Телеком арена (арена Филип II Македонски)

Тешко повреден градежен работник

Елена Ацевска	Коментари (17)

54-годишен градежен работник утрово падна од скеле на северната трибина на стадионот „Филип Втори“.

Веднаш бил префрлен во Ургентниот центар со тешки повреди на главата. Според лекарите, неговата состојба е критична и тој се бори за живот.

Работникот паднал додека работел на скелето високо 14 метри. Според очевидците, тој носел шлем, но немал сигурносен појас.

„Уште не можам да се соземам од сабајле, го видов човекот како падна, целата слика ми е пред очи. Со лицето надолу падна, се откачи скелето, а воопшто нема скеле, само две цевки има“, рече работник на Градскиот стадион.

Работниците потресени од настанот обвинуваат дека работат повеќе од 12 часа дневно на температури од 40 степени без слободни денови.

За дополнителната работа градежната фирма „Бетон“ не им плаќа ниту денар. Тие велат дека заморот е една од причините поради која нивниот колега паднал.

„Без одмор, нон-стоп работиме, без разлика дали сме истовар, ѕидари... Се работи претерано, по 12 часа, од 7 до 7. Згорчено ни е на сите. Работам и саботи и недели и празници и делници“, велат работниците.

„За Духов Ден слава ми е, бев на работа, а ми пишаа дека сум седел дома. За осум илјадарки“, вели еден градежен работник.

Раководството на „Бетон“, иако ветија по направениот увид, не дадоа изјава. Северната трибина на Градскиот стадион се гради речиси една година. Треба да биде и официјално пуштена на 12 август.

Иако таа се уште не е готова, картите за фудбалскиот меч Македонија - Шпанија се во продажба.

Роковите притискаат да биде готова за гостувањето на европскиот шампион, но сето тоа на сметка на животот на градежните работници.

РАБОТНИК ТЕШКО ПОВРЕДЕН ПО ПАД ОД СЕВЕРНАТА ТРИБИНА НА СТАДИОНОТ „ФИЛИП ВТОРИ“

Педесет и пет годишниот градежен работник Живоин Петровски од Куманово денеска падна од северната трибина на стадионот „Филип Втори“ во Скопје која е во изградба, и со тешки повреди на главата итно е пренесен во кома центарот na Клиниката за неврохирургија.

Градскиот стадион и официјално со ново име. Огромен натпис - Национална арена Филип Втори Македонски од денеска ќе ја краси надворешната страна на најголемото спортско здание во земјава. Стадионот на големо се спрема за 12 август кога нашата фудбалска репрезентација ќе ги одмери силите со моќната Шпанија.

Тогаш и официјално  се планира да биде пуштена во употреба северната трибина. Нејзината изградба ќе чини 14,5 милиони евра и е дел од владиниот проект за целосна реконструкција на стадионот која се очекува да финишира на пролет, 2011.

Сенка на денешното брендирање на арената фрли несреќата на северната трибина.

54- годишен работник од Куманово се бори за живот на скопските клиники откако утринава падна од скеле високо 14 метри. Според изјавите на неговите колеги кои не сакаа да зборуваат пред камера, работникот Живоин Петровски од Куманово паднал директно на лицето.

Веднаш по инцидентот со приватно возило бил префрлен на Ургентниот центар, каде е реанимиран и препратен на Клиниката за неврохирургија. Од таму велат дека пациентот бил примен со тешки повреди на главата и се наоѓа во критична состојба.

Од фирмата која ги изведува градежните работи не сакаа да ја коментираат несреќата.

Исплашени и вознемирени работниците кои ги затекнавме на градилиштето се  пожалија на условите за работа. 

Се почестите  несреќи кои им се случуваат на градежните работници го отвораат прашањето, колку македонските градилишта се безбедни работни места и колку компаниите се грижат за сигурноста на работниците.