот дел 99% имаат само една цел: ЗГОЛЕМЕН РЕЈТИНГ НА ВЛАДАТА и ништо повеќе. Ќе дадам и примери:

-       Рекламите во кои оди текст долг километар и во кои 100 пати се споменува што направила владата и на крај завршуваат со клишето: Влада на РМ, Претседател на РМ ....

-       Кампањата Инвест ин Мацедониа, која не чинеше 10тици милиони а не донесе ништо

-       Ти си Македонија – незнам ни што е поентата на оваа реклама

-       Спотот кој трае пола саат за Александар и неговата војска

-       Фашизоидниот спот со молитвата на Македоноидот

-       .......Ред други да не добие постот политичка конотација

Значи извини, тоа се и мои пари и јас не сакам да се трошат безмилосно на овој начин.

 

патем некој како EVN што те цеди не е сигурен инвеститор туку сигурен експлоататор.

Тоа дали е ЕВН експлоататор или инвеститор е прашање од филозофска природа. Реалноста е дека Владата на РМ (точно претходната не оваа) го продаде ЕСМ на ЕВН. Тука постојат низа правни и финансиски процедури кои го прават ЕВН 100% легитимен странски инвеститор во РМ. Истиот тој ЕВН е водечка компанија во енергетскиот сектор во Австрија, и тоа како влијателен во Централно-Европските бизнис кругови. Ниските удари од типот јавно препукување на премиер со нив, поради лична суета, прави штета што 10 кампањи Инвест ин Мацедониа, нема да можат да ја исправат.

Патем кога сме кај енергертскиот сектор да не заборавиме и на последните разочарувачки изјави од РВЕ, за несериозноста при тендерската постапка за изградба на Чебрен и Галиште (http://a1.com.mk/vesti/default.aspx?VestID=104032)

 

а реално проблемот не е ни во дискутабилните најави за инвестициски бум или нереализираните гринфилд инвестиции, ниту во светската криза или пак предвременото скокање, туку во нашата фантазија дека спасот ни е во слободните економски зони!

 

Со овој дел 100% се сложувам. Позитивна клима за бизнис се создава подеднакво за сите без дискриминација дали се домашни или странски инвеститори. Позитивната бизнис клима подразбира брзи и експедитивни институции на ситемот (Катастри, Министерства, Локална самоуправа, судство) кои секогаш во најкраток рок и најпрофесинално ќе одговорат на потребите на секој во Македонија, не само поединечно на одредени 2-3 инвеститори. Позитивна бизнис клима ќе има кога владата ќе ја намали јавната потрошувачка на несуштинските проекти (од типот споменици, цркви, музеи, партиски вработувања...). Максималистичкиот буџет и макслималистичкиот трговски дефицит мора од некаде да се покрие. Знаеш ли од каде? Од сите нас како поединци, и од сите компании во Македонија. Тоа е големо оптеретување, и кога веќе го плаќаме сите, тие пари треба да одат онаму каде што е напотребно. Изградба на инфраструктурни проекти, зајакнување вистинско на институциите на системот, суштинско а не декларативно подобрување во образовниот систем.

 

Целата економска политика до сега ни се сведуваше 99% на бркање странски инвестиции кои требаше да одговорат на овие проблеми. Но нив ги нема и сега наместо да се фатиме од корен да ги поправиме грешките ние се вртиме на бркање вештерки и подигање на национализми.

 

види рецептов со кампањиве е америчкиот, патем на тоа ја научија денешнава власт самите амери кои ги советуваа како да ги водат самите изборни кампањи, а можеби и ги советуваат како сега да ги водат истите вон или пред изборно. факт е дека рекламните кампањите како појава се доста силно средство за туркање на некоја идеја, но колку, како и дали таа идеја ќе се протурка тоа е друга работа. она со фискалните мислам дека беше најуспешна досега а воедно и најквалитетно и најкреативно направена, јасно треба и услови за истата да заживее пример фискални каси и редовни контроли, истои другите кампањи имаат ефект но дека истиот треба да донесе пресфртот тоа ниту е логично ниту пак возможно освен ако не станува збор за нешто навистина практично и корисно, односно образовните и економските кампањи за да имаат ефект мора да бидат долгорочни а не само инцидентни испади, затоа треба на овие кампањи да се гледа повеќе како нешто нормално него како на нешто ненормално, единствено треба транспарентност околу трошењето за средства на истите и постојано да се анализира кој модалитет на кампања ќе донесе најголем ефект односно која комбинација на промовирање ќе биде нај исплатлива.

јасно мора работа и мора да се зголемува капацитетот на државава на сите нивоа, но мора и напоредно да се работи на ликувањето односно шарените фустани народски гледано во однос на кампањите. 

интересно е колку само до вчера немавме никакви долгорочни стратегии во ниедна област така и со маркетингот, се само краткорочни испади од привремен карактер, но сега работите малку се променија иако треба навистина време да натераш некого прво да го сврти погледот на твоите крпчиња а дури сетне да ги купи, и повторно ако во меѓувреме истиот тој не банкротил!

Светла точка ! Само напред, дај боже ситуацијата да ми ги демантира сомнежите.

http://a1.com.mk/vesti/default.aspx?VestID=105515

не знам како ова не сме го евидентирале,од официалната страна на зоната е [11.11.2008]

"Intel" ќе инвестира во Македонија

Американскиот гигант во информатичката технологија "Intel" ќе инвестира во образованието во Македонија, за што синоќа во Сан Франциско Владата на Република Македонија и компанијата потпишаа Меморандум за разбирање. Со овој Меморандум треба да имаме поддршка од "Intel" со одредени инвестиции во образованието, изјави премиерот Груевски по потпишувањето на документот со претседателот на Управниот одбор на компанијата на кого македонската владина делегација која престојува во САД му ги презентира можностите за инвестирање во Македонија. Раководството на "Intel", јави известувачот на МИА, било запознаено со инвестициските можности од секаков аспект, пред се даночен, но и за тоа дека македонската Влада инвестира многу во ИТ образованието, при што биле посочени детали во врска со зголемувањето на квотите на студенти по информатичка технологија, како и за отворањето нов информатички универзитет кој од октомври 2009 година ќе почне да работи само на англиски јазик. - Сите овие инвестиции во образованието упатуваат на тоа дека големите мултинационални компании, особено оние од ИТ бизнисот, можат во иднина да сметаат на Македонија како одлична бизнис дестинација, истакна премиерот Груевски, додавајќи дека за компаниите е важно не само да им се овозможат ниски даноци или брза регистрација, туку да им се понуди и добар кадар, и по квалитет и по квантитет. Тој изрази благодарност до американскиот амбасадор во Македонија Филип Рикер кој, како што рече, со неговото доаѓање со владината делегација на оваа работна посета на САД дава поддршка во овие наши напори да привлечеме компании да дојдат во нашата држава, да отворат нови работни места и да се продлабочат економските релации помеѓу Америка и Македонија. Македонската владина делегација, во чиј состав се и вицепремиерот задолжен за економски прашања Зоран Ставрески, министрите за економија, за странски инвестиции и за информатичко општество, Фатмир Бесими, Веле Самак и Иво Ивановски, и директорот на Агенцијата за странски инвестиции Виктор Мизо, во Сан Франциско имаше средби и со раководствата на американските гиганти  "Hewlеtt Packard", "Oracle" и "Sun Microsystems".

„Џонсон Мети“ наскоро стартува со пробно производство во „Бунарџик“

Деновиве се очекуваат претставници на „Тривју“ и на „Хаер“ со кои Владата ќе потпишува договори за закуп и бенефиции

Маја Томиќ

Англиската „Џонсон Мети“ многу скоро ќе стартува со пробно производство, а ова лето од фабриката во зоната „Бунарџик“ се очекува да започне и редовното производство на катализатори за автомобили, наменето за странски пазари. Ова за „Утрински“ го изјави вчера Виктор Мизо, директорот на Агенцијата за странски инвестиции. Тој додаде дека објектот што го гради „Џонсон Мети“ е во завршна фаза, машините се донесени и поставени и многу скоро ќе има тестирање, за по неколку месец да започне редовниот процес на производство кое ќе се извезува во повеќе европски земји. Вкупната инвестиција на „Џонсон Мети“ се проценува на 150 милиони евра, од кои во првата фаза ќе се потрошат 55 милиони евра, а втората фаза „Џонсон Мети“ ја најави за по две години. Се проценува дека ќе бидат вработени околу 700 лица. Инаку, „Џонсон Мети“ има договор за закуп на 13,8 хектари од „Бунарџик“, дадено на користење од 50 години, со можност за продолжување од 25 години.

Уште една странска инвестиција наскоро се очекува во „Бунарџик“, а тоа е заедничката инвестиција на корејската „Тривју“ и на кинеската „Хаер“, кои според Мизо треба деновиве да испратат свои претставници во Македонија и да се потпишат договорите за закуп на земјиштето и за бенефиции за користење на зоната, согласно со Законот за слободни индустриски зони, со кои ќе се утврди динамиката на реализација на инвестицијата.

Инаку, компаниите неодамна склучија договор за заедничка инвестиција во „Бунарџик“. Минатата есен Владата потпиша меморандум за разбирање со „Тривју“, со кој компанијата најави инвестиција од 4 милиони евра. Како дополнителна поволност Владата ја оцени одлуката на компанијата да влезе во заедничка инвестиција со „Хаер“. Двете компании веќе имаат готов проект за производство на ЛЦД-монитори и опрема, и десктоп и лаптоп-компјутери. Планот е годишно да се произведуваат од 400 до 500 илјади парчиња.

Во зоната „Бунарџик“ моментално функционира само со една активна инвестиција, на американската „Џонсон контролс“, која стартуваше во почетокот на 2008 година.

Списокот на заинтересирани компании за „Бунарџик“ е голем, а на него се и словенечка „Искра“, која поради кризата, на крајот на 2008 ја одложи инвестицијата за неколку месеци. Фабриката требаше да произведува електроматеријали. Од истите причини и француската „Монтипе“, со која Владата непосредно пред вонредните парламентарни избори лани во Париз потпиша меморандум за разбирање, ја одложи за неколку месеци изградбата на фабрика за производство на алуминиумски глави за мотори. Таа инвестицијата беше околу 60 милиони евра.

Доколку се реализира барем дел од очекуваните инвестиции во „Бунарџик“ годинава, тие би можеле да ја подобрат лошата слика за директните странски инвестиции. Според податоците на Народна банка на Македонија, во јануари годинава имало 26,5 милиони евра директни инвестиции, што е помалку од истиот месец лани, 30,7 милиони евра. Досега голем број компании со Владата имаат потпишано само меморандуми за разбирање.

Како што неодамна за „Утрински“ изјави Веле Самак, министер за странски инвестиции, од почетокот на годинава досега, меморандуми за инвестиција се потпишани со: „Шише џам“, „Техно Хосе“, „Три вју“, „Хаиер“ и „Еурохормонес“. Според Самак, се подготвува инфраструктурата за француската „Монтипе“, кои од втората половина на годинава треба да започне со градба на објектот.

http://utrinski.com.mk/?ItemID=97FDD87AF2B88A42AF8652208C13F69C