Наместо цвеќе, долна облека и черги се веат на терасите

Нема одлука или законска одредба со која Градот би можел да влијае на естетиката на зградите

Снежана Калабакова

Наместо убави цветни аранжмани, на некои балкони на зградите во центарот на градот висат јамболлии, черги и долна облека. Може да се видат и стари ормани, разни непотребни предмети од домаќинството, мини-шпорети на кои домаќинките приготвуваат јадење на отворено за време на летните горештини и што ли уште не. Ваквите балкони сосема ги нагрдуваат фасадите на колективните станбени згради во централното градско подрачје и даваат лоша градска слика.

Овие станари очигледно забораваат дека живеат во строгиот центар на Скопје. Домувањето во централното градско подрачје има многу предности, но воедно и ги обврзува граѓаните поинаку да се однесуваат, за разлика од сограѓаните кои живеат во периферните делови на градот. Во ниту еден европски град не е дозволено и не може да се види како алишта се веат на балконите. Домувањето во објекти во центрите на големите градови, секако, за станарите предвидува и поинакви правила на однесување, но и санкции. Но, оваа проблематика кај нас не е ставена во никаква законска рамка. Нема ниту градска одлука ниту, пак, одредба во Законот за домување, со што се пропишува однесувањето на ваквите станари. Се' е препуштено на нивните културни навики.

„Проблемот со изложувањето предмети на балконите на станбените згради, со кои се нарушува екстерниот изглед на просторот, особено на зградите кои се наоѓаат на фреквентните булевари, не е опфатен со градската Одлука за комунален ред. Во Законот за комунални дејности, кој претставува база за носење на Одлуката, не е наведено како основ за санкционирање. Исто така, ниту во Законот за јавна чистота не е внесена одредба со која Градот би можел да влијае на естетиката на балконите. Доколку дојде до измени во Законот за комунални дејности, или, пак, во новиот Закон за домување, ќе се отвори простор градските и општинските одлуки за комунален ред да се дополнат. Со тоа, пак, градските и општинските инспекции ќе имаат основ да ги предупредуваат и да ги казнуваат граѓаните, кои нема да ги почитуваат законските обврски“, објаснуваат од Одделението за односи со јавност во Градот.

Од Министерството за транспорт и врски тврдат дека ниту во предвидените измени на Законот за домување нема одредба која пропишува како треба да ја запазат естетиката на балконите оние кои живеат во строгото градско подрачје. Од таму додаваат дека постои можност за јавна расправа за Законот при што граѓаните ќе можат сами да сугерираат да се востанови законска рамка за начинот на однесување на станарите од строгиот центар на градот, конкретно за ова прашање.

Автобуската станица на Бит-пазар не стана дуќан

Општината Чаир ги тргнала металните лимови со кои некој сакал да ја огради стреата и да направи трговски објект, но оттаму велат дека не знаат ниту кој го сторил тоа, ниту дали некој ќе одговара за обидот да се узурпира станицата