Американска амбасада

ПОЧНА ПРЕСЕЛБАТА НА АМЕРИКАНСКАТА АМБАСАДА НА КАЛЕ

Со садење цвеќиња пред влезот на Кале, привршуваат последните подготовки за пуштањето во употреба на новото грандиозно здание на американската амбасада во Скопје.

Најавено е за почетокот на идната недела. Утринава почна големата преселба од старата зграда во центарот на Скопје. Со силно полициско обезбедување, редици камиони ги товараа рачно, откако секој поединечно ќе ги минеше неопходните безбедносни проверки.

Оваа зграда до 1993 година беше детска градинка. Иако не бевме признати како независна Република Македонија, Соединетите американски држави ја отворија својата прва канцеларија за врски токму овде, со тогашниот нивни дипломатски преставник Виктор Гомрез. Потоа следуваше првиот амбасадор Кристофер Хил, па Мајк Ајник, познатиот Лоренс Батлер и амбасадорката Џилиен Миловановиќ. Сега амбасадор е Филип Рикер.

Тој ќе го пушти во употреба новиот комплекс на Кале. Со американското знаме на врвот на јарболот, со шампањско и со плех музика изградбата почна во 2006 година, откако за 50 евра за квадрат, американците  купија 44.500 метри квадратни.

- Новата амбасада претставува крупна американска инвестиција во земјава и израз на довербата во иднината на РМ како независна, стабилна и мултиетничка држава - изјави Џилијан Миловановиќ, амбасадор на САД во РМ во 2006-та година.

Иако оваа инвестиција во 2005 се сметаше за продавање на национален локалитет, се покажа дека е исплатлива. Американците купија земја за 2 и пол милиони, на која го изградија најголемиот регионален центар вреден 30 милиони долари, а ние добивме стратешко партнерство.

Во 15-те години во детската градинка на Илинденска, американските дипломати поминаа многу со нас, но и ние со нив.