Јакимовски ќе гради маалски плоштад кај Порта Влае

Граѓани од населбата Влае 1 негодуваат поради емотивната поврзаност на градоначалникот Јакимовски со својата населба, која ја разубавува со вакви капитални проекти

Нов плоштад со бина за културни манифестации, фонтана и скулптура ќе гради Општина Карпош во населбата Влае 2, на просторот помеѓу булеварот Партизански одреди и улицата Мраморец. Новиот плоштад ќе биде еден вид надоврзување на постојниот деловно-станбен комплекс „Порта Влае“. Во конкурсот за идејно решение освен што се бара поплочен простор, од авторот се бара да предвиди и зелена површина со урбана опрема.

Од Општината не соопштија на колкава површина се планира изградбата, само наведоа дека градежната парцела сега е неискористена. Според објаснувањата, на северната страна од локацијата е „Партизанска“, на источната е планиран деловен објект, на југ е улицата Мраморец, а на запад ќе се гради паркинг.

Конкурсот за идејно-архитектонско решение, што го распиша Општина Карпош, ќе трае до 3 октомври, по што се очекува да биде избран најдобриот авторски труд.

- Важен елемент на локалитетот е поврзаноста, односно надоврзувањето на плоштадот со изградениот комплекс „Порта Влае“, кој се наоѓа на западната страна од локацијата. Овој комплекс, преку своето оформено плато и паркинг-просторот најнепосредно се врзува со локацијата за плоштадот и го дооформува целиот потег по должината на булеварот Партизански одреди. Друг елемент е поминувањето на профилот на улицата Мраморец низ предметната локација, во делот кон поврзувањето со „Партизанска“, која се' уште не е реализирана според урбанистичкиот план - велат од Општина Карпош.

Надлежните изјавија дека со реализација на партерното уредување на просторот, улицата Мраморец ќе се дислоцира на друго место.

Граѓани од населбата Влае 1, која се наоѓа од другата страна на булеварот Партизански одреди, спроти комплексот „Порта Влае“, негодуваат што градоначалникот Стевчо Јакимовски ќе гради плоштад во неговата населба.

- Го прочитавме огласот за градење плоштад во весник. Имаме впечаток дека Јакимовски и во овој, исто како и во минатиот мандат, не може да избега од емотивната поврзаност со својата населба, па продолжува да вложува во нејзино интензивно разубавување. Да не го споменуваме Влајко. Истото се случуваше и со претходниот градоначалник Андреј Петров, кој пак вложуваше најмногу во „Лептокарија“, каде што живееше. Лоша е оваа практика, што е со останатите населби во општината - вели Г.Х. жител на Влае 1.

Во Општина Карпош не се согласуваат со ваквите впечатоци на жителите.

- Од доаѓањето на власт на градоначалникот Стевчо Јакимовски, објавени се повеќе од 50 тендери. Граѓаните за се' може да се информираат од интернет-страницата на Општината. Според Програмата за работа, сите месни заедници ќе бидат еднакво опфатени со реконструкциите и инвестициите и нема ниту една месна заедница под еден милион евра - тврдат од кабинетот на градоначалникот.

Изградба на плоштадот, се објаснува во конкурсот, е поради фактот што во овој дел, но и во населбата Влае 1, недостасува дефиниран слободен простор кој ќе биде природно собиралиште на граѓаните и обележје на реонот.

- Локацијата е природно оформен простор кон кој гравитира голема популација од повеќе од 3.500 жители во населбата. Општината ја согледа потребата од оформување ваков јавен простор со кој ќе се идентификуваат околните жители. Целта на проектот е да се создаде осмислен отворен простор, кој во себе ќе прими различни содржини, ќе понуди различни можности и ќе стане дел од животите на луѓето - се вели во конкурсот.

Проектот треба да понуди современ архитектонски израз, односно поплочен простор за собири, концерти, претстави, изложби на отворено, со можност за поставување бина и монтажни трибини, како и зелена површина, со дефинирана хортикултура. Ќе има и урбана опрема, фонтана и место за скулптура.

Заврши изградбата на 12-метарската саат-кула во реонскиот парк во Ѓорче Петров. Сите работи околу партерното уредување на околината на кулата, како што велат во Општината, се завршени. Вградени се четири часовници и дисплеери, на кои се објавуваат информации за најновите случувања и за културните настани кои се планирани во текот на еден месец. Информациите ќе се менувани секојдневно, за граѓаните да бидат навремено информирани за се што се случува во Општината. - Саат-кулата и вовчето-пампурче ќе претставуваат препознатлив дел од реонскиот парк зашто ретки се ваквите градби во парковите низ Македонија - велат од Ѓорче Петров. Според нив, поправени се сите реквизити во детските игралишта, каде што на искршените лулашки и нишалки им се сменети дрвените седишта, а обновени се и клупите во паркот.