Телеком арена (арена Филип II Македонски)

Ќе се дислоцира билетарницата покрај стадионот

Изградена е пред повеќе од 40 години, а денес се користи три-четири пати годишно

Миодраг Мицковиќ

Последните невидени мешаници пред единствената билетарница на стадионот „Филип Втори“ покажа дека таа веќе ја нема функцијата за која беше изградена и наменета. Со само четири шалтери, ишарана со графити, место каде што доаѓаат наркомани, билетарницата, сопственост на ЈП за станбен и деловен простор, како да застанала во времето. Нејзиното функционирање веќе одамна е надживеано, па во денешно време објектот многу повеќе личи на ќумез, отколку на место каде што може да се купат билети за да се гледаат најголемите фудбалски ѕвезди во светот. Планот беше со изградбата на северната трибина да се најде соодветно место и за модерни билетарници во составот на самиот стадион, така како што е големите стадиони.

Постарите скопјани се сеќаваат на четирите тркалезни билетарници, куќички, поставени до помошното игралиште на „Вардар“, веднаш до бетонското кошаркарско игралиште каде што кошаркарите на „Вардар“ ги играа своите првенствени средби на отворено, бидејќи тогаш во Скопје немаше ниту една сала. Во тие куќички се работеше и по земјотресот, поточно до 1964 година, кога беа урнати и на нивното место во далечната 1968 година беше изградена сегашната билетарница.

Во времето во поранешна Југославија, кога „Вардар“ играше во Прва лига, за сите негови средби во прволигашкото друштво тука се купуваа билети за натпреварите со „Црвена ѕвезда“, „Партизан“, „Динамо“, „Хајдук“, „Вележ“... Меѓутоа, во самостојна Македонија, кога „Вардар“ почна да игра во Првата лига на Македонија, билетарницата ја изгуби функцијата, бидејќи посетите на натпреварите на „Вардар“ и на „Работнички“, кои најмногу го користат стадионот, беа толку мали што немаше потреба да се отвора. Билетите се продаваа на бедемот покрај стадионот, а за поважните натпревари во европските купови на плоштадот „Македонија“, на обични масички. Единствено за меѓудржавните средби на репрезентацијата се отвораа нејзините четири шалтери, а често ни тогаш.

Раководството на арената „Филип Втори“ сега бара решение каде да се дислоцира билетарницата. Има неколку предлози, но се' уште нема конечно решение. Просторот под северната трибина не е најсоодветно место, бидејќи пред неа нема доволно простор за паркирање и за поголем проток на луѓе. Просторот под јужната трибина, пак, речиси целосно е во сопственост на „Силекс“. Дознаваме дека има предлог билетарница со повеќе шалтери да се изгради под првиот мост што го поврзува бедемот со јужната трибина, бидејќи тој простор сега е неискористен. Дали ќе остане овој предлог, или ќе се најде друго решение, ќе се види. Но, сигурно е дека сегашната билетарница ќе мора итно да замине во историјата и да почне да се применува современ начин на продажба на билети.