Верски објекти (општо)

На плоштадот во Скопје на местото каде била џамијата Бурмали, координативното тело за нејзина повторна изградба денеска прикажа ученичка изложба со цртежи.

Ги повторија нивните познати досегашни заложби за храмот, а на авторите на најдобрите слики им беа поделени велосипеди.

На конкурсот на координативниот одбор за повторна изградба на Бурмали џамијата за да го претстават изгледот на овој верски објект преку цртање беа пријавени многу ученици од основните училишта од Скопје. Децата биле инспирирани од старите оригинални фотографии на некогашна џамија, но и од раскажувањата на нивните наставници и родителите.

„Најмногу ме инспирираше да сликам тоа што оваа стара џамија некогаш била урната и едноставно сакав да ја нацртам џамијата Бурмали“ рече Лејла, ученичка од ОУ “Цветан Димов“.

„Ми се бендиса многу ова мислење и сите натпреварувачи заедно со наставниците направивме планови да ја нацртаме џамијата. Имавме различни планови како изгледала низ вековите и направивме различни планови како треба да изгледа една нацртана џамија“ вели Тесним, ученичка од ОУ “Лирија“.

Претставникот на координациониот одбор за обнова на Бурмали џамијата Рамадан Рамадани вели дека целта на изложбата била населението да стане свесно и да заживее овој верски објект во центарот на Скопје.

„Ова барање е многу оправдано и многу легитимно. Ќе продолжиме со вакви и со други административни активности за што побрзо враќање на Бурмали џамијата“ изјави Рамадан Рамадани, претставник на координативниот одбор за обнова на џамијата.

На крајот на изложбата беа доделени награди за најдобар цртеж. За првите четири места, организаторите на учениците им доделија велосипеди. На конкурсот се пријавија 90 ученици. Џамијата Бурмали била изградена кон крајот на 15 век, а урната во 1925 година од тогашните власти во кралска Југославија за на нејзино место да се изгради Офицерскиот дом.