Сообраќајна сигнализација и информативни табли

Градот наредната година планира да ги унифицира сите семафори во градот, а ќе се вгради и нов софтвер за светлосна сигнализација. Според надлежните од ЈП "Улици и патишта" во план е вертикалната сигнализација целосно да се модернизира, за што ќе биде распишан тендер од Град Скопје. Исто така, семафорите ќе се репрограмирааат семафорите, бидејќи во моментот не одговараат целосно на сообраќајните токови.

- Ние завчера ги репрограмиравме семафорите кај Момин Поток, каде што се создаваа колони, но проблем има и на другите крстосници како што е онаа кај "Три бисери", на клучката "Дијамант" во Автокоманда, на улицата Џон Кенеди и во Гази Баба. Проблемот е што во текот на денот се менува интензитет на сообраќајот и затоа би требало да се врши репрограмирање неколку пати на ден. Затоа планираме да ги модернизираме семафорите и да набавиме 40 контролори, односно нов софтвер и хардвер кои од друга страна ќе овозможат од еден центар да се врши контрола на сигнализацијата, вели Илија Мартиновски, директор на јавното претпријатие.

Оттаму додаваат дека до Нова година бројачи на семафорите ќе се постават и на крстосницата кај Градска болница, но и на уште две на Партизански одреди.

Ќе се репрограмираат семафори поради кои сега се создава непотребен метеж

За да го изведат новото штелување, од ЈП „Улици и патишта“ чекаат одобрение од Градот

За подобрување на сообраќајниот тек ќе се постават и неколку одбројувачи на семафорите

ЈП „Улици и патишта“ планира да ги репрограмира семафорите на четири фреквентни раскрсници кои сега не соодветствуваат со сообраќајниот тек и заради тоа повремено предизвикуваат непотребен метеж. Станува збор за светлосната сигнализација поставена кај „Три бисери“, потоа оние кај Момин Поток, на улицата „Џон Кенеди“ и семафорите на надвозникот „Естекада“. Имено, според анализите на ЈП, како и од поплаките на граѓаните надлежните утврдиле дека работата на семафорите на посочените локации не е усогласена со потребите на сообраќајот, односно неговиот капацитет во определено време од денот. Илија Мартиновски, директор на ЈП „Улици и патишта“, вели дека постои опција „душата“ на семафорот да се програмира за нејзино менување неколку пати во текот на денот.

„Согласно со направените анализи, утврдивме дека, на пример, во утринските и попладневните часови кога има зголемена фреквенција на сообраќајот, неопходно е црвеното, односно жолтото и зеленото светло да се менуваат почесто, односно во одреден период да траат подолго или пак пократко од сегашното вклучување“, објаснува Мартиновски, кој посочи дека има сознанија оти барањето на ЈП веќе поминало низ градските комисии и чека на потврден одговор од Градот. Директорот на „Улици“ дополнува дека во насока на подобрување на квалитетот на сообраќајната циркулација, претпријатието до Нова година планира да постави уште четири бројачи за семафори. Иако се' уште не се утврдени локациите на кои ќе се постават тие, најверојатно одлуката ќе падне на два семафора на булеварот „Партизански одреди“ и на оние кај Градската болница. Вакви одбројувачи Градот неодамна постави на раскрсницата кај соборниот храм и кај ТЦ „Мавровка“. (Дс.Т.)