Телеком арена (арена Филип II Македонски)

ПОГЛЕД

Гладијаторска арена

Деспина Трајковска

Ќе се претвори ли Градски стадион по неговата реконструкција во гладијаторска арена или во импозантен фудбалски храм!? Со оваа дилема се соочува јавноста по шпекулациите дека по реконструкцијата на објектот ќе никнат лавови, сонцето од Вергина, војници со копја и штитови, дваесетметарски скулптури... Античките обележја на спортскиот комплекс би се оправдале со неодамнешното преименување на стадионот во „Филип Втори“. Демек, џабе било името на објектот без симболики на македонскиот војсководец.

Сепак, барем според тврдењата на проектантите и Јавното станбено претпријатие, антиквизација на фудбалскиот храм нема да се случи. Иако идејата ја иницирала Владата, таа наводно попуштила по убедувањата на стручњаците дека античките симболи нема да соодветствуваат на спортскиот објект. Просто за неверување е дека иницијативата на владиниот врв паднала во вода ако не се заборави на упорноста во реализирање на желбите на премиерот.

Ќе се загреваат ли фудбалерите и публиката гледајќи во лавовите и копјаниците на стадионот, допрва ќе се знае. Судбината на популарниот Градски дефинитивно ќе се разоткрие пролетта 2011 година, кога треба да заврши неговата реконструкција. Иако надлежните тврдат оти идејата за антички симболи на првично најавуваниот македонски клон на минхенската „Алијанс арена“ дефинитивно е на хартија, сепак, постои простор за сомнежи. Неофицијално, картите се' уште се отворени. Од антиквизација на влезот на Владата, преку скопскиот плоштад со Александар Македонски до антички симболи на „Филип Втори“, неизвесно е во која насока ќе продолжи Владата. Дали патот веќе го трасирала или ќе го смени курсот на движење, очигледно, знае само премиерот Груевски.

http://www.utrinski.com.mk/default.asp?ItemID=4FB5157724C28C4394299CDD168B1790