Соравиа центар

Токму овој пропуст, беше главната причини зошто швајцарската компанија "Нигли груп" во 2002 година се откажа од идејата да го купи објектот, иако понудија 10,8 милиони евра и беше потпишан преддоговор

Ниските тавани се главниот проблем поради кој австриската компанија "Соравија", која пред една година ја купи зградата на Светскиот бизнис центар во Скопје, се уште не може да најде закупци за просторот. ВЕЧЕР дознава дека фирмата "Штрабаг", која е ангажирана да ги изведува градежните работи во зградата се соочува со тешкотии и не може да оформи квалитетен и модерен деловен простор во согласност со стандардите за канцелариско работење.
Извори на ВЕЧЕР велат дека Австријците размислувале дури и да уриваат делови од зградата само за да го уредат просторот според европските норми за канцелариско работење. Но, тоа било избегнато откако се нашло решение таваните да добијат на висина со галериски простор.

Токму овој пропуст беше главната причини зошто швајцарската компанија "Нигли груп" во 2002 година се откажа од идејата да го купи објектот. Швајцарците за недоизградената зграда понудија 10,8 милиони евра, но иако потпишаа преддоговор, не ја уплатија бараната гаранција, со образложение дека таваните биле ниски и не одговарале на европските стандарди.

Во меѓувреме во зградата-карабина во центарот, која ќе се вика Соравија бизнис центар, интензивно се работи на адаптација на внатрешноста. Австриската компанија зградата ја купи за 10,3 милиони евра, а инвестира дополнителни 20 милиони евра во дозавршување и опремување на објектот за да може новиот деловно-трговски центар да ги прими првите станари на почетокот на 2008 година.

Од Јавното станбено претпријатие, кое претходно беше сопственик на зградата, тврдат дека бизнис-центарот е граден под лиценцата БТЦ и е во согласност со стандардите и сервисните критериуми на членовите на оваа асоцијација со седиште во Њујорк.

Откако ќе го реновира и опреми, Соравија планира просторот некое време да го изнајмува, а подоцна и да го продава. Во зградата се очекува да се сместат седиштата на фирми или претставништва на компании со австриски капитал, чии канцеларии се расштркани низ Скопје. Според некои најави, австриските газди на ЕСМ-Дистрибуција планираат канцелариите да ги сместат во зградата на "Соравија центар Скопје". Иако децидно не потврдуваат, истото тоа ќе го стори и третиот мобилен оператор ВИП, кој моментално користи простории во зградата на "Пелагонија", што е на стотина метри од објектот на "Соравија". Од ВИП велат дека со растот на компанијата не ја исклучуваат можноста за промена на сегашните канцеларии.

Приземјето и катовите до висина на Градскиот трговски центар се наменети за трговски центар. Станува збор за простор од 4.000 квадратни метри што ќе биде оформен во дуќани што ќе се продаваат. Останатите катови или површина од околу 9.000 квадрати ќе биде деловен простор што ќе се издаваат под кирија. Центарот располага и со 100 подземни места за паркирање.

Светлана БЛАЖЕВСКА
Радмила Ј. НИКОЛОВСКА